Ñahendu Jesús. Tupãsy Asunción ára

Escucha el evangelio y la reflexión en: https://youtu.be/VKA-4xYsOhk

15 de agosto: Tupãsy Asunción ára. Lucas 1, 39 – 56

Umíva umi árape, pya’ete María osẽ oho peteĩ puéblope opytáva sérro pa’ũme Judápe. Oikévo Zacarías rógape, omomaitei Isabélpe. Ha ohendúvo María maitei, Isabel oñandu mba’éichapa pe mitã omýi hyépe.

Upépe, Isabel henyhẽ Espíritu Sántogui. Ha osẽ he’i Maríape: — Ñandejára niko nde rovasave ndéve opa kuña apytégui. Ha ohovasa ne
memby ave. Máva piko che, nde Ñandejára sy, reju haguã che rendápe. Ahendúvo nde che momaiteívo, che memby omýi vy’águi che ryépe. Ñandejára nde rovasa rerovia haguére oikotaha umi mba’e ha’e he’i va’ekue ndéve.

Ha María he’i: — Che py’aite guive amomba’eguasu Ñandejárape. Che ánga rugua guive aguerohory Tupã, che salvadórpe. Ñandejára omoĩ hesa che rehe, che niko hembiguaimínte.

Águi rire opavave he’íne chéve: «María, Ñandejára nde rovasa». Ñandejára Ipu’akapáva niko mba’e guasuete ojapo che pype. Ha’e niko imarangatu.

Ñandejára oiporiahuvereko opa ára umi chupe omomba’e guasúvape. Ha ipyapy mbarete rupive ohundi umi ojejapóvape. Poguasúpe oity iguapyhágui ha heko mirĩvape katu ohupi. Umi iñembyahýivape omyenyhẽ mba’e porãgui, ha po nandi orrepunta umi imba’e retávape.

Oipytyvõ hetã Israélpe. Oiporiahuvereko chupe ha ndahesaráiri chugui. Péicha voi he’i va’ekue ojapotaha ñande ru kuéra ypykuépe, Abraham ha iñemoñarépe.

María opyta oiko Isabel ndive mbohapy mése rupi. Upéi katu oho jey hógape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta táva ko ñane retãme niko oñembohéra Tupãsy María rayhupápe: Asunción, Concepción, Encarnación, Rosario ha mba’e. Ko árape ñaromandu’a hína Táva Paraguay, oñembohérava Asunción, oñepyrũ ramo guare Tupãsy ñande sy Asunción árape.

15 agosto 1537 ára ko’ẽme oñemopyenda raka’e Paraguay, ñande río guasu rembe’ýpe. Pe Tupãsy Asunción ñaromandu’áva ñaína niko ha’e upe ára ñande sy María omohu’ã ramo guare iguata ko yvy ári, ha ojehupi ramo guare yvágape Tupã Ñandejára pu’aka rupive.

Upépe oĩ haguã Túva Ñandejára, imemby Jesús, ha Espíritu Santo ndive, vy’a apyra’ỹme, opavave santo kuéra ndive, oma’ ẽvo ñande rehe upe guive, ñande rovasa ha ñane ra’arõvo.

Ñahendu kuri María ohóva pya’ete oñandu Isabélpe, ipríma hye guasuetéva Juan Bautístagui, ha Tupãsy katu oraha ipype Jesús pe. Ha oñuguaitĩvo hikuái, ndaje raka’e, Juan Bautista opo voi isy ryépe oñandúvo ouha María ha ipype Jesús. Isabel ma katu ohecha ramo ha omoñe’ẽmba Maríape. He’i ha’eha Ñandejára sy, kuña oguerovia hatãva oikotaha opa mba’e Ñandejára he’i va’ekue.

Ñande avei che reindy ha nde che irũ, jaguerohory ñande sy. Kuña johei pyre marangatu, iñe’é rendúva Ñandejárape ha omoirũ vaekue imemby Jesús pe oñepyrũ guive opaite peve hekove. Ha opyta va’ekue oguata haguã pe Iglesia ñepyrũmbýpe apóstolkuéra ha opavave cristiano kuéra ykére imemby rayhupápe.

Pa’i Jasy.