Ñahendu Jesús Ñe’ẽ. Jueves 19º Durante el Año

Escucha el evangelio y la reflexión en: https://youtu.be/kIMS9oMQVXc

Jueves 19 Durante el Año Mateo 18, 21 – 19,1

Upérõ Pedro oñemboja Jesús rendápe ha he’i chupe: — Mbo’ehára, oime ramo hembiapo vaíva che ndive piko mboy vése aheja rei vaerã chupe. 7 piko iporãma.

Jesús katu he’i chupe: — Nahániri. Ndaha’éi 7, 77 jo’a-jo’a uvei.

Kóa ko káso ohechaukáta peẽme mba’éichatapa hína Ñandejára Rréino. Oiko va’ekue ndaje raka’e peteĩ mburuvicha oikuaaséva mboy-mboýpa odeve chupe umi omba’apóva chupe. Iñepyrũme voi, ojegueru hendápe peteĩ hetaiterei rasa odevéva chupe. Ha isoguégui, ndaikatu mo’ãiva omyengovia mba’eve. Huvicha upémarõ he’i ovendetaha chupe tembiguái ramo ta’ýra kuéra ha hembireko ave, ha upéva ári opa mba’e oguerekóva. Pe hepykue opytáta chupe upe oiporu vaekue rekovia.

Upépe, pe kuimba’e oñesũ huvicha renondépe ha ojerure asy chupe: “Che ruvicha, ndikatúi piko che ra’arõ’imive. Amyengoviáta niko ndéve pe aiporu vaekue.” Ha huvicha oiporiahuvereko chupe. Oheja rei chupe pe odevéva, ha oheja oho. Ha ha’e osẽvo okápe katu, ojuhu hapichápe oiporu vaekue chugui pláta michĩ ra’ymi.

Opo voi hese ha oityvyro chupe, he’ívo: “Emyengovia chéve pe redevéva.” Hapicha oñesũ henondépe ha ojerure asy chupe: “Ndikatúi piko che ra’arõ’imive. Amyengoviáta niko ndéve pe aiporu vaekue”. Ha’e katu ndoikuaaséi chugui mba’eve. Oguerahauka préso omyengoviapa peve pe oiporu va’ekue.

Umi hapicha ohechávo upéva, ipochypa. Oho hikuái mburuvicha rendápe ha omombe’u chupe mba’épa ojehu. Upémarõ pe mburuvicha ohenoika pe kuimba’épe ha he’i chupe: “Ne aña ra’y reikóva. Che niko aheja rei ndéve pe ikatu’ỹ va’ekue remyengovia chéve, rejerure haguére. Mba’éicha piko nde, nderehecha kuaái nde rapichápe, che ajapo haguéicha ne ndive.”

Pe mburuvicha ipochy’eterei opytávo. Upémarõ ombyepotika omyengoviapa peve upe chupe odevéva.

Upéi Jesús osẽ he’i: — Péicha avei ojapóta pende rehe che ru yvágape oĩva pende py’aite guive ndapeheja reíri ramo pende rapichápe pe ivaíva ojapóva pende rehe. He’ipa rire ko’ã mba’e Jesús osẽ oho Galiléagui ha oguãhẽ Judéape.

Ñandejára Jesucristo ñe’ẽ.

ÑAMBOGUEJYMÍNA ÑANDE REKOVÉPE…

Upe ofallávape ñande ja’e: “Nde redeve chéve hína. Ágãnte repagáne”. Jesús omombe’u peteĩ káso jahechakuaa haguã hetaiterei jadeveha ñande ruvicha guasu, Ñandejárape. Nañanderupyty mo’ãi japagapa haguã ñande rekovére, ñande retére.

Ndaipóri pláta ikatu vaerã ñame’ẽ Ñandejárape kuarahy, ára ko’ẽ, yvytu ha hetaiteve mba’ére. Tuichaiterei jadeve, ñanemalagradesídoma katu ha, upéva ári jey, ñande fajúto ñande rapicha ndive. Ha ha’e ñaneperdona. Ha piko mba’éicha ñande, che irũ ha che reindy, ndajahechakuaa mo’ãi ha nañaperdona mo’ãi ñande rapicha ofalláva ñanendive.

Pa’i Jasy.