Ñahendu Jesús Ñe’ẽ. Jueves 34° Durante el Año

Escucha el evangelio y la reflexión en:

Jueves 34° Durante el Año Lucas 21, 20 – 28

Upérõ Jesús he’i idisípulokuérape mba’éichatapa upe ára ha’e ou jeytaha: Pehechávo soldádo kuéra omongoraha Jerusalén, peikuaátama oñehunditaha.

Upévo, umi puebloha rupi oikóva, pya’e toho tokañy umi sérro pa’ũ rupi. Ha umi ñúme oĩva katu, anítei ojevy hógape. Umíva umi árape, Ñandejára okastiga rasýta opa heko vaívape, iñe’ẽme he’iháicha.

Umíva umi árape, tojererekóke kuña hye guasúva, térã imemby kambúva. Tuicha ohasa asýta hikuái. Hetáta ñembyasy tetã tuichakue, ha jehasa asy nde pohýiva oúne opavave ári. Oĩne ojejukáva, ha oĩne ojereraháva tembiguáirõ tetã ambue rupi. Pytagua opyrũ hatãne Jerusalénpe, ha’e kuéra voi oñehundi peve avei.

Ára paha og̃uahẽ vove, heta mba’e ojehu’ỹva jahecháta kuarahy, jasy ha mbyjakuéra rehe. Opa tetã rupi hénte kuéra ipy’a tarovapáne. Y katu ipochypáne opa rupi ha hyapu omondyipáne opavavépe. Héntekuéra ipy’a manombáne kyhyjégui, ohechávo umi mba’e ojehúva. Yvága katu okuchupa ha oguararáne. Umíva umi mba’e pehecha vove, che recháta chéve ajúva hína arai ári mburuvicha guasúicha. Ha ojehu vove ko’ã mba’e, pemombarete pende jerovia ha pemopu’ã pene akã. Ñandejára ipya’éta pende salva hag̃ua.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñane retã niko ohasáma heta jejopy vai pa’ũrupi. Isãso rire Españagui, jahasa va’ekue upe ñorairõ puku ñahenóiva “guerra guasu”, áño 1870pe opa vaekue. Upéi ou jey ñande ári ñorairõ Chácope, avei imandu’a ñande aguelokuéra revolución 1947gua.

Tetã Israel, Hesu retã, avei ohasa heta jejopy vai pa’ũrupi iguatápe. Upe ivaive vaekue apytépe oĩ kuri pe ñorairõ guasu hudíokuéra opu’ãramo guare áño 70pe ombohovái Romagua soldádope.

Upérõ ou Jerusalén ári General Vespasiano ha ojeity pe táva ári. Oike ojuka ha oñaka’õ otopáva hapépe. Upe Jerusalén tupao guasu upérõ ojehapy, ojeitypaite tuicha háicha ha oñemyangu’i. Ha umi hudíokuéra nomanóiva oñemosẽmbaite hetãgui ha oñemosarambi opárupi, ndahapykueréi upépe.

Jehasa asy ãichagua ou ñande ári, ndaha’éi katuete Ñandejára oipotágui. Jajei rupi mborayhu rapégui ojoapytépe ñande voi jagueru oñoakã ári umi mba’e vai ñande aho’íva ha ikatu vaerã gueteri ñane rundi. Nañahenonde’ái rupi tembiapo vai oñepyrũ vove, ñambohasánte ha ñakirirĩ. Ha upéi ndaijokohavéi.

Opáichavo Ñandejára oime opa mba’e ári. Ani ñande py’a mano. “Ivaive vove iporã aguĩ”, he’i ningo ñe’ẽ. Ha Hesu katu, ivaive jave, he’i: Pejeroviánteke ha pemopu’ã pene akã. Pya’e Ñandejára pende salváta.

Pa’i Jasy.