SÁBADO SEMANA 23º DURANTE EL AÑO

SÁBADO SEMANA 23º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe    10, 14-22

Che pehẽnguekuéra pohayhuetéva, pejei pe ta’ãnga rei ñemomba’e guasúgui. Añe’ẽ peẽme añe’ẽ ramo guáicha tekove iñakã porãvape. Peẽ voi pehecha iporãpa térãpa ivai ko’ã mba’e ha’éva peẽme.

Jay’u ramo pe vino oñemboyke va’ekue Tupã Ñandejárape guarãgui, jajehe’a Cristo ruguýre. Ha ja’u ramo pe mbuja ñamboja’óvagui, jajehe’a Cristo retére. Ñande reta ramo jepe, opavave ja’u peteĩ mbujágui, ha upévare opavave ñande, peteĩnte.

Pema’ẽ umi Israelguáre: Umi ho’úva tymba ro’okue ojejuka va’ekue  kuave’ẽmby ramo, oĩ oñondive pe altar pegua tembiapópe. Kóvape nda’eséi pe ta’ãnga rei oimeha mba’épepa iporã, térã pe so’o oñekuave’ỹva upe ta’ãnga reípe iporãveha oimeraẽva ambue so’ógui.

Ko ha’éva niko hína, umi heko kuaaha’ỹva oimérõ ome’ẽva kuave’ẽmby ramo, ome’ẽ hína Añáme, ha ndaha’éi Tupã Ñandejárape. Ha ndaipotái peẽ pejehe’a umi Aña rehe. Ndaikatúi pey’úvo Ñandejára mbujágui ha upe jave avei mba’e pochy kaguýgui. Ha ndaikatúi peguapývo Tupä Ñandejára mesápe, ha upe jave avei mba’e Aña mesápe.

Térã piko ñambopochyse Tupä Ñandejárape? Ñane mbareteve nga’u piko ichugui ?

Tupã Ñandejára Ñe’ẽ.

SALMO ÑEMBOHOVÁI    115, 12-13. 17-18

Opavave: Tupa Ñandejára, ahepyme’ẽta ndéve che mba’e kuave’ẽ reheve.

Mba’éicha piko ikatúta amoengovia Tupã Ñandejárape

ha’e ipy’a porã itehaguére che ndive?

Upe kópa ñane renohẽva vy’a’ỹgui amopu’ãne ha hérape añembo’éne. O.

Ahepyme’ẽta ndéve che mba’e kuave’ẽ reheve.

Nde rérape, che Jára, añembo’éta.

Ajapóne umi mba’e ha’e va’ekue  Tupã Ñandejárape opa hetãgua renondépe. O.

ALELUIA Jn 14, 23

Aleluia.

Ñandejára Jesucristo he’i: “Pe che rayhúva nombyke mo’ãi che ñe’ẽ ha che Ru ohayhúta ichupe ha rohóta hendápe”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  6, 43-49

Upe ramo Jesús he’i hemimbo’ekuérape: Ndaipóri yvyra porã ikatúva hi’a vai, ha ndaipóri avei yvyra vai ikatúva hi’a porã. Yvyra máta niko jaikuaa hi’áre. Ndojepo’ói niko ígo ñuatĩ mátagui, térã parral ñana reígui.

Peteĩ ipy’a porãva, mba’e iporãvante he’i, ipy’apýpe voi imba’e porãgui. Ha upe heko añáva katu, ivaívante voi he’i, ipy’apýpe voi oĩgui ivaíva. Ha upe ipy’apýpe oguerekóvagui, upéva guinte oñe’ẽ.

Mba’ére piko peẽ peje chéve: “Karai, karai”, ha ndapejapói che ha’éva? Ha’éta peẽme mávapepa ojogua pe oúva che rendápe, ohendúva che ñe’ẽ ha ojapo upe ha’éva. Ojogua peteĩ yvypórape, ojapo haguã hogarã ojo’o raẽ va’ekue  pypuku porã, ha omoĩ pe óga pyenda ita ári.

Okakuaávo upéi pe ysyry ou ha ojejapipa pe ógare, ha nomomýiri ojejapo porãgui. Pe che rendúva ha ndojapóiva che ha’éva katu, ojogua pe omopu’ã va’ekue  hogarã yvyku’i ári reípe, ha nomopyendái. Ha okakuaávo y, ou hi’ári ha oitypaite.

Ñandejára Jesucristo Ñe’ẽ