JUEVES DÉCIMA SEMANA

Ko’ágä   ñahendúta Tupã Ñandejára ñe’ẽReyes aranduka peteĩhápe oĩ háicha              

   1Rey          18, 1-2a. 41-46

Mbohapy ára ndokỹvéi rire Tupã Ñandejára one’ẽ Elíaspe kóicha: “tereho mburuvicha guasu Ajáb rendápe ha Che amondóta peẽme ama”.

Upe marõ Elías oho Ajáb rendápe ha heí ichupe:Tereho ekaru ha he’u vino, cháke oñehendúma hína ama ryapu.

Ajab oho okaru ha ho’u vino. Elías katu ojupi yvyty Carmelo ru’ãmeha oñesüvo yvýpe ojayvy oñomi meve hova hetypy’ã pa’ũme, he’i hembiguáipe: Tereho ha ema’ẽ yguasu gotyo.

Ha’e oho oma’ẽ ha he’i: Ndaipóri mba’eve.

Elías katu he’i ichupe: Tereho 7 jevy.

Upe 7 haguépe, hembiguái he’i: Péina amo ojupi hína y guasúgui peteĩ arai che póichante tuicháva!

Upérõ Elías he’i ichupe: Tereho ere Ajábpe to jupi ikárrope ha toho ani ojoko ichupe ama.

Ajab ojupi ikárrope ha oho Jezreélpe. Upe aja pe ára oñemoypytũ arai ha yvytu reheve ha ho’a ama guasu. Elíaspe katu Tupä Ñandejára omombarete, ojeku’akua, oñani Jezreel gotyo ha oguahẽ upépe Ajab mboyve.

Tupã Ñandejára Ñe’ẽ.

SALMO ÑEMBOHOVÁI   64, 10-13

R. Romonba’e guasu Tupä Ñandejárape.

Yvy rehe reñangareko, remoakã ha remoenyhẽ ñemitỹgui.

Ysyrykuéra remoenyhẽmba,

ha péicha rembosako’i yvy ñemitỹrã. R.

Remboykue yvy ojeka’apíma va’ekue, ha rembojoja,

remohu’ũ amarayvípe,ha rehovasa tembiapokue. R.

Tembiapokue hu’ãvo heta mba’e porã regueru,

mamo rehasaha rupi opa mba’e hembypa.

Yvy iperõ va’ekue  hovyũmba, yvytýre yvyra kuéra ipotypa. R.

ALELUIA Jn 13, 34

Aleluia.

Ñandejára Jesucrisso he’i:

“Ame’ë peëme apoukapy ipyahúva:

pejoayhúke peteïva ambue ndive,

Che pohayhu háicha pejoahu”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       5, 20-26

Upe ramo Jesús he’i kóicha hemimbo’ekuérape:

Che ha’e peẽme ikatutaha peguahẽ yvágape Tupã Ñandejára  oporosãmbyhyhápe, peẽ peñeha’ãve ramo pejapo Tupã Ñandejára rembipota, umi Moisés rembiapoukapýre oporombo’évagui ha fariséo kuéragui.

Peẽ peikuaa yma oje’e hague pende ypy kuérape: “Aníke reporojuka. Pe oporojukáva oñembojovake va’erã.” Che katu ha’e peẽme: Opavave oñembojovake va’erã ipochy haguére hapicha ndive. Ha oimérõ he’íva hapichápe ‘Nde výro’ upéva ojereraha va’erã karái kuéra renondépe. Ha pe he’íva hapicháre ‘Nde aña ra’y’ upéva ohóta ochyryry aña retãme.

Upévare, rerahakuevo hína ne mba’e kuave’ẽ altárpe ha nemandu’a sapy’a nde rapicha ipy’a vaiha ne ndive, eheja ne mba’e kuave’ẽ pe altar renondépe ha tereho nde rapicha rendápe. Eñemoĩ porã raẽ hendive ha upéi katu eju altárpe ha eme’ẽ ne mba’e kuave’ẽ.

Oimérõ nde rerahaséva ñembojovakehápe, tapére ikatu aja gueteri, eñeha’ã eñemoĩ porã hendive. Upéicha’ỹrõ, pe mbojovakehára ne me’ẽta mburuvichápe, ha mburuvicha ne moingéta yvyrakuápe. Añetehápe ha’e ndéve, upégui neresẽ mo’ãi neremoengoviapái peve viru pehẽngue minte jepe ndéve hembýva.

Ñandejára Jesucristo Ñe’ẽ