Ñahendu Jesús. Miércoles 4º Pascua

Escucha el evangelio y la reflexión en: https://youtu.be/9x8DD_cTesI

MIERCOLES 4º PASCUA San Juan 12, 44 – 50

Upérõ Jesús he’i umi hudíokuérape: — Upe che rehe ojeroviáva, ndaha’éi che rehe añónte ojeroviáva. Ojerovia avei che rúre, upe che mbou vaekuére. Upe chéve che recháva, ohecha avei che mbouharépe. Che niko aju ko yvy ári ahesape haguã opavavépe.

Umi che rehe ojeroviáva ndopyta mo’ãi pytũmbýpe. Pe che ñe’ẽ ohendúva ha ndojapóivape katu, nda che mo’ãi upe ohundítava chupe. Che niko ndajúi ko yvy ári ahundi haguã avavépe, aju katu asalva haguã opavavépe. Pe ojahéiva che rehe ha ndojapóiva che ñe’ẽ, oguerekóma mávapa ohundíta chupe.

Che ñe’ẽ voi ohundíta chupe ágã ára pahápe. Che niko na ñe’ẽi che jehegui reínte. Che ru, pe che mbou vaekue, ha’e he’i chéve mba’épa ha’e vaerã ha mba’épa ambo’e va’erã. Che aikuaa umi che ru mandamiénto ojapóva oguerekotaha tekove opa’ỹva.

Upévare, che amombe’u peẽme umi mba’e che Ru he’i vaekue chéve amombe’u haguã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñapu’ã guive ñañe’ẽ ha ñañemongeta. Ñamomaitei ñande rogagua, ñañemongeta tembiaporãre jakay’u aja, jahecha mba’épa ñaikotevẽ, mba’e jajapóta. Hetaite mba’ére ñañe’ẽ ñande rapicha kuéra ndive ko’ẽ guive pyhare peve. Sapy’ánte ñañemongeta porã ha sapy’ánte katu ñañombojaru, ñane kachiãi oñondive japukami haguã, ñambohasa ha ñambovevúi haguã ñande rekove.

Ikatu ñama’ẽ ñane ñe’ẽnguére ha mba’e mba’épa ja’e ojupe. Mba’e jaheja ñande rapichakuérape ñane ñe’ẽ rupive. Ikatúko japyta vyroreípente, heta ñañe’ẽ ha ndaja’éi mba’éve ideprovéchova ñande rapichápe. Tuicha ñande ayvu ha láta pararã reipe ñasẽ
ndaijapytéigui umi ñane ñemongeta.

Jesús he’i ñandéve ha’e noñe’ẽiha ijehegui reínte. He’i omombe’uha itúva ombo’e va’ekue ichupe. Jesús niko oikuaa itúva ñe’ẽ ome’ẽha tekove opa’ỹva, ha upévare ha’e omombe’u umi mba’e Túva Ñandejára he’i va’ekue ichupe.

Ñande avei che irũ ha che reindy jareko ñande rekovépe umi mba’e Ñandejára ome’ẽ va’ekue ñandéve, umi mba’e porã Ñandejára ojapo vaekue ñande rekovépe, umi mba’e ha’e oñanduka vaekue ñandéve. Ha ñande rapichakuéra ojeroviáva avei oreko heta mba’e porã Ñandejára ome’ẽva ichupekuéra ha ikatúva omombe’u ñandéve. Ha upéicha ñañemongetávo ñande jeroviáre ñande ñambohasa ojupe pu’aka. Ñañomokyre’ỹ Jesús rapére, jakakuaa oñondive tekove añetépe.

Naiporãi ñañongatu umi mba’e Ñandejára ñanembo’éva ha ome’ẽva ñandéve. Umíva niko ñamombe’u haguã oñeme’ẽ ñandéve. Jajapo katu Jesús ojapo haguéicha: ñamombe’u ñande rógape, ñande rapichakuérape, ñande komunidápe mba’épa upe ñande ru yvága pegua ñanembo’e ha ojapo ñande rekovépe.

Pa’i Alberto Luna.