Ñahendu Jesús Ñe’ẽ. Domingo de Cristo Rey

Escucha el evangelio y la reflexión en: https://youtu.be/Bl75aywZBik

Domingo de Cristo Rey Ciclo C Lucas 23, 35-43

Upérõ Jesús oñemosaingo rire kurusúre, opa umi oĩva upépe oma’ẽ joa hikuái hese.

Mburuvichakuéra jepe oñembohory hese, ha he’i: — Hetápeko osalva vaekue. Ha’ete voína tojesalva ha’e ramo añete pe Mesías, Ñandejára oiporavo va’ekue.

Umi soldádo avei oñembohory Jesús rehe. Oñemboja ijykére ha ho’uka chupe víno hái.

Upéi he’i: — Nde ramo añete hudío kuéra rréi, ejesalva ndete. Omoĩ hikuái peteĩ kuatia iñakã ári, he’íva, “Kóva niko hudío kuéra rréi.”
Peteĩ umi mba’e vai apoha oñemosaingóva avei hína kurusúre ijykére, oñembohory hese he’ívo: — Nde ramo upe Mesías na, ejesalva nde. Ha ore salva oréve ave.

Pe ambue katu oja’o upe hapichápe, ha he’i chupe: — Nderekyhyjéi piko Tupãgui.

Peteĩcha niko ñamanóta. Ñande niko hekópe jahasa asy hína. Oñemyengovia ñandéve ñane rembiapo vaikue. Kóva katu niko ndojapói mba’eve ivaíva.

Upéi osẽ he’i Jesúspe: — Jesús, ne mandu’amíkena che rehe ág̃a rejúvo ne rréino reheve.

Jesús he’i chupe: — Añete ha’e ndéve, ko árape reimetaha yvágape che ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

La karai rréi ningo mburuvicha guasu hína. Heta tetã ningo ko’ágã peve oreko gueteri la irréi. Ñande niko ndajarekói upéva. Ymave la jareko va’ekue ha’e umi kasíke omyakãva itávakuéra. Ha upéi ningo ou va’ekue España ñande reko ipoguýpe, ha upépe la rréi omanda va’ekue ko’ápe.

Upéinteko jajetyvyro va’ekue ichuguikuéra ave. Ha japytáma ñande ñamoĩ ha jaiporavo ñande ruvicharã. Ko árape ningo jaguerohory Cristo Rey ára. Ñandejára Jesús ñande ruvicha guasu, omandáva ñande rehe ha omyakãva ñande iglésia.

Upéva ikatu che irũ ñama’ẽmi tenonderã, oimépa Ñandejára la orreináva ñande rekovépe, térãpa mba’e la omandáva ñande rehe ha la ñanegovernáva. Mávapepa ñañakãity ha mba’e rapykueri jaiko. Ha upéi katu ñama’ẽmi. La ñande rréi ningo ikoróna ñuatĩ, ndaha’éi óro, ha la iguapyha katu ndorekói, oñemosaingo ningo kurusúre ha’e. Ha umi henondépe oĩva katu oñakãity rangue henondépe oñembohory joa hese. Mba’eichagua rréi piko nde.

He’i ningo chupe umi soldado, umi mburuvicha ha pe ijykére oñemosaingóva jepe. Ndaikatúi niko rejesalva nde voi, mba’éicha piko péicharamo resalváta avavépe.

Mba’épa he’iséne hína ñandéve che reindy ha nde che irũ la ñande rréi, la omandáva ñande rehe, péicha oñemoĩ ñanerenondépe. Mba’épa oiméne ñanembo’ese ha mamórupi oime ñanesambyhy ha ñanemboguatase hendive. Mba’épa reñandu.

ÑAÑEMBO’E OÑONDIVE
Ñandejára Jesucristo romoĩse ore rekove nde pópe ha roipota nde oregoverna. Orembo’e mba’éichapa rohayhu va’erã ore rapicha ha rome’ẽ ore rekove nde rejapo haguéicha. Amén.

Pa’i Alberto Luna.