Ñahendu Jesús Ñe’ẽ. Martes 6º Pascua

Escucha el evangelio y la reflexión en: https://youtu.be/MtCgLxbehpM

MARTES 6º PASCUA San Juan 16, 5-11

Jesús he’i idisípulokuérape: Ko’ágã katu niko aháta hína aime haguã che ru ndive, ha peẽ napeporandúi chéve moõpa aháta. Peñemoĩ katu peñembyasy ha’e haguére peẽme ko’ã mba’e. Añetéko ha’e peẽme, iporãvéta niko peẽme che ahárõ. Ndaháirõ, Espíritu Santo
pene pytyvõhára ndou mo’ãi penepytyvõ.

Che ahárõ katu, amboúta chupe peẽme. Ágã ha’e ou vove, ohechauka porãta máva-mávapa hembiapo vai, mávapa nahániri, ha mávapepa Ñandejára omoĩta hendaguãme. Ha mávaiko pe hembiapo vaíva. Upe ndojeroviáiva che rehe. Ha mávaiko pe hembiapo vai’ỹva. Ha che, ahátava hína che ru rendápe, ha peẽ ndache recha mo’ãvéi. Ha mávapeiko Ñandejára omoĩta hendaguãme. Añáme, pe oguerekóva ipoguýpe ko yvy, ha Ñandejára he’ímava ohunditaha.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñande ningo ñane mitãme ndaikatúi jaiko ñande sy’ỹre. Ijyva ári ha hapypa’ũme ñakambu ha jakakuaa oguahẽmeve ára ñanembopo’o haguã. Pe mitãme guarã ningo ijetu’u péva ha ndopoiséi isýgui.

Opáichavo upe sy oikuaa hína tekotevẽha ombopo’o pe mitã ikatu haguãicha mokõivéva ijehegui. Pe mitã ndopo’óiramo niko opytáta osaingo isýre ha pe sy ndaikatu mo’ãi mba’eve ojapo chugui. Iporãve hína oñemosãmbuku ojuehegui mokõivéva. Pe sy niko ndohejái imembýpe. Oñemomombyry imínte chugui upéicha pe mitã okakuaáta ha osẽ isy sái ruguái guýgui. Oñembokatupyry ohenonde’a haguã ohóvo opa mba’e ha’eño.

Upéicha avei Jesús he’i iñirũnguérape: Iporãvéta peẽme che aháramo. Jesús oikuaa ha’e opyta ramo umi apóstol ndokakuaa mo’ãi. Ojekótante hese ha ndaijehegui mo’ãi.

Ñande avei Jesús icha jaheja vaerã ñande rapicha ha’eño. Ñande rógape, ñamba’apo hápe, ñande comunidad, capilla-pe. Ñame’ẽ va’erã káncha ipyahuvéva ha imitãvévape. Ñamopa’ũ ikatu haguãicha hikuái oñakãrapu’ã, oguata ijehegui ñande rehe’ỹ. Tojehechakuaa, tojetyvyro ha toñembokatupyry. Opa ára ñaime ramo hi’ári ha nañasẽiramo ijykéregui, ojekónte ñande rehe hikuái ha ndokakuaái, notyarõi. Opyta ikangy ha ipituva.

Upévare Jesús oho, okúi, okañy, ogue, omano. Hendaguépe ñapu’ã haguã ñande. Jajapo ha ñamosã jahávo upe ha’e omoñepyrũ va’ekue, upe ñanembo’e ha ohechauka va’ekue. Upéva iporãve, upéva ñanemongakuaa.

Japytáramo jepe ñane ño, Jesús nañanderejaitéi. Ha’e ombou ñandéve Espíritu Santo, ñane pytyvõhára, ñanemomandu’áva iñe’ẽre ha ñanemombaretéva jaguata haguã oñondive Jesús rapére.

Mba’épepa hína che reindy ha nde che irũ ikatu oime rejeko ha reha’arõ iterei hína nde rapicha térã katu Ñandejára voi ojapo ha ome’ẽmba ndéve. Noimeichénepa oguahẽma hína pe tiémpo ndéma nde jehegui epu’ã, eguata ha ejapóvo upe Ñandejára oñandukáva ndéve nerembiaporã. Mba’épa reñandu.

Pa’i Alberto Luna.