Ñahendu Jesús Ñe’ẽ. Viernes 3º Tiempo Durante el Año

Escucha el evangelio y la reflexión en: https://youtu.be/3SA6165bMyE

Viernes 3º Tiempo Durante el Año. Marcos 4, 26 – 34

Upérõ heta ijaty ohendu haguã Jesúspe, ha’e he’i chupekuéra: “Ñandejára Reino pe ojehu, ojehuháicha peteĩ kuimba’e oñemitỹva’ekuépe. Ha’e okérõ térã ipáype, pyhare térã arakue, pe semílla heñói ha okakuaa, ha’e oikuaa’ỹre mba’éichapa. Pe yvýgui niko ijehegui voi heñói raẽ upéi hakã ha upéi heta hi’a. Ha umíva hi’ajúvo oñembyaty, oguahẽmagui mono’õha ára.”

He’i avei Jesús: Mba’épepa ojogua Ñandejára Reino? Mba’épepa ñambojojáta?

Ojogua ku mostása ra’ỹime oñeñotỹva. Mostása ra’ỹigui michĩvéva niko ndaipóri.

Oñeñotỹvo katu okakuaave opa mba’e kokuépe opu’ãvagui, ha guyrakuéra jepe ou ojaitypo umi hakãre.

Upéicha Jesús oñemoñe’ẽ chupekuéra heta mbojoja ko’ãichagua rupi, ikatu haguã oike iñakãmenguéra. Ha mba’eve nde’íri chupekuéra mbojoja oiporu’ỹre. Idisípulokuérape katu omyesakã opa mba’e upe rire.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande retáramo niko ñande ñaimo’ã ñanembareteve, ha ñande resa’íramo katu ñañandu ñanekangyveha. Upévare niko oñekonvidáramo ñembo’erã, oñemboguata haguã comunidad, organización, aty pyahu, oñeporandu jepi hetápa ijaty, ha oime he’íva: Sa’i oime, mitã meme, kuñakarai ha tujánte.

Umíva umi cristiano péicha he’íva ha’eteku oipotáva ojeho tupaópe peteĩ procesiónpe jaháramo guáicha, banda ha bombapúpe pe calle mbytére. Partído hápe, fiesta, térã concentración política háperamo guáicha mba’e. Oipota heta ijaty ha tuicha hyapu.

Jesús katu he’i pe Ñandejára Reino, ñañemosãramo Jesús re jerovia rupi ha jaguatáramo ñande rapicha ndive, ndaha’éi hina tuicha pararãme jaiko va’erã. Ha’e ombojoja pe cristiano jeguata peteĩ semílla michĩmi oñeñotỹvare. Kirirĩ hápe opytáva pe yvyguýpe ha upépe Ñandejára omoheñói ha omongakuaa ijehegui.

Ñande ñaiménte va’erã che irũ ha che reindy. Jaju ha ñañemoĩ pe Ñandejára kokuépe ha’éva ñande Iglésia, ñande komunida, ñande grupo. Ñande resa’iramo jepe, ndojekuaáiramo jepe, ha mba’evéramo guáicha, jaikóramo kañymby ñande rapicha renondépe, ani upévare ñanekangy. Ñandejára omba’apo hína. Ojevale ñande rehe, ha heta mba’e porã omopu’ã, omoheñói ha ombohi’áta hína ñande ikatu’ỹ va’erã jajapo ñande jehegui.

Pa’i Alberto Luna.