Ñahendu Jesús Ñe’ẽ. Domingo 29º Durante el Año

Escucha el evangelio y la reflexión en: https://youtu.be/JkUAQUQQqX4

 Domingo 29 Durante el Año Ciclo C Lucas 18, 1 – 8

Upéro Jesús omombe’u hemimbo’ekuérape peteĩ káso ohechauka hag̃ua chupekuéra mba’éichapa oñembo’e vaerã, ani hag̃ua ipy’a kangy.

Oiko va’ekue ndaje raka’e peteĩ puéblope peteĩ juez ndokyhyjéiva Tupãgui ha nomomba’éi etéva voi avavépe. Ha upépe ndaje oiko vaekue avei peteĩ viúda py’ỹinte ohóva hendápe ha he’ímiva chupe, “Ág̃a ku pléito arekóva hína oúvo ndéve, kena ehecha osẽ porã hag̃ua chéve”. Ñepyrũrã pe juez nopenái hese. Upéi katu he’i ipy’apýpe, “Ndakyhyjéi ramo jepe Ñandejáragui, ha namomba’éi ave avavépe, aipytyvõta chupe. Ỹro niko manterei ág̃a oúne che rendápe, che monguerái peve.”

Upéi katu Jesús he’ive: Pehechápa hína mba’épa he’i pe juez reko karẽ. Peẽ piko peimo’ã Ñandejára noipytyvõ mo’ãi umi ha’e oiporavo vaekuépe, ára ha pyhare oñembo’éva chupe.

Peimo’ã nga’u piko ha’e oñeha’ãrõukáne hag̃ua. Nahániri. Pya’eterei niko pene pytyvõ vaerã. Ha
ág̃a che aju jey vove yvy ári, ajuhúnepa Ñandejárare ojeroviáva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe mitã niko oiméramo oreko oipotáva ohóne ojerure asy isy térã itúvape. Noñeme’ẽiramo ichupe ha oipotaiterei ramo ikatu voi hasẽ ha oñembyasyka opoko haguã isy ha itúva py’áre. Ha ilája vaimíramo katu ojepokytýne voi yvýre, osapatea, hasẽ soro ha osapukái. Ha
péicha omohu’ũne ichupe kuéra ágã kane’õ ha kueráigui jepe ome’ẽ haguã ichupe oipotáva.

Upéicha avei oiko upe káso Jesús omombe’úvape. Ndaha’éi imba’e porãgui pe juez ome’ẽva upe ojejeruréva. Ikuerái ha ikane’õgui pe kuñakarai poriahúguinte. Pe viúda guaiguĩmi niko mba’evérõ guáicha upe karai juez aña renondépe. Mboriahu apĩgui piko mba’e onohẽta. Pe viúda poriahu katu oho ombota hokẽ ára ha ára, omokane’õ peve.

Ha péva ñanemomandu’a avei mba’éichapa umi imboriahúva, indígena, campesino, bañado gua, heta oiko vaerã mburuvicha kuéra rapykuéri oñeme’ẽ haguã ichupekuéra iderecho. Ikatu voi ãga campaña aja mba’e openaite gua’u hese kuéra umi político ivóto oraha haguãnte ha upéi hesarái.

Ñandejára katu ndaha’éi péicha he’i Jesús. Ha’e opena umi avave nopenáiva rehe. Ñandejára ndaipy’a ratãi. Ha’e ombyasy ohechávo mba’éichapa umi imboriahu ha ikangýva oñembo’yke ha upévare ha’e omoirũ ichupe kuéra ha ohendu iñembo’e.

ÑAÑEMBO’E OÑONDIVE

Ñandejára Ore Ru, nde emoirũ ha ehendúva umi ojejopy ha imboriahúva ñembo’e. Emohu’ũ ore korasõ roñandu ha rohendu haguã ore rapicha oikotevẽ ha ohasa asýva. Amén.

Pa’i Jasy.