ÑANDEJÁRA JESUCRISTO RETE – CORPUS CHRISTI

ÑANDEJÁRA JESUCRISTO RETE – CORPUS CHRISTI

MAITEI OÚVAPE – Saludo

Jesús oguapy haguéicha mesápe idisípulokuéra ndive, ñanekonvida avei ñandéve jaguapy ha jakaru haguã hendive. Ha upéicha ñañemopeteĩvo hendive pe tembi’u marangatu rupive Jesús oikove ñande pype. Ñamomba’e guasu Ñandejára Jesucristro ohovasa ha omboja’óva ñandéve guarã pe tembi’u porãite ñanemombaretéva.

COLECTA ÑEMBO’E

Ñandejára Jesucristo, ko mba’e guasuete imomorambývape reheja va’ekue oréve mandu’a nde Jehasa asy rehegua, eme’ẽkena oréve toromomba’e guasu hekopete umi techapyrã marangatu nde Rete ha nde Ruguy rehegua, toroñandu opa ara ore pype umi mba’e porãita nde pysyrõgui oúva.

Nde ha’éva Tupã Ñandejaraite, reikovéva ha nde pu’akapáva nde Ru ndive, Espíritu Santo ñemopeteĩme yma, ko’ágã ha opa araite.

ÑAHENDU ÑANDEJÁRAPE

LECTURA PETEÎHA:
Motivación: Éxodo kuatiápe oñemombe’u mba’éichapa Ñandejára pueblo, Moisés ndive, ojehypýi tóro ruguýpe ha upéicha ome’ẽ iñe’ẽ ojapotaha Ñandejára ley.

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 24, 3-8

Upe ramo ou Moisés ha omombe’u Israel guápe upe Ñandejára he’iukáva. Ha maymáva he’i: Rojapóta opa mba’e he’íva Ñandejára.

Upéma ramo Moisés ohai Ñandejára ñe’ẽ ha opu’ãvo pyhareve omopu’ã yvyty rembe’ýpe altar ha 12 ita ñembo’y, umi 12 Israel ñemoñare guáre.

Upéi oiporavo mitãrusu Israelgua omymbahapy ha omymbajuka haguã Ñandejárape tóro ra’y, mba’e kuave’ẽ ramo joajurã. Moisés ombohyru umi mymba ruguy mbytere, ha upe mbytere ambuépe ohypýi altar.

Upéi ohupi ipópe kuatiañe’ẽ ojehai haguépe ñe’ẽ ñome’ẽ ha ohenduka maymávape. Israelgua oĩ haguéicha he’i: Rojapóta opa mba’e he’íva Ñandejára.

Upéma ramo Moisés ohypýi upe tuguy maymáva ári ha he’i: Kóva hína tuguy ñe’ẽ ñome’ẽ rehegua Ñandejára ojapóva pene ndive, oje’eháicha ko kuatia ñe’ẽme.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 116, 12-13, 15-18
Opavave: Pe kópa ñande salváva amopu’ãne ha hérape añembo’éne.

Mba’éicha piko ikatúta amyengovia Ñandejárape
ha’e ipy’a porãite hague rehe che ndive?
Upe kópa ñande salváva amopu’ãne
ha hérape añembo’éne. O.

Ñandejára ombyasy ohechávo
omano umi hese ojeroviáva.
Tupã, che niko ne rembiguái! Che sýicha avei!
Nde upe che jora va’ekue iñapytĩmbýpe aikohágui. O.

Ahepyme’ẽta ndéve che mba’e kuave’ẽ reheve.
Nde rérape, che Jára, añembo’éta.
Ajapóne umi mba’e ha’e va’ekue Ñandejárape
opa hetãgua renondépe O.

LECTURA MOKÕIHA:
Motivación: Hebreos kuatiápe oje’e Ñandejára Jesucristo ruguy omopotĩ ñande py’apy, ha ñane korasõgui omboje’o tembiapo vai ñande reko asýva.

Ñahendúta Tupã Ñandejára Ñe’ẽ ojehai va’ekue Hebreoskuérape 9, 11-15

Che pehẽnguekuéra: Cristo katu oúma ha ko’ágã ha’e hína pe Pa’i Guasu opa ára guarãma. Tupão ha’e omba’apohápe pa’i ramo tuichave ha iporã añeteve. Ndaha’éi yvypóra rembiapokue, he’ise, ndaha’eiha ko yvy arigua.

Cristo oike upe tupaópe, ndaha’evéima oikuave’ẽ haguã kavara ra’y ha vaka ra’y ruguykue. Peteĩ jevýnte oike, ha opa ára guarãma, ha upéicha rupi ñande salva opa ára guarã.

Añete niko pe kavara ra’y ha tóro ruguykue, ha pe vaka ra’y ojehapýva altar ári tanimbukue, oñeñohẽva umi ipotĩ’ỹva rehe, ikatu omboyke Ñandejárape guarã ha omopotĩ ichupekuéra ijape guio rei. Ha umi mba’e upéicha ramo, pe Cristo
ruguykue katu piko mba’eichaite peve iporãta.

Espíritu opa ára guarã oikovéva rupi, Cristo imarã’ỹva oñekuave’ẽ Ñandejárape omano haguã. Ha pe huguy omopotĩ ñande py’apy umi mba’e ñande rerahávagui manóme, ikatu haguã ñamba’apo Ñandejára oikovévape guarã.

