Ñahendu Jesús Ñe’ẽ. SAN ANDRÉS APÓSTOL ÁRA

Escucha el evangelio y la reflexión en: https://youtu.be/YwYGMqlsbvQ

30 noviembre: San Andrés apóstol ára Mateo 4, 18 – 22

Jesús oguata jave oikóvo lágo Galiléa rembe’ýre, ohecha Simón Pedro ha Andréspe. Ko’ãva niko ojoryvy, ha piráre ojeheka hikuái. Oity hína irréd ýpe. Jesús he’i chupekuéra: — Peju che moirũ. Che ahechaukáta peẽme mba’éichapa peguerúta che rendápe che irũrã.

Upepete voi oheja hikuái irréd, ha oho hendive. Ha ohomívo upégui, Jesús ojotopa Santiágo ha Juan ndive, ojoryvýva avei, Zebedeo
ra’y mokõivéva. Oĩ itúva ndive hína hikuái, ha omyatyrõ irréd kanóape. Jesús ohenói chupekuéra, ha oguejy hikuái ikanóagui, oheja itúvape, ha oho Jesús ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndaha’éi ningo opavave ñande rapicha ikatúva ombyaty ijerére hetápe. Oĩnte la isánto porãva ha ojeréva hese la hénte. Oĩ voi la ojehayhukáva, oreko kuaáva hapichápe ha upéicha ou ojepokuaa hese ha oiko hendive hapichakuéra.

Ko árape ningo ñanemandu’a hína San Andrés apóstol ára. Kóva ningo San Pedro ryke’y raka’e, ojeheka va’ekue piráre lágo rembe’ýre. Andrés niko iñepyrurã oiko va’ekue Juan Bautísta irũ nguéra ndive, pe río Jordán rembe’ýre. Ha Jesús ohóramo guare oñemongaraika Juan Bautista pórupi pe río Jordánpe niko Juan Bautista he’i hese ha’eha Ñandejára remimbou.

Upéva ohendúvo Andrés ha iñirũ San Juan oho voi omoirũ Jesús pe ha oiko ichugui pe Jesús irũ tenondetegua. Andrés niko oho upéi Pedro rendápe ha he’i chupe ojuhu hague Ñandejára remimbou ha ogueru ichupe Jesús renondépe. Ha upéicha mokõivéva opyta upe guive Jesús irũramo. Oiko ichugui kuéra apóstol, Kirito rembijokuái, omano meve.

Ha oguerúvo Jesús rendápe tyke’ýra Pedrope niko jahecháma mba’éichapa Andrés ojapo ohóvo upe Jesús he’i vaekue ichupe: Rombo’éta mba’éichapa rembyatýta chéve che irũra. Avei Jesús omongarúramo guare 5 mil héntepe, Andrés oheka ha ogueru va’ekue Jesús rendápe peteĩ mitãrusu orekóva mokõi pira ha 5 pan. Ha upévagui Jesús ojapo hetave opavavépe omongaru haguã.

Ha upéicha hína che reindy ha nde che irũ. Natekotevẽi ñambyaty hetaiterei ñande rapicha. Peteĩ teĩ jaguerúva Jesús renondépe oikuaa haguã ichupe, ha michĩmi ñamoĩva ipópe, upévagui Jesús ojapóta hína tuicha mba’e hetápe guarã.

Ikatu ñande avei, ojapo haguéicha Andrés, ñakonvida ha jagueru ñande rapicha ou haguã Jesús rendápe, oikuaa haguã ichupe, ohendu haguã iñe’ẽ. Ha uperire ijeheguíntema opytáne oiméramo Ñandejára omosã ichupe iñirũra.

Pa’i Alberto Luna.