Ñahendu Jesús. Sábado 7 de enero

Escucha el evangelio y la reflexión en: https://youtu.be/Php0H12Z5Io

7 de enero. San Juan 2, 1 – 11

Mbohapy ára rire niko oiko peteĩ ñemenda Caná puéblope, opytáva Galiléape. Jesús sy oĩ ra’e hína upépe. Jesús ha idisípulo kuérape avei oñekonvida oho haguã. Upéi katu opa sapy’a víno. Upépe Jesús sy oñemboja hendápe ha he’i chupe: — Opa niko chugui kuéra
ivíno.

Jesús he’i chupe: — Che sy, mba’éreiko chéve eju ere péicha. Ne’ĩra gueteri niko oguãhẽ pe ára aikuaaukávo opavavépe mávapa che.
Isy katu he’i umi tembiguáipe: — Pejapo he’íva peẽme.

Oĩ hína upépe 6 kambuchi y ryru, judíokuéra oiporúva oñemopotĩ haguã hamba’e. Umi kambuchípe ija amo 100 lítro kuéra rupi. Jesús he’i umi tembiguáipe: — Pemyenyhẽ ýgui umi kambuchi.

Ha hembére omyenyhẽ hikuái. Upéi katu Jesús he’i chupe kuéra: — Penohẽ michĩmi ha peraha petanteauka pende kapatápe.

Ha péicha ojapo hikuái. Pe kapata otantea pe víno ýgui oiko vaekue, oikuaa’ỹre ha’e moõguipa osẽ. Umi tembiguái katu niko oikuaa, ha’e kuéra voi oguenohẽ haguére pe kambuchígui. Upéi, pe kapata ohenói pe omendávape, ha he’i chupe: — Opa rupi niko víno iporãvéva raẽ oñeme’ẽ oje’u haguã. Oje’u heta rire ae oñeme’ẽ pe naiporãmbáiva. Nde katu niko reheja pe iporãvéva ko ipahávo.

Kóva vaekue pe milágro tenondetegua Jesús ojapo vaekue, ha Canáme. Kóicha ohechauka ipoder, ha idisípulo kuéra ojerovia hese.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Kuña ha kuimba’e omendáva niko ojoayhúgui ombojoaju hekove, ojecha ramo ha ovy’a oñondive. Ha péva oguerovy’ávo oiko karu guasu, ha ndofaltái vinomi omoirũva tembi’u ha omokyre’ỹva lo mitã. Jahecha Jesús oñekonvida isy ha apóstolkuéra ndive karu
guasu ñemenda reheguápe, ha upépe ou opa la vino.

Pe vy’a oguerúva pe menda niko ikatu avei opa, pe mborayhu ombojoajúva kuña kuimba’e ndive ikatu hýpa. Ndahetia’evéi oñondive, ikane’õ, naikyryivéi ojupe ména tembireko ndive ha oime voi ojuejáva, noiméiramo oguata ykéva.

Tupãsy hína upe ohechakuaa raẽ va’ekue opa hague víno pe fiésta hápe, ha opataha vy’a hese’ỹ. Ha apúrope oho Jesús rendápe ojerure socorro. Ha péicha che reindy ha nde che irũ, ikatu avei ñande ñañandu sapy’a opaha ñande hegui vy’a ha nahe’ẽvéi mba’eve ñande rogapýpe. Upéicha jave ikatu avei jaha ñande jajerure socorro Tupãsýme imemby ñane pytyvõmi haguã.

Pa’i Jasy.