Ñahendu Jesús Ñe’ẽ. Matías apóstol ára

Escucha el evangelio y la reflexión en: https://youtu.be/PBWojgS4orI

14 mayo: Matías apóstol ára San Juan 15, 9-17

Jesús he’i idisípulokuérape: Che pohayhu peẽme, che ru che rayhuháicha chéve. Peiko kena mborayhúpe, pe mborayhu pende rehe añandúvape. Pejapo ramo che rembipota, peikóta pe mborayhúpe pende rehe añandúvape. Péicha avei che, ajapóvo che ru rembipota, aiko pe imborayhu ha’e che rehe oñandúvape. Añe’ẽ niko peẽme kóicha pevy’a haguã che ndive, ha pene renyhẽ haguã vy’águi.

Pe tembiaporã ahejáva peẽme hína, pejoayhu che pohayhuháicha. Pe mborayhu tuichave oñandúva niko hekove jepe ome’ẽ iñirũre. Ha peẽ che irũ hína, pejapórõ che ha’éva peẽme. Che niko nda’éi pende rehe peẽ che rembiguaiha. Tembiguái niko ndoikuaái mba’épa ijára ojapo.

Che poguereko che irũ ramo, aikuaaukágui peẽme opa mba’e che ru he’i vaekue chéve. Peẽ nda che poravói vaekue chéve. Che poiporavo va’ekue peẽme. Che pomondóta pejapo haguã heta mba’e iporãva ha hetápe ohupytýva. Péicha, che ru ome’ẽta peẽme opa mba’e pejeruréva chupe che rérape. Upévare, ha’e jey voi peẽme, pejoayhu.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“La suérte ñagueroko’ẽnte” he’i ningo ñe’ẽ. Ha upevaite oiméne oñandu raka’e San Matías apóstol, ko árape ñane mandu’áva hína. Jesús omano rire niko ojeporavo kuri peteĩva umi disípulokuéragui oike haguã umi 12 apóstol apytépe, Judás Iscariote rendaguépe. Pe otraisiona vaekue Jesús pe. Ha oiporavo rire mokõi: Bernabé ha Matías, ha oñembo’e rire, umi 11 apóstol opoi hesekuéra suérte ha osẽ Matías. He’i voi ningo Jesús umi apóstolkuérape: “Peẽ nda che poravói va’ekue chéve. Che poiporavo vaekue peẽme.”

Ko árape avei ñanemandu’a hína Paraguái isãsóramo guare Espáñagui, ou haguã oiko mbeguekatúpe peteĩ tetã ijeheguíva ambue tetãnguéra apytépe. Ko’ẽro katu ñanemandu’a hína ñande sykuéra rehe. Tuichaite mba’e pe ñane retã, ñande róga korapy guasúicha ojepysóva, ha ñande sy, pe ñande roga’ípe akóinte oimémiva ñanera’arõ, oma’ẽ ha ñande rovasa mborayhu pópe. Ñane retã ha ñande sy ndoje’ói ñane ángagui araka’eve.

Ñandejára ñande rayhúgui ome’ẽ ñandéve, ñande rekove ndive, heta mba’e ndajaiporavóiva. Umíva apytépe oime hína ñane retã, ñande válle, ñande rekoha, ñane ñe’ẽ, ñane hénte kuéra ha ñande sy. Ha hetave mba’e porã tapére jaikóvo jahecha ramo ha jahayhúva. Ha Jesús he’i pe mborayhu tuichave oñandúva ome’ẽ hekove umi ohayhúvare.

Upéicha ojapo upe sy imembykuéra ndive, ha upéicha avei ojapo upe ohayhúva hetãme. Ha mba’éichapa ko’ã ára ñaimévape jahechauka va’erã pe tetã rayhu añete, ha ñande rapicha, ñane retãgua rayhu. Mba’épa rehecha ha reñandu che reindy ha nde che irũ.

Pa’i Alberto Luna.