Ñahendu Jesús Ñe’ẽ. Domingo 1º Adviento

Escucha el evangelio y la reflexión en: https://youtu.be/cmn61FFrAfY

DOMINGO 1º Adviento Ciclo C

Lucas 21, 25-28. 34-36

Upe ramo Jesús he’i idisípulokuérape: Ára paha oguãhẽ vove, heta mba’e ojehu’ỹva jahecháta kuarahy, jasy ha mbyjakuéra rehe. Opa tetã rupi umi héntekuéra ipy’a tarovapáne. Y katu ipochypáne opa rupi ha hyapu omondyipáne opavavépe. Héntekuéra ipy’a manombáne kyhyjégui, ohechávo umi mba’e ojehúva. Yvága katu okuchupa ha oguararáne.

Umíva umi mba’e pehecha vove, che recháta chéve ajúva hína arai ári mburuvicha guasúicha. Ko’ã mba’e ojehu vove, pemombarete pende jerovia.

Ñandejára ipya’éta pende salva haguã. Peiko kuaáke. Ani pekaru ha peka’úvonte peiko, térã pejepy’apy peikóvo mba’épa penohẽvéne pende rekovégui. Cháke ára paha ho’áne pende ári ñuhãicha. Avavete yvy ári oimo’ã’ỹ jave niko oúne ágã. Peñembosako’íke aipórõ.

Peñembo’e ára ha pyhare, ikatu hag̃uaicha peropu’aka opa ko’ã mba’e. Péicharõ ikatúta avei peime che ndive.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Heta mba’e ojehu’ỹva yma niko ko’ãga jahecha ha ñandepy’apy. Hakuve váicha upe ára. Ñahendu he’íva upéva oikoha ojehapypa haguére ñande ka’aguykuéra, ha nañandepiro’yvéi upéicha rupi.

Pe “cambio climático” oje’éva, tatakuáicha ombyaku yvy ape. Ñande arroyokuéra iky’apa ojepoígui ipype heta mba’e ky’a ojukapáva pira, ha ndaikatuvéi jaha jajahumi upérupi. Jakyhyjéma ñande rasypa ramo jaikérõ ýpe. Oĩ mba’asy oúva opáguio, oĩ ñorairõ heta tetãme. Ha oĩ he’íva umíva ha’émaha pe sarambi Jesús he’i va’ekue jahechataha hi’aguĩvove ára paha, fin del mundo oje’éva.

Jesús katu he’i “ko’ã mba’e ojehu vove, pemombarete pende jerovia. Ñandejára ipya’éta pende salva haguã”. Aipo ramo ñamombarete ñande jerovia, jaipe’a ñande resa, ñama’ẽ ojuehe ha ñande jerekuévo. Ñañembyaty ha ñañemongeta, ñañembo’e oñondive, jahecha mba’épa tekotevẽ jajapo oñondive ani haguã ja’a ñuhãme.

Heta propaganda jahecha omohe’ẽva ñandéve vyrésa ñaikotevẽ’ỹva ñanemosã haguã ipindáre. Ñama’ẽ va’erã, he’i ningo Jesús, ani ñanemoakãnga’u upe mba’e pota tarova. Jahecha vaerã mba’épa añete ñaikotevẽ jaiko haguã Ñandejára oipota háicha.

ÑAÑEMBO’E OÑONDIVE

Ñandejára Jesukrísto, nde ejúva hína epyta ore apytépe, aníkena eheja pararã pa’ũme ha py’a tarovágui rojavy pe grásia porãite Nde eme’ẽséva hína oréve. Amén.

Pa’i Jasy.