Ñahendu Jesús. Martes 4º Tiempo Durante el Año

Escucha el evangelio y la reflexión en: https://youtu.be/AS50pDOqrso

Martes 4º Tiempo Durante el Año. Marcos 5, 21 – 43

Ohasa rire Lágo Galiléa mboypýri, Jesús opyta pe y rembe’ýpe. Heta jeýma umi ijatýva ijerére. Upévo, oguãhẽ hendápe Jairo. Ha’e niko pe omyakãva pe tupao upépe.

Ha ohechávo Jesúspe oñesũ henondépe, ha ojerure asy chupe: — Che rajy niko oime omano potaite. Ejúna emoĩ nde po hese. Tokuera ha toikove.

Ha Jesús oho hendive. Heta avei umi omoirũva chupe kuéra. Ha ojopypa chupe hikuái opáguio. Umíva apytépe oĩ peteĩ kuña hasýva ojapóma 12 áño. Huguy py’ỹiva jepi ha ikatu’ỹva okuera. Hetáma ohasa asy…

Oñemopa’ũ-pa’ũ umi ohóva apytépe Jesús gotyo. Oñembojase hese hapykue guio opoko haguã ijaóre. He’i niko pe kuña ipy’apýpe “Ijaórente jepe apokórõ, akueráne.” Ha opokóvo Jesús aóre, upepete pe huguyha opyta ha oñandu hetepýpe okueraha imba’asýgui. Jesús ave oñandu upévo osẽ hague chugui pu’aka omongueráva.

Ojere oma’ẽ opavavére ha oporandu: — Mávaiko opoko che aóre.

Pe kuña katu oikuaa porã okueráma hague. Ha kyhyjepópe oñemboja Jesús rendápe, oñesũ henondépe ha omombe’upa chupe pe ojehu va’ekue.

Jesús he’i chupe:— Che rajy, Ñandejárare rejerovia haguére rekuera. Tereho py’aguapýpe ha anivéma reiko asy.

Jesús oñe’ẽ jave gueteri hína, oguãhẽ peteĩ Jairo rogaygua, ha he’i chupe: — Omanóma nde rajy. Anivéma emyangekói mbo’ehárape. Jesús katu opena’ỹre pe oje’évare, he’i Jairope: — Anítei rejepy’apy. Ejeroviánte che rehe.

Ha ohótavo Jairo rógape, Jesús ndohejái avavépe oho hendive. Pedro, Santiágo ha tyvýra Juánpe añónte ogueraha hendive. Oguãhẽvo Jairo rógape ojuhu hasẽmba joáva upépe. Oike ha he’i chupe kuéra: — Mba’éreiko pene rasẽ ha pejahe’o péicha. Ko mitakuña niko nomanói, okénte hína.

Oĩ katu oñembohorýva hese. Ha’e katu omosẽmba opavavépe. Ha itúva, isy ha idisípulokuéra ndive oike pe mitakuña oĩháme. Ipojái ipóre ha he’i chupe: — Talitá kum (he’iséva: “Mitakuña epu’ã.”).

Upévo pe mitakuña, oguerekóva 12 áño, opu’ã ha oguata. Ha opavave opondera joa. Jesús katu he’i chupe kuéra ani haguã omombe’u avavépe. Upéi he’i túva ha sýpe: — Pemongaru pe mitã.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Sapy’ánteko nde che irũ ha che reindy, ikatu nde ave ekyhyje eñemoĩ haguã Jesús renondépe. Etĩ ehenói haguã chupe ha epensa ndaijái chéne haguã ndéve ha’e openávo nde rehe.

Etanteami katu na ha ojapo haguéicha ko kuña hasýva ojekytýnte va’ekue ijaóre ha opyta vaekue okueraite. Eñanima katu nde ave, eñandu haguã mba’eichaitépa tuicha pe Ñandejára mborayhu.

Pa’i Jasy.