Ñahendu Jesús. Viernes 11º Durante el Año

Escucha el evangelio y la reflexión en: https://youtu.be/fgOX088KTQE?si=Frcz_j1ozUIx8yUu

Viernes 11º Durante el Año Mateo 6, 19 – 23

Upérõ Jesús he’i idisípulo kuérape: Ani pembyaty mba’eta rei ko yvy ári. Cháke kupi’i ho’úne térã havẽmbáne pendehegui. Térã oúne mondaha ha ogueraha. Yvágape uvei pembyaty heta mba’e.

Upépe niko ndaipóri kupi’i ha nahavẽi mba’eve. Ha upéi ave, upépe ndoikéi mondaha. Ne mba’eta oĩháme, upépe oĩta ne korasõ.

Ñande resa niko hína ñande rekove rovetã. Oĩ porãrõ, omyesakãmba ñande reko. Oĩ vai ramo katu, jaiko pytũmbýpe. Ha ndohesapéirõ pe omyesakã vaerãva nde rekove, pytũmby iñypytũvape repytáta hína.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Hi’ãgui reime porã / hetaite remba’apo / ha pirami rereko / reipotavéma va’erã. /
Nde py’a ogueraha / óga, vaka, kavaju / peicha ramo reñandu / ndepiro’ýta vaicha. /
Reju sapy’arei / rereko pe reipotáva / vy’a pave reimo’ãva / ha mba’evénte avei. /
Rehecha ramo ogaita / ku iporã porãve / ¡animo’ãkena ere / ovy’a herekoha”.
Péicha niko he’i Narciso R. Colmán, Rosicrán, ñe’ẽ poty.

Jesús he’i ani haguã jajepy’apy eterei ñambyaty haguã mba’eta. Umíva añete, he’i háicha Rosicrán, “oraha ñande py’a”. Pe jepy’apy eterei mba’e retáre Jesús ombojoja kupi’íre, okarúva ñande py’áre ha ñanemokangy. Omoinge avei ñande pype kyhyje ojepe’áramo guarã ñande hegui. Jakyhyje mondahágui, ha jaiko ñembotypy.

Pe Aña ñande reko haguã ipoguýpe ñanera’ã raẽ mba’e reta potápe. Ñanembotarova jaipota ha ñambyaty haguã heta mba’e. Omoinge ñane akãme jarekóramo mba’eta oikóta ñande hegui karai ha kuñakarai guasu, ha ñande rapichakuéra ñande apóta tuicha mba’erõ. Péa pe pinda jaisu’u ramo katu Aña ñanemosãma iku’áre ha hapykuérintema omoinge ñande pype ohóvo opaichagua mba’e vai. He’i niko
San Ignacio.

Upévare Jesús he’i pe mba’e reta pota taryrýi omohũ ñande py’a ha oity ñande ári pytũ, ikatu omongañy ñandehegui tape porã. Heta umi imba’e retáre oñemosãva hesarái hapicha remikotevẽgui. Hakate’ỹgui oñembopy’a ratã ani haguã omboja’o umi ndorekóiva ndive.

Moõpa oime ne korasõ oñemosã nde che irũ. Mba’épa che reindy upe nerakate’ỹvéva. Hetaite remuña va’ekue ha péina katu erekóma. Mba’éichapa ikatúne embyaty ehóvo mba’eta yvágape. Nde rríko, térã nde rríka haguã Ñandejára renondépe.

Pa’i Alberto Luna.