SÁBADO DÉCIMA SEMANA

Ko’ágä   ñahendúta Tupã Ñandejára ñe’ẽReyes aranduka peteĩhápe oĩ háicha     

                            19, 19-21

Elías oho upe Tupã Ñandejára yvytýgui ha ojuhu Eliséope yvy ombojeréva hína. Eliseo renondépe oĩ 12 júnta guéi ha ha’e omboguata pe tapykue pegua. Elías oho hendápe ha oity hi’ári ijahoja. Upe vove Eliseo oheja hymba guéi kuéra, oho pya’e Elías rapykuéri ha he’i ichupe: Tahána ta mombe’u che ru kuérape ha upéi taha ne ndive.

Ikatu reho, he’i ichupe Elías, ha ne mandu’áke upe nde rehe ajapo va’ekue. Eliseo oho ha ojuka mokõi tóro, oipuru pe júgo jepe’a ramo, ombojy pe so’o ha omongaru hogayguápe. Upéi oho Elías rapykuéri ha opyta hembiguái ramo.

Tupã Ñandejára Ñe’ẽ.

SALMO ÑEMBOHOVÁI       15, 1-2a. 5. 7-10

R. Tupä Ñandejára, nde hína opa mba’e chéve guarã

Tupã, eñangareko kena che rehe, ne rendápe niko aguahẽ.

Ha’e ndéve: “Nde hína che Jára ndaipóri ne jojáva.”

Tupä Ñandejára, nde hína opa mba’e chéve guarã.

Nde pópe oĩ che rekove. R.

Amomba’e guasúta Ñandejárape che resape’áva,

pyharekue jepe che py’a rugua guive che moarandu.

Opa árape Tupä Ñandejárare che mandu’a,

ha’e oĩ ramo che ypýpe nda’ái chéne. R.

Upévare, che py’a rory,

che korasö ombovy’a ha py’a guapýpe aikóne.

Nda che rejái chéne amano.

Ndereheja mo’ãi ne irũme yvy kuápe ojeity. R.

ALELUIA Sal 118, 36a. 29b

Aleluia.

Che korasö emboguejy nde apoukapy rehe

ha eme’ë chéve ne remime’ë aikuaa haguä  rembiapoukapy.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       5, 33-37

Upe ramo Ñandejára he´i hemimbo’e kuérape:

Peẽ peikuaa oje’e hague pende ypykuérape yma: “Ani repyrũ ne ñe’ẽ Tupä Ñandejára renondépe reme’ẽ va’ekuére.”

Che katu ha’e peẽme: Ani peme’ẽ pene ñe’ẽ mba’evéicha vérõ. Ani yvágare, cháke upéva Tupä Ñandejára guapyha, térã yvýre, cháke upéva ipyenda. Ani Jerusalén rehe, upévako mburuvicha guasu Tupã Ñandejára táva. Pene akãre jepe ani peme’ẽ pene ñe’ẽ.

Peẽ niko ndaikatúi, peteĩ pene akãraguénte jepe pemoapatĩ térã pemohũ. Peje uvei ‘Héẽ’, térã ‘Nahániri’. Pejeve ramo, upéva ou pe ivaívagui.

Ñandejára Jesucristo Ñe’ẽ