MARTES DÉCIMA SEMANA

Ko’ágä   ñahendúta Tupã Ñandejára ñe’ẽReyes aranduka peteĩhápe oĩ háicha           

                            17, 7-16

Nda hetái ára rire katu hypa pe ysyry, maranduhára Elias hoỹ’úvagui ndokýigui upe tetãme. Upe marõ Tupä Ñandejára he’i Elíaspe: “Tereho táva Saréptape, tetã Sidón pegua, ha epyta upépe. Ha’e kuri peteĩ kuñáme imenave’ỹva oikóva upépe, ne mongaru haguã.”

Elías oho Saréptape. Oikévo pe távape ohecha peteĩ kuña imenave’ỹva ombyatýva jepe’a. Ohenói ha he’i ichupe: Erumi chéve y hay’u haguã.

Ohóma oguerúvo ha Elías ohenói jevy ha he’i ichupe: Erumi avei chéve peteĩ mbuja chipe.

Ha’e he’i ichupe: Tupã nde Jára rehe ame’ẽ ndéve che ñe’ẽ, ndarekoiha mbuja. Peteĩ po renyhẽ trígo ku’i ha ñandyry michĩmínte areko. Amboaty hína jepe’a aha haguã ambojy che membýpe ha chéve guarã. Ro’úta ha upéi romanóta ñembyahýigui.

Elías he’i ichupe: Ani rekyhyje. Tereho katu ejapo pe eréva. Ejapo raẽ peteĩ mbuja chipe chéve guarã ha eru chéve, ha upéi rejapóta ndéve ha ne membýpe guarã. Tupã Israel Jára niko he’i ndopa mo’ãiha nde trígo ku’i ha ne ñandyry, Tupä Ñandejára omongy jevy peve yvy ári.

Pe kuña oho ha ojapo upe he’i va’ekue ichupe Elías, ha ha’e, imemby ha Elías oguereko hembi’urã heta árape guarã. Ndopái pe trígo ku’i térã pe ñandyry, he’i haguéicha Tupä Ñandejára Elías rupi.

Tupã Ñandejára Ñe’ẽ.

SALMO ÑEMBOHOVÁI    4, 2-5. 7-8

R. Tupä Ñandejára ehechauka oréve nde rova mimbipa.

Tupã Ñandejára che pytyvõhára, ehendu che ñembo’e.

Nde ku ajejopy vai ramo che mbopy’a guapýva.

Che poriahuvereko kena ha ehendu ko che Ñe’ẽ.

Peẽ poguasu kuéra, araka’e peve piko pe che ñe’ẽ apíta? R.

Peikuaáke Ñandejára ombojeroviaha umi hese ojeroviáva.

Ha’e, che rendúne katu ete ichupe añembo’évo.

Pekyhyjéke ha anive pejapo ivaíva.

Peikóke kyhyje pópe ha anive pene rembiapo vai. R.

Heta oĩ he’íva: “Máva piko ñane mbovy’áta?”

Emaña ore rehe ore Jára.

Nde rupi niko che avy’ave umi heta mba’e oguerekóvagui. R.

ALELUIA Mt 5, 16

Aleluia.

Péicha aveíke pehesape va’erä maymave renondépe

pe tesape oïva pende pype,

upéicha ramo umi yvypóra ohecháta pene rembiapo poräha

ha pemomba’e guasu Tupä ñande Ru oïva yvágape.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                        5, 13-16

Upe ramo Jesús he’i hemimbo’ekuérape:

Peẽ niko jukýicha hína ko yvy ári. Juky nahe’ẽvéi ramo niko ndaikatu véima oñemohe’ẽ jevy, naiporã véima mba’everã. Upévare, okápe oñemombo ha oñepyrũmba hese.

Peẽ niko mba’e rendýicha hína ko yvy ári. Peteĩ táva oĩva yvyty ru’ãme niko ndaikatúi ndojehecháivo. Avave niko nomyendýi mba’e rendy ha upéi omoĩ mbayru guýpe térã tupa guýpe. Yvate katu oñemoĩ, ohesape haguã óga ryepýpe oĩvape. Péicha aveíke, peñeha’ã peẽ pehesape opavave renondépe. Ha ha’e kuéra ohechávo pene rembiapo porãngue, omomba’e guasúta pende Ru, yvágape oĩvape.

Ñandejára Jesucristo Ñe’ẽ