Ñahendu Jesús. Martes 10 a TDA

Escucha el evangelio y la reflexión en: https://youtu.be/l28f13LhD-k

Martes 10 a TDA Mateo 5, 13 – 16

Upérõ Jesús he’i idisípulokuérape: – Peẽ niko ku jukýicha hína ko yvy apére. Pe juky nahe’ẽvéi ramo niko ndikatuvéima ñamohe’ẽ jey. Mba’everãma na’iporãi. Ñamombo okápe ha oñepyrũmba hese.

Peẽ niko ku mba’e rendýicha hína ko yvy apére. Peteĩ táva oĩva sérro ru’ãme niko ndaikatúi jajaho’i. Avave niko nomyendýi lampĩu ha upéi omoĩ kambuchípe térã tupa guýpe. Yvate katu omoĩ, ohesape hag̃ua opa pe óga ryepy. Péichake avei peẽ. Peñeha’ã pehesape opavave renondépe, ha tojehecha pene rembiapo porãngue, ha tomomba’e guasu pende Ru, yvágape oĩvape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe juky niko jaiporu ñamoĩ haguã tembi’úpe, omohe’ẽ haguã. Tembi’ũ he’ẽva ñanembyetia’e ha heve. Ha pe tataindy ñamyendýramo ñamoĩ yvate, ohesape haguã ogagua rape. Ojekuaa porã va’erã, ndokañýi va’erã avavégui.

Upéicha avei, he’i ñandéve Jesús, jaiko va’erã jajeroviáva hese ñande rapichakuéra apytépe. Pe jukýicha jajehe’a va’erã, jaike va’erã hykuerépe. Ñamoirũ va’erã ñande róga, ñande táva, ñane retã rembiasa, jaikévo avei ñande ijapytépe, jaheka haguã opavave ykére pe tape iporãva, jaguata haguã Ñandejára oipota háicha.

Jesús he’i pe ñande jerovia hese ha’eha peteĩ mba’e porã, tekotevẽva ñamoĩ ñande rapichakuéra apytépe, ha henondépe kuéra. Oñandu, ohecha haguã ha’ekuéra avei mba’éichapa Jesús añete he’ẽ jukýicha. Ha jajeroviáramo hese ndajapytái pytũmbýpe, nañakañýi, ha’e omyesakãgui ñande guatarã.

Jaike va’erã aipóramo ñande jerovia reheve opa henda rupi. Jaiko hárupi, ñamba’apo hárupi, ñande barrio, ñande comunidad, ñane irũnguéra, ñande vecinokuéra apytépe. Jaikeva’erã kyhyje’ỹre ha ñakañy’ỹre, ñaguerotĩ’ỹre ñande jerovia jahávo organizaciónkuéra hápe, sindicato, comité, comisión, partido político. Ha oparupiete ñañeha’ã ñamoinge umi mba’e porã Jesús ñanembo’e va’ekue.

Ñande Iglesia avei ñanembo’e jaguata haguã umi hárupi, oime hina pe “Doctrina Social” hérava, omyesakãva mba’éichapa cristiano omýi va’erã oikévo política, economía, organización ha sindicatokuéra pa’ũme, pe jukýicha omoinge haguã upépe Jesús rembipota.

Omohe’ẽ haguã ñande rekove, ha ohesape haguã hetápe Jesús ñe’ẽ reheve, ñasẽ haguã jahávo pytũmbýgui. Jahechauka, che irũ ha che reindy, umi mba’e porã Jesús omyendy va’ekue ñande pype. Ñañemoĩ ñande rapicha apytépe ñande jerovia reheve, pe Jesús juky ombyetia’e haguã hetápe.

Pa’i Alberto Luna.