SÁBADO TERCERO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha    9, 31-42

Upérõ Jesucristo reroviaha opa Judea, Galilea ha Samaría rupi, oiko py’a guapýpe ha okakuaa ijespíritupe. Omboaje  Ñandejárape ha Espíritu Santo oipytyvõ rupi, oñembohetave ohóvo.

Pedro oikóva ohecha oñopehẽngue Jesús reroviaha kuérape, oho avei ohechávo umi Tupã Ñandejára mba’évape, oikóva Lídape. Upépe ojuhu peteĩ kuimba’e Eneas héravape, 8 áñoma oĩva hupápe, ijapágui oguatave’ỹva. Pedro he’i ichupe: Eneas, Jesucristo ne monguera. Epu’ã emoĩ porã nde rupa.

Upe vove Eneas opu’ã. Ha maymave oikóva Lídape ha Sarónpe ohecháva ichupe opu’ã ramo, ojevy Ñandejára gotyo.

Umíva umi árape oiko táva Jópepe peteĩ kuña Jesús reroviaha hérava Tabita, griégo ñe’ẽme oje’éva Dorcas. Ko kuña ohasáva hekove ojapóvo iporãva ha oipytyvõvo oikotevẽvape. Umíva umi árape Dorcas hasy ete ha omano. Hetekue ojejohéi rire oñemoĩ peteĩ koty yvate guápe. Jope opyta Lida ypýpe, oĩ háme Pedro, ha umi Jesús reroviaha oikuaávo oĩha upépe, omondo hikuái mokõi kuimba’e he’ívo ichupe: “Eju pya’e Jópepe.”

Ha Pedro oho hendive kuéra. Oguahẽvo, ogueraha hikuái ichupe kotýpe oĩháme upe omanóva retekue, ha opa umi kuña imenave’ỹva ombojere Pédrope ha hasẽvo ohechauka ichupe umi sái ha ao Dorcas ojapo va’ekue hekovépe. Pedro omosẽ opavavépe, oñesũ ha oñembo’e. Upéi oma’ẽvo upe omanóvare, he’i ichupe: Tabita, epu’ã!

Ha’e ojesape’a ha ohechávo Pédrope oguapy. Ha’e ombohasa ichupe ipo ha omopu’ã. Upéi ohenói umi Jesús imarangatúvape ha imenave’ỹvape ha ohechauka ichupekuéra hekove. Upéva herakuã táva Jope tuichakue ha heta ojerovia Ñandejárare.

Tupã Ñandejára Ñe’ẽ.

SALMO ÑEMBOHOVÁI      115, 12-17

Opavave: Mba’éicha piko ikatúta amoengovia Tupä Ñandejárape ha’e ipy’a porãite haguére che ndive?

O bien:

Aleluia.

Mba’éicha piko ikatúta amoengovia Tupã Ñandejárape

ha’e ipy’a porãite haguére che ndive?

Upe kópa ñane renohẽva vy’a’ỹgui amopu’ãne ha hérape añembo’éne. O.

Ajapóne umi mba’e ha’e va’ekue Ñandejárape opa hetãgua renondépe.

Ñandejára ombyasy ohechávo omano umi hese ojeroviáva. O.

Tupã Ñandejára, che niko ne rembiguái!

Ne rembiguái membyre hína che!

Ahepyme’ẽta ndéve che mba’e kuave’ẽ reheve.

Nde rérape, che Jára, añembo’éta. O.

ALELUIA     Mt. 4, 4b

Aleluia.

Yvypórakuéra ndoikovéi pe mbuja añóre

Tupã Ñandejára jurúgui osẽva ñe’ẽgui uvei.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha 6, 60-69

Upe ramo Ñandejára remimbo’e kuéra ohendúvo iñe’ẽ, oĩ he’iva: Ko’ã mba’e he’íva niko hasy ñamokõ haguã. Máva piko ojapóta?

Jesús oikuaa ha’ekuéra oñe’ẽ ngururuha ko’ã mba’ére, avave he’i’ỹre ichupe mba’eve. Upévare he’i ichupekuéra: Kóva piko pene mboguevise? Mba’e piko ndojehúi chéne peẽme péicharõ, che recha ramo chéve, yvypóraicha aju va’ekue ko yvy ári, ajupi jevy ramo aju haguégui?

Tupã Espíritu niko pe oporomoingovéva, ha yvypóra rete naiporãi mba’everã. Opa umi mba’e che ha’éva peẽme niko ogueru peẽme Tupã Espíritu oporomoingovéva.Oĩ jepe gueteri pende apytépe oguerovia’ỹva umi mba’e che ha’éva.

Jesús niko iñepyrũmby guive voi oikuaa mavapa hína umi ndojerovia mo’ãiva hese, ha mávapa upe omoñuhãtava ichupe. Upéi he’i ichupekuéra: Upévare niko ha’e peẽme: avave ndou mo’ã che rendápe, ndohejái ramo ichupe che Ru.

Upe guive heta umi hendive oiko va’ekue, ko’ágã ojeheja ichugui  ha ndoikovéi hendive. Jesús oporandu umi 12 hemimbo’ekuérape: Peẽ piko pehose avei?

Simón Pedro he’i ichupe: Ore Jára, máva rendápe piko rohóta? Ne Ñe’ẽ niko umi oporomoingovéva opa árape guarã. Ore niko rogueroviáma, ha roikuaa nde ha’eha pe imarangatúva Tupã Ñandejára ombou va’ekue.

Ñandejára Jesucristo Ñe’ẽ.