Ñahendu Jesús Ñe’ẽ. Sábado 7º Tiempo Durante el Año

Escucha el evangelio y la reflexión en: https://youtu.be/SvLGmBNbguI

Sábado 7º Durante el Año San Marcos 10, 13-16

Upérõ ogueraha hikuái mitã mimi Jesús rendápe opoko haguã hese kuéra. Umi idisípulokuéra katu omongavaju umi mitã oguerúvape.

Jesús ohechávo péva ipochy chupe kuéra, ha he’i: — Peheja umi mitã tou che rendápe.

Ani pejoko. Ñandejára Réino niko mitãme guarã ha umi mitãicha oikóvape guarã. Añete ha’e peẽme, pe ndojeroviáiva Ñandejárare ko’ã mitãicha ndoike mo’ãi Ñandejára Réinope. Ha ohupi ijyva ári umi mitã. Omoĩ ipo hesekuéra ha ohovasa.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mitã ha jagua ra’y embojaru ramo nanderejavéima, he’i ningo ñe’ẽ. Ha upéicha rupi oime ndoipotáiva voi mitã ndive mba’eve ha nopena guasúiva hesekuéra. Jesús katu imitã rayhu raka’e. Ohupi, oañua, omokunu’ũ, ohovasa, oiko heseve kuéra. Ha oikuaágui upéva umi sy ogueru hendápe imemby, Jesús ohovasa haguã ichupekuéra.

Umi apóstol katu oja’o sykuéra oguerúva imembýpe ha omondýi upévo umi mitãme avei. Oiméne he’i ichupekuéra: tapehopa ko’águi peẽ mita’i tepoti. Péicha niko ñahendu oje’éramo mitãme upérupi. Ha Jesús ipochy voi péicha he’i haguére hikuái.

Omongavaju apóstol kuérape ha he’i ani haguã ojoko hikuái umi mitã oúva hendápe. Jesús ñanembo’e umi mitã ikatumaha omoirũ ichupe, ohendu iñe’ẽ ha ojepokuaa hese.

Upévare iporã ñamboguata mitãme Jesús rapére, ha’e ojapo haguéicha. Ñame’ẽ ichupekuéra hendaguã ogapýpe, comunidápe, kapíllape. Ñambojerovia ovy’a haguã ñande apytépe. Tojepokuaa ha toikuaa ohóvo cristiano rekove ija háicha ichupekuéra.
Mba’etekópa hína che reindy ha nde che irũ ñaime upe paciencia jaiporúvo mitãre.

Ñambojeroviápa ha jahayhukuaápa Jesús ohechauka háicha ñandéve. Péichako ñañotỹ jahávo semilla porã ko’ẽramo heñói, okakuaa ha hi’a renyhẽ vaerãva Ñandejára kokuépe.

Pa’i Alberto Luna.