MIÉRCOLES SEMANA XVII TO

Ko’ágä   ñahendúta Tupã Ñandejára ñe’ẽ Jeremías arandukápe oĩ háicha           15, 10. 16-21

Áina, nde che sy! Che reru va’ekue  yvy ári año ñe’ẽ joapi ha ajeja’o haguãnte voi!

Avavépe nda iporukái ha avavégui nda iporúi va’ekue  mba’eve, ha opáichavo opavave oñe’ẽ reity chéve.

Nde reñe’ẽ ramo chéve, akarúva ne ñe’ẽre, umíva che mbovy’a ha che mbopy’a rorýva, che niko hína ne mba’e, Tupã che Jára nde pu’akapáva.

Nda jehe’aséi va’ekue  umi ovy’aháre mante oikóva ndive.

Nde reñemomba’e guive che rehe, aikóva che año, nde che moenyhẽ haguére nde pochy kuégui.

Mba’ére piko ndopavéi che mba’e mbyasy?

Mba’ére piko che jekutukue nda ikatuvéi okuera, oñepohanove ramo jepe?

Reiko niko chéve guarã ku ysyry japúicha nda iporihápe y.

Upérõ Tupä Ñandejára he’i chéve: “Reju jevy ramo che ndive, romoguahẽ jevýta, ha reiko jevýta  che rembiguái ramo.

Rejeheja ramo ñe’ẽ rei reígui ha ere ramo pe hekópe guávante, nde ha’éta upe che rérape oñe’ẽva.

Ha’e kuéra hína umi ou va’erã ne ndive, nda ha’éi nde reho va’erã hendive kuéra.

Che ajapóta nde hegui ko’ã tetã guápe guarã, peteĩ korapy yvate vrónse ikatu’ỹva ojeity.

Oñemoĩta nde rehe ha nda ipu’aka mo’ãi nde rehe, che aimétagui ne ndive roguenohẽ haguã jejopy vaígui.

Che, opa mba’e Jára, ame’ẽ che ñe’ẽ.

Tekove ahẽ pógui roipe’áta ha imbaretéva poguýgui roguenohẽta!”

Tupã Ñandejára Ñe’ẽ.

SALMO ÑEMBOHOVÁI       58, 2-4. 10-11. 17-18

R. Ñandejára, nde pepo guýpe niko añemo’ã ajejopy vai jave.

Tupã che Jára, ani rehejátei ha’a che rehe

opu’ãva pópe, ani rehejátei ha’a

hembiapo vaíva po guýpe, ani rehejátei ha’a

iñañáva pópe, ani rehejátei ha’a che jukaséva pópe. R.

Nde rehechái piko mba’éichapa omangea che rehe hikuái?

Rei ete opu’ã che rehe poguasukuéra,

ajapo’ÿre térä ha’e’ÿre mba’eve ivaíva.

Tupã Ñandejára! mba’eve hendape’ỹ niko ndajapói, R.

Tupã Ñandejára, nde rehe ajerovia.

Nde niko che mo’ã, che rehe reñangareko;

Tupã Ñandejára, nde che rayhúva, eju che pytyvõ,

ha eheja chéve ta hecha, che rayhu’ỹva oñehundi ramo. R.

Tupã Ñandejára, ndéve apurahéita pyharevekue,

ne mbaretégui rogueropurahéita, ha che poriahuverekógui.

Nde pepo guýpe niko añemo’ã ajejopy vai jave,

ha che rehe reñangareko. R.

Tupã Ñandejára, ndéve apurahéine,

amomba’e guasúne ne mborayhu ko’ë mboyve

nde rehe ajerovia ha nde che mo’ã,

ha nde hína Tupã Ñandejára che rayhúva. R.

ALELUIA Jn 15,15b

Aleluia.

Ñandejára Jesucristo he’i: “Che pohenói che irü,

aikuaaukáre peëme opa mba’e

che Rúgui ahendu va’ekue”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                13, 44-46

Upe ramo Jesús he’i opavavépe: Ñesãmbyhy Tupã Ñandejáragui oúva niko ojogua ku pláta yvyguy kokuépe oñeñotỹvape. Ou peteĩ ojuhúva pe pláta yvyguy ha oñomi jevy upepete. Upéi, vy’apópe oho ome’ẽmba opa oguerekóva ha ou ojogua pe yvy.

Ñesãmbyhy Tupã Ñandejáragui oúva niko ojogua avei peteï ñemuhára oikóva oheka ita jegua iporãvape. Ojuhúvo peteï iporãvéva oho ha ome’ẽmba opa oguerekóva ha ou ojogua pe ita jegua.

Ñandejára Jesucristo Ñe’ẽ.