Upéva rehe, Jesucrísto rupi oiko pe ñe’ẽ me’ẽ ipyahúva. Imano reheve niko ha’eombogue umi angaipa ojejapo va’ekue pe ijypykuépe guare ñe’ẽ me’ẽ guýpe. Ha upéva rehe ae, umi Ñandejára ohenói va’ekue ohupity umi mba’e opave’ỹva ha’e he’i va’ekue ome’ẽtaha ichupekuéra.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SECUENCIA
Emomba’eguasu, nde salvahára pe, Sion, emomba’e guasu purahéipe
nde ruvicha ha nde Rerekuápe.
Emomba’eguasu nde katu háicha,
Ha’e niko tuichavéva opavavégui
ha araka’eve ndaikatumo’ãiva emomba’e guasupa.

Ko árape ojejerure ñandéve
Ñamomorã haguã pan ome’ẽva tekove.
Pe pan Cristo ome’ẽva’ekue hemimbo’ekuérape oñembyaty hápe hikuái oñopehenguéicha.

Ñamomba’eguasu pe mbujape kyre’ỹme, ñamomba’eguasu vy’apópe, toñehendu javy’aitereiha.

Ko árape jagueromandu’a ko karuguasu marangatu oñembopyahu hague.
Ko mburuvicha guasu pyahu renondépe, Páskua tekove pyahu rehegua
omohu’ã pe Paskua ymaguare.

Ko ñemomorã pyahu niko omyengovia pe itujávape, pe añetegua omopotĩ ñande
rekove pe mba’e rendy omyesakã iñypytũva.

Cristo ojapo va’ekue karu pyharépe he’i ojejapo jevy haguã imborayhu rehehápe.
Ñandejára Jesucrísto ñane mbo’e rupi ñamongarai pe pan ha vino oiko haguã
ichugui kuave’ẽmby ñande salva va’erã.

Ha’e niko Jerovia añetetegua Ñandejára Jesucrísto rayhupárakuérape
Pe pan ha vinogui oikóha hete ha huguy.

Nde nerehesa’ỹjói ha nderehecháivape ojehechauka porãveta ndéve jerovia rupive,
opaite mba’e oĩva yvy ape árigui.

Pe mbujape ha vino rupive, ojehechaukáva ñandéve añetegua iporãitéva.
Hete niko ha’e tembi’u ha huguy katu ñanemboy’u,
Ko’ã tembiecharã pe niko oĩ Ñandejára Jesucrísto ite voi.

Ojejapyhy ichupe añetehápe ikatu’ỹ rehe mavave omboja’o omopẽ ha ombosa’i.
Ojapyhy peteĩ, ojapyhy hetaiteve, ko’ãva ha umíva mavave ndaikatúi ho’upa.
Peteĩme guarã tekove ha ambuépe guarã katu mano imarangatu ha iñangaipáva
maymáva ojapyhy.

Iñangaipávape guarã ñemano, ha hekojojáva pe guarã tekove; ema’ẽmina mba’éichapa peteĩ tembi’u peteĩme guarã tekove ha ambuepe guarã ñemano.
Pe pan karai ojemboja’óvo, ani nde py’ã mokoĩ ne mandu’áke peteĩ teĩva pehẽnguepe oĩha Ñandejára Jesucrístoite voi.
Pe añetegua oĩ hendaitépe pe tembiecharãnte oñepehe’ã ha Cristo pu’aka ha tuichakue noñemomichivéi.

ALELUIA Jn 6, 51
Aleluia.
Che hína pe pan oporomoingovéva, oguejýva yvágagui. Upéva pe pan ho’úva
oikovéta opa ára guarã. Pe pan che ame’ẽtáva peẽme niko che rete voi hína, che
ame’ẽva opavave rehehápe, oikove haguã.
Aleluia.

EVANGELIO
Motivación: Jesús he’i idisípulokuérape ohecha haguã opa mba’e oñeikotevẽva Pascua karu guasurã. Ha upe jave oheja ñandéve hete ha huguy ñande jerovia ñamongaru hag̃ua.

Marandu porã Ñandejára Jesucrísto rekove ha hemimbo’e San Marcos omombe’u háicha 14, 12-16. 22-25
Opavave: Romomba’e guasu ndéve, Ñandejára.

Pe arete oje’uhápe pan ilevadúra’ỹva ñepyrũha árape, ha ojejukahápe pe ovecha Páskua areterã, Jesús disípulokuéra oporandu chupe: — Moõiko reipota rombosako’i Páskua ñambyarete haguã.

Upévo Jesús omondo mokõi idisípulope, he’ívo: — Tapeho Jerusalénpe. Upépe pejuhúta peteĩ kuimba’e ogueraháva hína y kambuchípe. Tapeho hapykuéri, oguãhẽ meve oikohápe.

Pe óga járape peporandúta, “Ore mbo’ehára niko oporanduka ndéve erekópa peteĩ koty ikatutahápe ha’e ombyarete Páskua idisípulo kuéra ndive.” Pe óga jára ohechaukáta peẽme peteĩ koty yvate oĩháme umi mba’e ñaikotevẽtava.

Upépe pembosako’i ñandéve ja’u va’erã.

Idisípulo oho Jerusalénpe. Ha ojuhu hikuái Jesús he’i hagueichaite chupekuéra, ha ombosako’i hikuái upépe Páskua ombyarete haguã. Ha oĩ aja hikuái mesápe, Jesús ohupi ipópe pan, ohovasa ha oipehe’ã chupekuéra.

He’i: — Kóva niko che rete.
Upéi ohupi ipópe pe víno ryru ha ohovasa. Upéi ombohasa idisípulokuérape ha opavave ho’u chugui. He’i chupekuéra: — Kóva niko che ruguy, ha hese rupi Ñandejára ombopyahu iñe’ẽ peẽme.

Kóva niko che ruguy oñeñohẽva heta rehehápe. Kóva hína ipaha ha’u pene ndive víno. Ágã Ñandejára Rréinope ñaime vove ja’úne víno pyahu.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.