VIERNES SEMANA XVII TO

Ko’ágã ñahendúta Tupã Ñandejára ñe’ẽ Jeremías arandukápe oĩ háicha     26, 1-9

Joaquim Josías ra’y oñepyrũrõ oisãmbyhy Judápe, Tupã Ñandejára oñe’ẽ Jeremíaspe ha he’i ichupe: “Eñembo’y tupao róga guýpe ha ere opa mba’e ha’e va’ekue  ndéve ere haguã umi oúvape Judá táva kuéragui che momba’e guasu haguã tupaópe. Ani reheja ere’ỹ rehe mba’eve. Ikatu mba’éko ne rendu hikuái ha opoi heko vaígui.

Upéicha ramo nainupã mo’ãi ichupe kuéra hembiapo vaikuére, ajapo mo’ã haguéicha. Ere ichupekuéra che, opa mba’e Jára, ha’eha: ‘Ndapei kuaaséi ramo mba’eve ha nda pejapói upe ha’e va’ekue  peẽme, ha nda peikuaaséi ramo mba’eve umi he’ívagui che rembiguái maranduhárakuéra, amondo jevy jevy va’ekue  peẽme pehenduse’ỹre iñe’ỹ, ajapóta ko tupaógui ajapo haguéicha tupao Sílogui. Ajapóta ko távagui jeharu rechaukaha opa tetã ko yvy ári guápe.’”

Pa’i, maranduhára ha tetãgua kuéra ohendu ko’ã mba’e Jeremías he’íva tupaópe. Ha he’ipa vove pe Tupã Ñandejára he’i va’ekue  ichupe, pa’i, maranduhára ha tetãgua kuéra ipojái hese ha he’i ichupe: “Remanóta! Mba’érepa ere Tupä Ñandejára rérape ko tupao opytataha upe Sílope guaréicha ha avei ko táva oñehunditaha ha opytataha avave’ỹre?” Ha opavave oñemboaty tupaópe Jeremías jerére.

Tupã Ñandejára Ñe’ẽ.

SALMO ÑEMBOHOVÁI     68, 5. 8-10.14

Opavave: Tupã Ñandejára, eñe’ẽ mina chéve.

Che akã raguégui hetave, umi rei ete

nda ija’éiva che rehe;

Ko’ýte katu hetave umi rei ete che jukaséva.

Amo ipahápe ame’ẽ che rapichápe

amoengoviávo ichupe imba’e’ỹva

reheve, ku ichugui  che amonda ramo guáicha. O.

Nde rehehápe niko heta mba’e ahasa, ha ñemotĩ mante ha’u;

che ryke’y kuéra mba’eve ndoikuaaséi che hegui,

che rógape okaragua ramo aiko.

Nde tupao ahayhúgui che piru che kã,

ha nde rehe oñeñe’ẽ vai ramo, che rehe oñeñe’ẽ hína. O.

Tupã Ñandejára, ndéve niko añembo’e

reju haguã che pytyvõ.

Ne mborayhu niko tuicha, eju che nohẽ ajejopy vaihágui. O.

ALELUIA 1Pe 1, 25

Aleluia.

Ñandejára Jesucristo Ñe’ë oiko opa ára guarä.

Ko Ñe’ẽ hína oñemombe’úma va’ekue, pe Marandu Porãme.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 13, 54-58

Upe ramo oguahẽvo Ñandejára upe ha’e oikove ypy haguépe. Upépe oñepyrũ oporombo’e umi judío kuéra tupaópe. Ha opavave ohecha ramoite ichupe, ha he’i: Moõgui piko oikuaa kóva heta ite mba’e? Mba’éicha rupi piko ojapo umi mba’e hechapyrãva? Nda ha’éi piko kóva ku karpintéro, María memby? Nda ha’éi nga’u piko Santiago, José ha Judas ryvy? Ha heindy kuéra nga’u piko ndoikói ñande apytépe? Moõgui piko oguenohẽ opa ko’ã mba’e?

Ha ndo jeroviái hese hikuái. Jesús katu he’i ichupekuéra: Opa rupi niko maranduhárakuérape oñembojerovia, hógape ha oikove ypy haguépe katu nahániri.

Ha Jesús ndo japói upépe heta mba’e hechapyrãva, ha’ekuéra ndo jeroviáigui hese.

Ñandejára Jesucristo Ñe’ẽ.