VIERNES DÉCIMA SEMANA

Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha   19, 8-9. 11-16

Maranduhára Elias oguata 40 ára ha pyhare oguahẽmeve Tupã Ñandejára yvytýpe, hérava Oreb. Oguahẽvo oike peteĩ ita kuápe ha upépe ohasa pe pyhare. Tupã Ñandejára katu he’i ichupe: “Mba’e piko rejapo ápe Elías?”

Tupã Ñandejára he’i ichupe: “Esẽ okápe ha epyta eñembo’y che renondépe yvyty ári.” Upérõ ohasa Tupã Ñandejára, ha peteĩ yvytu ne ratã ha ne mbaretéva omboja’o pe yvyty ha ojoka umi ita Tupã Ñandejára renondépe; Tupã Ñandejára katu noĩri pe yvytúpe. Pe yvytu rire oiko yvy ryrýi ha Tupã Ñandejára noĩri avei pe yvy ryrýipe. Pe yvy ryrýi rire oiko tata rendy ha pe tata rendýpe noĩri Tupã Ñandejára. Tata rendy rire katu oñehendu yvytu oipeju vevýi asýva.

Ohendúvo upéva Elías oñomi hova ijahojápe ha osẽ opyta pe itakua reiképe. Upérõ ohendu peteĩ oñe’ẽva ha he’íva ichupe: “Mba’e piko rejapo upépe Elías?”

Ha’e he’i: “Ajepy’apy eterei nde rehe Tupã che Jára nde pu’akapáva, Israelgua nde reja, oity yvýre nde altar kuéra ha ojuka haguére ne maranduhára kuérape. Che ño ite apyta ha che reka hikuái che juka haguã.”

Upérõ Tupã Ñandejára he’i ichupe: “Tereho jevy katu reju hague rupi, yvy ojeiko’ỹháme Damasco pegua peve. Tereho ha emoingo Hazaélpe Siria ruvicha guasúrõ, ha Jehú, Nimsí reminenópe, Israel ruvicha guasúrõ, Eliseo Safat ra’y, Abel-Meholá guápe, emoingo maranduhára ramo ne rendaguépe.

Tupã Ñandejára Ñe’ẽ.

SALMO ÑEMBOHOVÁI 26, 7-9c. 13-14

Opavave: Ndéve niko añembo’e Tupã Ñandejára.

Ndéve añembo’e Tupã Ñandejára, che poriahuvereko kena.

Che py’a pýpe aikuaa ereha: “Peju che rendápe.”

Ne rendápe niko aguahẽ Tupä Ñandejára.

Che py’a pýpe aikuaa ereha: “Peju che rendápe.” O.

Ani che reja reítei, nde niko che Jára ha jejopy vaígui che pe’áva.

Aikuaa Tupã Ñandejára imba’e porãtaha che ndive aikove aja pukukue. O.

Pejerovia Tupä Ñandejára rehe.

Pende py’a guasúke ha ani pene ate’ỹ.

Añetehápe ha’e peẽme, pejerovia Tupã Ñandejára rehe. O.

ALELUIA Flp 2, 15d. 16a

Aleluia.

Pemimbíke umi kuarahy rata ohesape háicha yvy ape ári,

ohechaukávo Tupä Ñandejára ñe’ë orekóva Tekove.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 5, 27-32

Upe ramo Jesús he’i hemimbo’ekuérape:

Peẽ peikuaa oje’e hague yma: “Ani reporomoakã ratĩ.” Che katu ha’e peẽme: Oimeraẽ oma’ẽva peteĩ kuñáre ha oguerekose ichupe, upéva ku oiko marõ guáicha hendive ipy’apýpe.

Upévare, nde resa nde reitýtarõ angaipápe, enohẽ ha mombyry emombo. Iporãve niko oñehundi nde rete michĩ ra’ymi, aña retãme rejeity rangue nde rekovete. Ha nde po nde reitýtarõ angaipápe katu eikytĩ, ha mombyry emombo. Iporãve niko oñehundi nde rete michĩ ra’ymi, aña retãme rejeity rangue nde rekovete.

Oje’e va’ekue avei: “Oimeraẽ opoíva hembirekógui, ome’ẽ va’erã ichupe kuatia he’íva opoiha ichugui .” Che katu ha’e peẽme: “Peteĩ kuimba’e opoírõ hembirekógui, ha ndaha’éi ramo omenda’ỹ  haguére ojuehe hikuái, hese opyta ágã hembirekore oporomoakã ratĩrõ omenda jeývo. Pe kuimba’e hese omendáva, oporomoakã ratĩta avei hína.”

Ñandejára Jesucristo Ñe’ẽ