Ñahendu Jesús. San Joaquín ha Santa Ana ára

Escucha el evangelio y la reflexión en: https://youtu.be/w6ZfjnGrPnY

26 de julio: San Joaquín ha Santa Ana ára Mateo 13, 16 – 17

Upérõ Jesús he’i hemimbo’ekuérape: Peẽme niko Ñandejára pende rovasa. Peẽ niko pende resa tee rupi che recha, ha pende apysa tee rupi che rendu. Añete ha’e peẽme, heta proféta ha heta imarangatúva ohechase va’ekue ko peẽ pehecháva ha ndohechái, ohenduse vaekue ko peẽ pehendúva hína ko’ágã ha nohendúi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Itapykue sapy’ánte ñande hegui ñande agüelo ha ñande agüela, iguaiguĩ ha itujave vove. Opyta jepi óga kupépe, koty’ípe. Ha’eño sapy’ánte opyta opavave osẽ jave omba’apo, oho escuela pe ha mba’e.

Ndaikatuvéima osẽ mombyry ha’eño, ymave guaréicha. Sa’íma hembiapo. Opytántema ogapýre okorre mbeguekatu, oma’ẽ iplántare, hymbamíre ha mba’e. Oĩ voi ha’eñoite anga oikóva. Oĩ opytáva asilo de ancianos pe. Ha oime avei hasy katúva ha ndorekóiva oma’ẽva hese.

Ko árape ñanemandu’a hína San Joaquín ha Santa Ana rehe. Ha’éva Tupãsy María túva ha isy. Aipóramo niko Karai Joaquín ha’éta hína Jesús agüelo ha Ña Ana ha’éta hína Jesús agüela. Oiméne ha’ekuéra oikuaa jepe Jesús pe michĩramo guare.

Oiméne katuete Tupãsy ha iména José oraha pe mitãme ijagüélo kuéra ohecha ha ohovasa haguã. Ohupíne raka’e Jesús pe hikuái, omoñe’ẽmba ha omokunu’ũ ijyva ári ha hapypa’ũme. Ajépa ningo oiméne ovy’aite hikuái pe mitãre. Ha Jesús, isy María ha itúva José ma katu ovy’áne péicha ojechávo.

Ñande agüela jepi ñande rógape oñembo’evéva ára ko’ẽre. Omyataindy ha imandu’áva opavavére santo ha Tupãsy renondépe. Ha’e niko pe ñande rovasáva, ombo’éva ñembo’e mitãme.

Oime voi oraháva ichupekuéra tupaópe. Ñande agüela avei pe ojepy’apýva mitã ikarai ha iprimera comunión haguã. Oime avei oma’ẽva mitãnguéra rehe. Omongakuaáva omenda’ỹva memby, umi ojuejáva ha ohejáva mitã agüela ndive. Oime avei ohóva omba’apo ambue tetãme ha ohejáva imemby agüela ndive.

He’i ningo Papa Francisco: “Ndaikatúi ñañe’ẽ ñane familia ha ñande rogagua rehe, ñanemandu’a’ỹre ñande agüelo ha ñande agüelakuéra rehe. Umi ituja ha iguaiguĩvéva oñangareko ha ohayhukuaa michĩvéva. Ha ñanembo’e pe ñemokunu’ũ”.

Ndépa che irũ ha che reindy, reikuaa jepe nde agüelo térã nde agüelape. Oimépa gueteri hikuái pende apytépe, térãpa oiméma Ñandejára ykére ha upéguive nde rovasa. Mba’épa oñanduka ndéve Karai Joaquín ha Ña Ana ñanemandu’ávo hese kuéra. Mba’éichapa oiméne raka’e oñeñandu Jesús ijagüelo Joaquín ha ijagüela Ana ndive. Mba’épa repensa.

Pa’i Alberto Luna.