Ñahendu Jesús Ñe’ẽ. Martes 32° Durante el Año

Escucha el evangelio y la reflexión en: https://youtu.be/RDunT8x5Ga4

Martes 32 Durante el Año Lucas 17, 7 – 10

Upérõ Jesús he’i idisípulokuérape: Ne rembiguái og̃uahẽvo oúvo ñúgui térã ne rymba kuérare oñangareko hágui, piko eréta chupe, “Eiképy jaguapy ha jakaru”. Nahániri. Eréta chupe, “Ejapóke chéve che karurã. Ha upéi emoĩ chéve mesápe ha’u hag̃ua. Ág̃a upe rire ekaru kuaáne”. Ha upéi ave, ndaipóri aipo jeguerohory hamba’e chupekuéra upe hembiapo ojapo haguére.

Péicha vaerã avei peẽ. Ág̃a peikopa vove pene rembiapópe Ñandejára peg̃uarã, peje va’erã, “Tembiguái reimínte niko ore, ha rojapo va’erãvante voi rojapo”.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta kuña omba’apóva okápe oguahẽvo hógape ombojopyrúnte tembiapo. Oñepyrũ va’erã ojapo tembi’u, omopotĩ koty, ojohéi ao, ombojahu mitã, ha ojohéi jey vaerã tembiporu upéi. Ndaipóri jurujái chupe guarã opu’ã guive oñeno meve.

Upéicha avei oñandu kuimba’e omba’apo pohýiva ha oguahẽva hógape tuicha kane’õre oheka pytu’u. Ivevúise tembiapo ijetu’úvagui, ha ou ohuguaitĩ problema ha mitã remikotevẽ oñemohenda va’erãva hógape.

Oiko avei sapy’a jaha Capilla pe térã comunidad pe jahekávo py’a guapy. Ñahenduse ñe’ẽ ome’ẽ va’erãva ñandéve piro’y ha ombopyahúva ñande py’a. Ha upéva rangue sapy’ánte jaha jajuhu opu’ãha ñe’ẽ, oĩha ipochýva, noñemohendáiha heta mba’e, ha jajuhu rangue py’aguapy jajuhu tembiaporã.

Oĩ niko ipochýva ko’ã mba’e renondépe, osapukáiva ha oja’óva hembirekópe, iménape, mitãme ha opa ojuhúva rehe omopẽ. Tojeíke oĩmíva haperãgui péicha jave. Ko árape ñahendu Jesús ñanekonvida ñañemoĩ haguãicha ñande rapicha renondépe pytyvõháraramo, ñaiméva ñame’ẽ haguãicha ñande jehegui ñaipytyvõ haguã opavavépe. Ndaha’éi ñaha’arõva oñeme’ẽ ñandéve ha ojecha ramo upe jajapóva. Ani jaiko ku iñate’ỹ váicha, “che jeýma” he’íva, ojehekýi ha okañývo oñemba’apóramo.

Jesús niko he’i ijehe ndoúi hague ojeservika haguã, térã oñemoĩvo avave akã ári. Umi oguatáva hendive oñeñandu va’erã avei tembiguáicha, ndaha’éi karai guasúicha.

Oñemoĩ va’erã mba’apoháraramo ndaha’éi patrón icha, tembijokuáiramo, ndaha’éi mburuvicháicha hapicha renondépe. Ha péicha hína che irũ ha che reindy. Ñande pochy ha ñarrenega rangue Ñandejára ñande jokuái joapýramo ha nomondohóiramo ñane rembiapo, jajerovia ha’e nomboguapýi chéne haguã ñande ati’y ári ikatu’ỹva jagueropu’aka.

Pa’i Jasy.