Ñahendu Jesús. Sábado 3º Pascua

Escucha el evangelio y la reflexión en: https://youtu.be/eo7322SGLYc

Sábado 3º Pascua San Juan 6, 60 – 69

Upérõ heta oĩ Jesús disípulokuéra apytépe ohendúva umi mba’e Jesús ombo’e vaekue. Osẽ he’i hikuái: — Ko’ã mba’e he’íva niko ijetu’u etereíma. Mávaiko openáta hese.

Jesús ohecha kuaa ndo’aporãiha umi mba’e he’íva idisípulo kuéra apytépe. Upévare he’i chupekuéra: — Ko’ã mba’ére piko pembopo’ise. Mba’e pejapóne che rechárõ ajupi jey ramo yvágape aju haguégui. Ñandejára Espíritu niko pe ñane moingovéva, ñande ro’o katu
naiporãi mba’everã. Opa umi mba’e che amombe’úva peẽme niko ogueru peẽme Ñandejára Espíritu ñane moingovéva. Oĩ jepe gueteri pende apytépe ndogueroviáiva umi mba’e che ha’éva.

Iñepyrũmby guive voi niko, Jesús oikuaa va’ekue máva-mávapa umi ndojerovia mo’ãiva hese. Oikuaa ave mávatapa hína upe otraisionátava chupe. Upéi katu he’i chup kuéra:— Upévare niko che ha’e peẽme, avave ndou mo’ãiha che rendápe, ndohejái ramo chupe
che Ru.

Upe guive, heta oĩ umi hendive oiko vaekue ombopo’íva, ha ndoikovéi hendive. Jesús oporandu umi 12 idisípulokuérape: — Peẽiko pehopáta avei.

Simón Pedro he’i chupe: — Maéstro, máva rendápe nga’u piko rohóta. Ne ñe’ẽ niko ñane moingove. Ore niko roguerovia umi mba’e eréva, ha roikuaa ndeha hína Ñandejára ra’y marangatu.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jaiko porãse ningo ñande rapichakuéra ndive. Hi’ã ñandéve opavave ñande rayhu ha oñe’ẽ porã ñande rehe. Opáichavo jaikuaa upéva hasyha. Jahecha peteĩvape ogustáva ambuépe naiporãi, peteĩvape añetéva ambuépe japu. Ha péicha jaiko, nañame’ẽi gusto
opavavépe, he’i háicha ñe’ẽ.

Jesús rapykuéri oho heta tapicha ohecháva umi mba’e hechapyrãva ha milágro ojapóva. Omongaru rire hetápe ou joa hapykuéri hikuái, ojaposéma chugui mburuvicha.

Upépe Jesús he’i chupe kuéra ani haguã iñakã tarova tembi’úre, oheka haguã upe Ñandejára rembipota. Jesús he’i chupekuéra ojerovia haguã hese, ha’e ome’ẽtaha pe tembi’u añete ha’éva hete. Upe ñe’ẽ ipohýi chupekuéra. Oiméma ojetyvyro ha oñepyrũva ojeheja ichugui.
Jesús ojapose Túva Ñandejára rembipota, ha’e omombe’u pe Tupã ombo’éva chupe.

Upévare oime ramo jepe ipochýva hendive ha ojehejáva ichugui, ha’e ndoguevíri. Ha oporandu umi apóstol-pe ojehejasépa chugui avei hikuái.

Mba’etekópa che reindy ha nde che irũ, Jesús oporandu ramo ñandéve: Pejehejasépa che hegui peẽ avei. Erénepa nde ave upe Pedro he’i haguéicha Jesús pe: Ñandejára, máva rendápe piko aháta roheja ramo. Ne ñe’ẽ niko pe chemoingovéva, che ajerovia nde rehe.

Pa’i Alberto Luna.