Ñahendu Jesús Ñe’ẽ. Lunes 32° Durante el Año

Escucha el evangelio y la reflexión en: https://youtu.be/r1gigpruMRo

Lunes 32 Durante el Año Lucas 17, 1 – 6

Upérõ Jesús he’i idisípulokuérape: Heta mba’e niko oĩ ko yvy apére ikatúva ñande reity pekádope. Upe hapichápe oitývape katu, tuicha oho vai vaerã. Oimeraẽ oitýva pekádope umi michĩ-michĩvéva jepe che rehe ojeroviávape, iporãve vaerã chupe oñeñapytĩ ramo ita guasu ijajúrare ha ojeity chupe ýpe. Cháke aipórõ, peikuaáke pejapóva.

Nde rapicha ojapo ramo ivaíva, emongavaju. Ombyasy ramo, eheja rei chupe. Ha oimérõ py’ỹi etereíma hembiapo vai oikóvo ne ndive, ou ramo ombyasy nerenondépe, eheja rei chupe.

Umi apóstol he’i Ñandejára Jesúspe: — Emombaretevéna oréve ore jerovia.

Jesús he’i chupekuéra: Oimérõ pende jerovia michĩ kytomi ramo jepe, mostása ra’ỹicha, peje kuaáta ko yvyra mátape: “Ejehapo’o ha tereho eñembo’y amo y mbytépe”, ha oikóta upe pejéva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oĩ niko ñande rapicha itirón vaíva, ipire atã jepéva ha ilája vaíva. Ndaha’éi péicha péichante ikatúva ñamboguata. Oĩ itie’ỹva ha imondáva, ijapu, imbaretéva, oĩ ojedrogáva, ika’u, ijuru atã ha ipochýva. Ha oime ombotyryrýva hapykuéri heta ikangýva ha itavýva guetéri. Heta mitã pyahu oñehundi hapykuérikuéra.

Jesús he’i ñaipytyvõ vaerãha umichaguápe. Jahechauka chupe kuéra oiméramo ivai upe ojapóva, ikatu haguãicha ohechakuaa ha ojei upe tape vaígui. Ijetu’u niko upéa hína. He’i háicha ñe’ẽ: Pe yvyra máta okakuaa karẽ va’ekue, hasýma uperire ñamopu’ã porã hagua.

Ñande rapicha ilája vai jepéva ndaha’éi ñe’ẽmente omohendátava hekove. Heta jaiko va’erã hese ikatu haguãicha opu’ã porã ha oguata hekópe. Ha upe ipa’ũme ñaime va’erã jahechakuaa haguãicha heta vése ipysyrỹitaha, ho’ataha hape tujáre. Opáichavo ohechakuaárõ ha opu’ãséramo ñaime va’erã ijykére ñaipytyvõ haguã chupe ha ñane paciencia hese.

Umi disípulo kuéra ohechakuaa ndaha’eiha vyrorei pe Jesús ojeruréva ñandéve ha ñande jeheguínteramo nañande pu’aka mo’ãiha jajapo haguã. Pya’e oñemboja hikuái Jesús re ha ojerure chupe: Emombareteve ore pype jerovia. Péicha mante ikatúta.

Mba’etekópa che reindy, ha nde che irũ. Jesús he’i ñandéve, michimínte jepe jajeroviáramo hese, ikatúta jahapo’o umi yvyra máta poguasu, ñande jehegui año ndaikatu mo’ãiva ñamovãnte jepe.

Pa’i Jasy.