SÁBADO SEMANA XIX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe     4, 7-16

Che pehẽnguekuéra:

Cristo niko ome’ẽ ñandéve, peteĩ teĩme ñane mba’erã, pe imba’e porãngue tuicha itévagui. Upévare Tupä Ñandejára ñe’ẽ he’i: 

Ha’e ojupírõ yvágape heta iñapytïmby ogueraha va’ekue, ha yvypórape heta mba’e ome’ẽ. 

Ha mba’épa he’ise “ha’e ojupi yvate”? Upéva he’ise, ha’e oguejy raẽ hague yvy guýpe, ipypukuvehápe. Ha upe oguejy va’ekue  niko upe ha’e jevýnte ojupi va’ekue  yvágape, ijyvatevehápe. Ha’e voi, oĩ ome’ẽvape oiko haguã apóstol ramo ha ambuépe katu maranduhára ramo. Oĩ omoĩva omoherakuã haguã pe marandu porã, ambuépe katu oisãmbyhy haguã umi Tupã Ñandejárare ojeroviávape ha ombo’e haguã ichupe kuéra. 

Ha’e péicha ojapo ombosako’ívo umi Tupã Ñandejára mba’évape omba’apo haguã hapicha kuéra rehehápe, omombarete haguã Cristo rete. Péicha, jajoajupáne peteĩcha ñande jeroviápe ha peteĩcha jaikuaáne Tupã Ñandejára Ra’ýpe. Jakakuaapáne ha ñane tyarõ mbáne jahupity peve Cristo tuichakue. 

Ndajaiko mo’ã véima mitãicha jajererekóva águio pégotyo, térã jaje rerotyryrýva opa gotyo, ñahendúvo mba’e pyahu ombo’éva umi ñane mbotavyséva, ha ojavy va’ekue  hape. Upéva rangue katu, jaikóvo añetegua ha mborayhúpe, jakakuáke opa guio jahupity haguã Crístope. Ha’e niko hína pe iglésia akã, ha ipoguýpe pe iglésia, ku ñande retéicha, opa mba’e hendápe oĩ porãmba, ha ojoajupa ojuehe. Ha opa mba’e oiko porã ramo pe oĩháme, pe Cristo iglésia imbareteve ohóvo mborayhúpe. 

Tupã Ñandejára Ñe’ẽ.

SALMO ÑEMBOHOVÁI    121, 1-5

R. Vy’ápe jaha tupaópe, Tupä Ñandejára rógape.

Avy’a ite chéve oje’e ramo: “Jaha Tupä Ñandejára tupaópe”. 

Jerusalén! ne rokẽmema roñembo’y,ne rokëme, Jerusalén. R.

Jerusalén niko táva neporãva, oñemopu’ã porã itéva. Upépe ojupi Israel ñemoñareguakuéra, 

Tupä Ñandejára ñemoñare. R.

Tupä Ñandejára réra omomba’e guasúvo, ojeheja haguéicha ichupe kuéra tembiapoukapy ramo. 

Upépe oguapy mburuvicha guasu David rogagua, tekojojápe oporombojovake haguã. R.

ALELUIA. Ez 33, 11

Aleluia. 

Ñandejára Jesucristo he’i:

“Che ndaipotái umi hembiapo vaíva omano,

to jevy uvei hembiapo vaikuégui ha toikove”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                             13, 1-9

Umíva umi árape avei, oĩ ohóva ohecha Jesúspe, ha omombe’u ichupe mba’éichapa Pilato ojuka kuimba’e kuéra Galiléa guápe omba’e kuave’ẽ jave hikuái Tupã Ñandejárape. Jesús he’i ichupe kuéra: “Peimo’ãpa peẽ upéva ojehu hague umi Galiléa guápe, ha’e kuéra iñangaipa hetave hague ambuégui upe tetãme? Ha’e peẽme nahániriha, ha peẽ voi ndapejevýirõ Tupã Ñandejára gotyo, pemanóta avei. 

Peimo’ã piko peẽ umi 18 omano va’ekue  ako ho’a ramo hi’ári kuéra Siloé pegua óga yvate, hembiapo vaive ra’e umi ambue Jerusalénpe oikóvagui? Ha’e peẽme nahániriha; ha peẽ voi ndapejevýirõ Tupã Ñandejára gotyo, pemanóta avei.” 

Jesús omombe’u ichupe kuéra ko ñe’ẽ mbojoja: “Peteĩ kuimba’e oguereko va’ekue  peteĩ ígo iparraltýpe, ha oho ohecha hi’apa, ha ndojuhúi mba’eve. Aipórõ he’i pe parralty ñangarekohápe: ‘Ma’ẽ, mbohapy áño pukukue aju ko igo’akue arahávo, ha araka’eve ndajuhúi. Eikytĩ mba’e, ma’erã piko omboai reíta hína ko yvy?’ Pe parralty ñangarekoha katu he’i ichupe: ‘Che jára, eheja gueterína peteĩ áño. Ahapyatýta ha amoĩta hese pohã omopu’ã porãva. Hi’a ramo iporã, ha upéicha’ỹrõ reitýne.’” 

Ñandejára Jesucristo Ñe’ẽ