Ñahendu Jesús. Martes 3º Tiempo Durante el Año

Escucha el evangelio y la reflexión en: https://youtu.be/7S-c1Qmrn8Y

Martes 3º Tiempo Durante el Año Marcos 3, 31 – 35.

Upe aja oguahẽ Jesús sy ha ityvýrakuéra. Opyta okápe ha ohenoika chupe. Umi oguapýva Jesús ykére he’i chupe: Nde sy, nde ryvykuéra ha umi ne reindy oime okapehína, nde reka. Jesús katu he’i: Mávaiko che sy ha máva che ryvy?

Upéi oma’ẽvo umi ijerére oguapývare he’i: Ko’ãva hína che sy. Ko’ãva che ryvy. Ha oimeraẽ ojapóva che Ru rembipota, upéva hína che ryvy, che reindy ha che sy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande sy niko tuicha mba’e añete. Ñañemosã niko hese ñande rekove ypyete guive ha jakakuaa ijykére. Ha ñande tuichapa rire jahecha mba’éichapa ñanembyaty ijerekuévo arete guasu jave, térã katu isánto ára vove imemby kuéra ojere va’erã hese, ha ojotopa isy rógape, ku ryguasu ombyaty háicha imembykuéra ipepo guýpe.

Péina ápe jahecha Jesús pe tuicha riréma, osẽ riréma hógagui, ouha hendápe isy ha ihéntekuéra. Ha ohenóiuka ndaje chupe oipota oho hendápe. Ñaha’arõ niko ajépa Jesús opu’ã oheja opavavépe ha osẽ oho isy rendápe.

Jesús katu ndojapói péva. Ha mba’érenepa upéicha. Iforsádo imíko hína kóva ajépa che irũ ha che reindy. Pe ñande sy tuicha mba’eramo, ha pe ñane hermanokuéra orekóva ñande ruguy tuicha mba’eramo añete, tuichave mba’e hína pe ñande jerovia Ñandejárare ome’ẽva ñandéve ñane irũrã, ñande sy, ñande ru ha ñane pehengue pyahu, ñanemopeteĩva peteĩ jeroviápe ha ñanemosãva oñondive Ñandejára famíliaicha.

Pe jerovia ha Ñandejára ñe’ẽ rendu ñanemopeteĩ hetave ñande rapicha ndive. Ijáramo jepe avei umíva apytépe ñande rogagua, ñande sy ha ñane hermanokuéra, ndaha’éi hína ñane héntekuéra año. Hetave oime opárupi guáva ha heta hetave ambue tetãguáva jepe. Pe jerovia Jesús re niko ojapo ñande hegui Ñandejára familia, iñasãiva oparupi ko múndo pýre ha ipeteĩva Jesús mborayhúpe, ijatýva oñondive pe misahápe, eucaristíape, Jesús ñanerekombo’e ha ñanemongaru hápe.

Pa’i Alberto Luna.