MIÉRCOLES DÉCIMA SEMANA

Ko’ágä   ñahendúta Tupã Ñandejára ñe’ẽReyes aranduka peteĩhápe oĩ háicha                                  

      18, 20-39

Mburuvicha guasu Ajab ohenoiuka opa Israel guápe ha omboaty Baal maranduhárakuéra yvyty Carmélope. Upérõ Elías he’i Israel guápe: Araka’e pevépa peguata karẽta? Ñandejára ramo Tupã añetegua, tapeho hendive; Baal ramo katu, hendive peho va’erã.

Avave nde’íri mba’eve. Upérõ Elías he’i: Che ño ite hína pe Ñandejára maranduhára oikovéva gueteri, umi Baal mba’éva katu 450 voi. To ñeme’ẽ oréve mokõi tóro ra’y; ha’e kuéra toiporavo peteĩ, toipehe’ã, to moĩ jepe’a ári ha ani omboja hese tata, che katu ambosako’íta pe ambue tóro ra’y, amoĩta jepe’a ári ha ndahapy mo’ãi. Upéi peẽ pehenóita pene tupã nguérape ha che ahenóita ñande Ruvichápe ha pe tupã omboúva tata, upéva hína pe Tupã Ñandejára añetegua.

Upéva iporã, he’i joa opavave.

Upérõ Elías he’i Baal maranduhára kuérape: Peiporavo peteĩ tóro ra’y ha pembosako’i peẽ raẽ, peẽ niko pende retave. Upéi pehenói pene tupãme ha ani pemoendy tata.

Ha’e kuéra ogueraha pe tóro ra’y oñeme’ẽva ichupe kuéra ha ombosako’i, ha pyhareve guive asaje pyte peve ohenói Baálpe. He’i hikuái: “Baal, ore rendúna” ha opopo sa’i pe altar omopu’ã va’ekue jerére, ha ndaipóri ohendúva ichupe kuéra. Asaje pyte gotyo, Elías oñembohory hese kuéra ha he’i: Pesapukái hatãve ichupe. Ha’éko tupã hína, ha oime va’erã hembiapo térã oime ñañáme mba’e hína, térã osẽ oguatávo ra’e. Ikatu oime oke mba’e hína, ha tekotevẽ oñemombáy!

Ha’ekuéra akóinte osapukái ha ojekutu sa’ipa ikyse’ípe ojahupa peve huguýpe, jepiguáicha. Ohasa asaje pyte, ha ha’e kuéra akóinte osapukái ha ojeroky itarova vaicha, ka’aru mymbajuka óra peve. Noñe ñandukái avave. Avave noñe’ẽi ha nohendúi ichupe kuéra! Upe marõ Elías he’i opavavépe:

Peñe mboja ko’a gotyo.

Opavave oñemboja ha ha’e omopu’ã Tupä Ñandejára altar, oĩva yvýre. Oiporavo 12 ita, umi Jacob ra’y, Tupä Ñandejárape he’i va’ekue herataha Israel rérape, ha heseve omopu’ã altar Tupä Ñandejárape oyvyjo’o pe altar jerekuévo ija haguãicha pype 20 kílo rupi mba’e ra’ỹi, ha omoĩ rire hi’ári jepe’a, oipehe’ã pe tóro ra’y ha omoĩ hi’ári. Upéi he’i: Pemoenyhẽ 4 kambuchi y ha pehekuavo pe mymbahapy ha jepe’a ári.

Upéva ojapouka mbohapy jevy, ha upéicha ojapo hikuái. Pe y osyry altar jerekuévo ha omoenyhẽmba pe yvykua. Pe mymbahapy órape maranduhára Elías oñemboja ha osapukái: “Tupã Abraham, Isaac ha Israel Jára; eikuaauka ko árape ndeha Tupã Israel Ruvicha ha che ne rembiguái, ha ajapoha ko’ã mba’e nde ere haguére chéve! Eñeñanduka, che Ruvicha, eñeñanduka ikatu haguã opavave oikuaa ndeha Tupã Ñandejára, ha rehenoiha ichupe kuéra ou jevy haguã ne ndive!”

Upe vove Tupä Ñandejára rata ho’a, ohapy pe mymbahapy, jepe’a, ita ha yvy tĩmbo ha ombohypa pe y oĩva yvy kuápe. Ohechávo kóva opavave ojayvy omboja peve isyva yvýre, ha he’i: “Ñandejára hína Tupã, Ñandejára hína Tupã!”

Tupã Ñandejára Ñe’ẽ.

SALMO ÑEMBOHOVÁI       15, 1-2a. 5. 8. 11

R. Tupã, eñangareko kena che rehe, ne rendápe niko aguahẽ.

Tupã Ñandejára, eñangareko kena che rehe,

ne rendápe niko aguahẽ.

Ha’e ndéve: Nde hína che Jára ndaipóri nembo jojáva.” R.

Tupä Ñandejára, nde hína opa mba’e chéve guarã.

Nde pópe oĩ che rekove.

Opa árape Tupä Ñandejárare che mandu’a,

ha’e oĩ ramo che ypýpe nda’ái chéne. R.

Nde rehechaukáne chéve jeikove rape.

Ne rendápe aime ramo vy’águi che moenyhẽne.

Nde ypýpe vy’a ndopáiva. R.

ALELUIA Sal 24, 4b.5a

Aleluia.

Tupä Ñandejára ehechauka mína chéve umi nde rape,

che mboguata tape vy’a reheguáre.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       5, 17-19

Upe ramo Jesús he’i hemimbo’e kuérape:

Ani peimo’ã che aju hague amboyke haguã Moisés rembiapoukapy térã umi mba’e maranduhára kuéra oporombo’e va’ekue. Che ndajúi amboykévo umíva, aju umíva ojehupa haguã heko itépe. Añete ha’e peẽme, yvága ha yvy oĩ aja, mba’evete asy ndojepe’a mo’ãi Moisés rembiapoukapýgui, ojehupa peve umi mba’e ipype oĩva.

Upévare, upe omboykéva Tupã Ñandejára rembiapoukapy ha ojapo’ỹva pe michĩvéva jepe, ha oporombo’éva péicha ojejapo haguã, upévata pe michĩvéva Tupã Ñandejára oporosãmbyhyhápe yvágape. Upe Tupã Ñandejára  rembiapoukapy ojapo ha oporombo’éva katu, tuicháta Tupã Ñandejára oporosãmbyhývo yvágape.

Ñandejára Jesucristo Ñe’ẽ.