Ñahendu Jesús. Viernes Santo
14 abril, 2022Ñahendu Jesús. Sábado 1º Pascua
22 abril, 2022
Escucha el evangelio y la reflexión en: https://youtu.be/Ydg9Hs1KQv0
Domingo 1º Pascua Ciclo ABC Juan 20, 1 – 9
Domigo pyharevete, pytũ ramo hína gueteri, María Magdaléna oho pe itakuápe Jesús oñeñotỹ haguépe. Ojuhu ojepe’a hague pe ita ombotýva pe itakua juru. Pya’e oho Simón Pedro ha ku disípulo Jesús ohayhuetéva rendápe, ha he’i chupekuéra:— Ojereraha niko Ñandejára retekue pe itakuágui, ha ndoroikuaái moõpa oñemoĩ.
Upépe, Pedro ha pe Jesús disípulo pya’e osẽ oho pe itakuápe. Odipara oho hikuái ojoykére, upéi katu pe ambue hatãve oho Pédrogui ha ha’e raẽve oguãhẽ. Ojayvy omaña pe itakuápe ha ohecha umi ao Jesús retekue ojelia va’ekuépe oĩmbaha upépe. Ha’e katu ndoikéi.
Hapykuéri katu oguãhẽ Simón Pedro, ha oike pe itakuápe. Ha’e ave ohecha umi ao.
Ohecha avei pe ao Jesús akã ojelia haguépe oñembyapu’a hague ha oñemoĩ hague ambue hendápe ha’eño. Upépe oike avei pe Jesús disípulo, pe oguãhẽ raẽve vaekue. Ha ohechávo mba’épa ojehu, ha’e oguerovia Jesús oikove jey hague. Upérõ jepe niko ndoikuaái hikuái
mba’épa he’ise ku Ñandejára Ñe’ẽme he’írõ Jesús oikove jey va’erãha.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ñane pore’ỹramo upe jahayhúvagui niko ho’a ñande ári pytũ, peteĩ ita guasu oĩ ramo guáicha ñane akã ári, ndaikatúiva jaipe’a ñane ño, nañandepu’akái ha ñande rasapáva.
Upéva hína upe oñandúva umi disípulo, kuimba’e ha kuña nguéra omoirũ vaekue Jesús pe. Omano rire opyta hikuái ityre’ỹ Ñandejáragui, oñembyasy, ndovy’ái, okañy oimoã hikuái opamaha upe Jesús omoñepyrũ va’ekue hendivekuéra.
Ñandejára katu omopu’ã Jesús pe omanóva apytégui. Oipe’a pe ita guasu ombotýva pe sepultúra ha oipe’a avei pe kyhyje ha ñembyasy umi Jesús irũ nguéra py’águi. Ome’ẽ jevy ichupe kuéra vy’a ha esperanza. Ndopái upe Jesús omoñepyrũ va’ekue.
Jahasáramo jepe che irũ ha che reindy ára pohýi ñanemokangy ha ñanembopy’a rasýva, arai hũ oúva ñande ári mba’asy vaícha, ñama’ẽ Jesús re ogueropu’aka va’ekue hetaite jehasa asy ñande rayhupápe omano meve. Ha jajerovia Ñandejára omopu’ã haguéicha Jesús pe ñemanógui jepe, ñanerenohẽtaha avei ñandéve iporãve haguãme.
ÑAÑEMBO’E TUPASÝME
María, rejajáiva ore rapépe opa araite rehechaukávo ikatuha rosẽ jejopy vaígui ha roha’arõ ára iporãvéva. Ore niko rojerovia iterei nde rehe, ha’éva tesãi hasývape guarã, kurusu ykére reñemopeteĩ va’ekue Jesús ndive ijehasa asýpe, reñemohatãvo upépe nde jeroviápe.
Ore roikuaa porã ore pytyvõtaha, rohupyty jey haguã tory ha vy’a oñondive, rohasa rire ko’ã ára pohýi ijetu’u etéva. Ne mánto guýpe roju roñemo’ã Tupãsy marangatu. Aníkena eheja rei ore ñembo’e asy rojejopy vai ete jave, ha ore pe’a kena opa mba’e vaígui, Tupãsy
marangatu, rejajái ha remimbíva. Amén.
Pa’i Alberto Luna.