Ñahendu Jesús Ñe’ẽ. Viernes 28º Durante el Año

Escucha el evangelio y la reflexión en: https://youtu.be/7ARQQ9QSgFw

Viernes 28 Durante el Año Lucas 12, 1 – 7

Heta niko upérõ umi ojerepáva Jesús rehe, ha oñomyañamba hikuái. Jesús he’i idisípulokuérape: Peñeñangarekóke umi fariséo rova mokõigui. Cháke tuicha pene mbotavýne.

Ndaipóri niko mba’eve oñemíva hína, ojehecha’ỹ vaerã. Ha ndaipóri mba’eve okañýva, ojekuaa’ỹ vaerã. Upévare, opa mba’e peẽ pejéva pytũháme, oñehendúne ára sakãme. Ha umi mba’e pejéva koty ñembotypýpe katu opavavete oúne ohendu ha oikuaa.

Che irũnguéra, ani pekyhyje avavégui. Oime va’erã niko umi ikatúva pende rekove oipe’a pende hegui. Upéi katu, mba’evéma ndaikatúi ojapo pende rehe. Ta’e peẽme mávaguipa pekyhyje va’erã. Pekyhyje Ñandejáragui. Ha’e ikatu oipe’a pende hegui pende rekove, ha upéi ave, pene mondo kuaa Aña retãme. Chugui pekyhyje va’erã.

Ndojejoguái nga’u piko 5 guyra’i níkel mbovymíre. Péicharõ jepe, Ñandejára ndahesaráiri chugui kuéra. Péichante avei peẽ. Pene akãrague peteĩ-teĩ jepe niko Ñandejára oikuaa. Ani aipo ramo pekyhyje avavégui. Peẽ niko tuichaiteve mba’e hína guyra’i kuéragui.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

He’íva ningo ñe’ẽ: “Arribeño ha tóro mócho igólpe mante ñañandu”. Ha upéva ningo oje’éva jepi umi tapicha ndajaikuáaiva mba’eichaguáva oúramo oike ñande apytépe, ñande vállepe, térã ñande rógape. Kañyhápe ha pytũmbýpe ojapóva ohóvo
iñuhã, ha amo ipahápentema ñañandu mamópa ombeti, ñande reity ha osarambi apo ñande rehe.

Ha péva ningo upe Jesús he’íva ijapóstol kuérape oñeñangareko haguã Herodes ha umi fariseokuéragui, ndaha’éiva hína pohã ro’ysã ha iñensuguýva. Ijapéguio ha’e kuérantema la isantuláriova, itupao rayhúva, omyakãva ñembo’e ha mba’e. Ha ikupéguio katu oha’ãva chupekuéra ipy ha ipópe, oity haguã Jesús ha iñirũnguérape iñuhãme.

Péva pe tova mokõi oiméva avei umi tapicha ojeroviáva Ñandejára rehe apytépe, ha tupao ryepýpe avei, he’i Jesús, peteĩ levadúra vai oúva upéi ombyaipa pe comunidad.

Ñande apéguio jahechaukáva ha ñande juru rupi ja’éva ndaha’eiete upe ñande rekovépe jajapóva. Ótro ladoite ojapi. Heta vése niko oñeñomi mba’e hendape’ỹ oikóva ñande Iglésia apytépe, jakyhyjégui, nañamongy’aséigui ñande tupao réra hamba’e. Jesús katu
he’i ndaipóri vaerãha mba’e ñemi hendape’ỹ ñañongatu ha jaguerokirirĩva. Ha umi tembiapo vai ñemihãme oĩva ojekuaapa va’erãha amo ipahápe.

Ani jakyhyje, he’i Jesús, ja’e haguã añeteguáva. Ikatu oime ipochýva ñanendive ha ñandepersegíva. Ñandejára katu, oñangarekóva guyra’íre jepe, nañandereja rei mo’ãi, he’i Jesús. Ichugui jakyhyjeve va’erã ha ani ñañomi ñande avei añeteguáva ha ñamo’ã
mo’ã Aña rembiapokue.

Pa’i Jasy.