SÁBADO SEMANA XVI TO

Ko’ágä   ñahendúta Tupã Ñandejára ñe’ẽ Jeremías arandukápe oĩ háicha               7, 1-11

Tupã Ñandejára he’i Jeremíaspe: “Eñemoĩ tupao rokẽme ha emomarandu upépe ko ha’éva ndéve: Mayma Judagua peikéva ko’ã okẽ rupi pemomba’e guasúvo Tupä Ñandejárape, pehendu ko he’ikáva Tupã Israel Jára ipu’akapáva: ‘Pemoporãve ramo pende rekove ha pene rembiapokue, pohejáta peikove ko yvýpe. Aníke perovia umi pene mbotavývape he’ívo: Ápe oĩ Tupä Ñandejára tupao! Ápe oĩ Tupä Ñandejára tupao!

Pemoporãve ramo pende rekove ha pene rembiapo ha pende rekojoja ramo oñondive, ndapejopýi ramo mombyrygua, tyre’ỹ ha kuña iména manóva ndive, ndapejukái ramo ko’ápe tapicha hembiapo vai’ỹvape, napemomba’e guasúi ramo tupã ambue kuérape ivaíva mante peẽme oguerúva, pohejáta peikove ko yvy ame’ẽ va’ekue  opa árapeve guarã pende ru kuéra ypykuépe.

‘Peẽ pejerovia ñe’ë  japu ha výro reíre. Pemonda, pejuka, peiko kuña pene mba’e’ỹva ndive, peme’ẽ japu pene ñe’ẽ, peikuave’ẽ insiénso Baálpe, pemomba’e guasu tupã mombyrygua peikuaa’ỹvape, Ha upéi peju ko tupao che mba’évape peñemoĩvo che renondépe. Peimo’ã ko’ápe peimetaha kyhyje’ỹre. Peimo’ã ikatuha akóinte pejapo umi mba’e che mbopochýva. Peimo’ã piko ko tupao, chéve oñemopu’ã va’ekue , ha’eha mondaha kuára? Che ahecha opa ko’ã mba’e. Che, opa mba’e Jára, upéicha ha’e.

Tupã Ñandejára Ñe’ẽ.

SALMO ÑEMBOHOVÁI     83, 3-6a. 8a. 11

R. Tupä Ñandejára, javy’a ite piko nde rógape.

Che py’a ite guive che ãho nde tupao róga guýre.

Che py’a ite guive hi’ãnte

chéve apurahéi Tupã Ñandejára oikovévape. R.

Guyra’i jepe ojuhu hogarã, ha mbyju’i ojaitypo haguã, nde altar

ypy rupi oja haguãme hupi’a,

Tupã, opa mba’e jára, Tupã, che ruvicha guasu. R.

Ovy’a ite va’erãpa umi nde rógape oikóva

ha opa ára nde reropurahéiva!

Ovy’a ite va’erãpa umi nde pype ojuhúva pytyvõ

oñepyrũvo oguata nde rape rupi. R.

Aikoseteve peteĩ árante jepe nde róga guýpe,

aiko rangue mil ára oimehápe rei.

Aikoseve nde róga rokẽ rerekuárõ, aiko rangue iñañáva róga guýpe. R.

ALELUIA Sant 1, 21bc

Aleluia.

Pejapyhýke py’a poräme pe Ñe’ë oñeñotÿva pende pype,

ikatúva pene pysyrö.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       13, 24-30

Upe ramo Jesús omombe’u jevy opavavépe ambue ñe’ẽ mbojoja. Ha he’i ichupe kuéra: “Tupã Ñandejára sambyhy yvágagui oúva niko ojogua peteĩ oñotỹ va’ekuépe mba’e ra’ỹi iporãva ikokuépe. Peteĩ pyharépe katu, ojekepa jave hína, oike ikokuépe peteĩ hese ija’e’ỹva ha oñotỹ ñana pe trígo apytépe, ha upéi oho. Pe trígo ty oñepyrũ opu’ã. Ha hi’ávo katu opu’ã avei umi ñana ijapytépe. Pe kokue jára rembiguái kuéra oho hendápe ha he’i ichupe: ‘Karai, pe mba’e ra’ỹi reñotỹ va’ekue  nde kokuépe niko iporã va’ekue. Mba’éicha piko péicharõ osë ko’ã ñana ijapytépe?’ Pe kokue jára he’i ichupe kuéra: ‘Oime va’erã niko peteĩ che rayhu’ỹva ojapo ra’e.’

Upépe umi hembiguái he’i ichupe: ‘Rohótapa romondóro umi ñana?’ Ha’e katu he’i ichupe kuéra: ‘Nahániri, ani ágä pemondorokuévo umi ñana, pemondoro avei umi trígo. Iporãve jahejánte okakuaa oñondive oguahẽ meve ñemono’õha ára. Upe ñemono’õha árape, ha’éta umi omba’apóvape omondoro raẽ haguã umi ñana, ha ojokua aty atýpe ojehapy haguã. Upe rire omboatýne hikuái pe trígo, ha omoĩ oñeñongatu haguãme.”

Ñandejára Jesucristo Ñe’ẽ