DOMINGO XIX DEL TIEMPO ORDINARIO

DOMINGO XIX DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha 19, 1-8

Upérõ Ajab omombe’u Jezabélpe umi mba’e Elías ojapo va’ekue, ha mba’éichapa oñakã’o Baal maranduhára kuérape.

Upéma ramo Jezabel he’iuka Elíaspe: “Nde ramo Elías, che hína Jezabel! Ha Tupãnguéra ta che nupã rasy ndajapói ramo nde rehe ko’ẽ ramo, kóva ko óraitépe, upe rejapo va’ekue peteĩva umi maranduhára rehe”.

Elías okyhyje, oho pya’e upégui, ha osẽ haguã ivaívagui oho Beersébape, oĩva Judápe; upépe oheja hembiguái.

Upéi oho yvy ojeiko’ỹha gotyo ha oguata peteĩ ára pukukue, ha ipahápe oguapy peteĩ yvyra máta guýpe. Omanoséntema voi ha he’i: “Iporãmante che Jára!

Eipe’a katu che hegui che rekove. Chéko che rukuéraicha guánte avei!”

Oñeno pe yvyra máta guýpe ha oke. Ñandejára remimbou katu oguahẽ, ha
opokóvo hese he’i ichupe: “Epu’ã he’u”.

Elías oma’ẽ ijerekuévo ha ohecha hupa akã yke rehe peteĩ mbujape oñembojýva tatapỹi ári ha peteĩ y ryru.

Opu’ã ho’u ha hoy’u; upéi oñeno jevy. Ñandejára remimbou katu ou jevy ha opokóvo hese he’i ichupe: “Epu’ã he’u, cháke ipuku hína nde raperã”.

Elías opu’ã, ho’u ha hoy’u. Ha pe tembi’u omombarete ichupe oguata haguã 40 ára ha 40 pyhare pukukue oguahẽ meve Ñandejára yvyty Horeb peve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 33, 2-9
Opavave: Petantea ha pehecha Ñandejára imba’e porãha.

Amomba’e guasúta opa ára Ñandejárape, ichupe aropurahéita tapiaite.
Ñandejára ombovy’a che rekove.
Imboriahúva to hendu ha tovy’a! O.

Oñondive ñamomba’e guasu Ñandejárape,
héra jaropurahéi oñondivepa.
Ñandejárape añembo’e, ha’e che rendu,
ha oipe’apa che hegui umi mba’e che mongyhyjéva. O.

Umi Ñandejára rehe ojeroviáva vy’águi ojajaipáne,
ha hova noñomi chéne ñemotĩgui.
Che, tekove poriahu, Ñandejárape añembo’e.
Ha’e, che rendu ha che pe’a jejopy vaígui. O.

Ñandejára remimbou oñangareko ha oguenohẽ jejopy vaígui
opa umi hese ojeroviávape.
Petantea ha pehecha Ñandejára imba’e porãha.
Ovy’a rasa upe hese ojeroviáva. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Éfeso guápe 4, 30-5, 2

Che pehẽnguekuéra: Ani pemoñembyasy Tupã Espíritu Sántope. Heseve niko Ñandejára omoĩ va’ekue pende rehe imba’eha upe ñepysyrõ árape guarã.

Anive pende py’aro, pende pochy vai térã pende pochy rei. Ani pesapukái ojupe térã pene ñe’ẽ guasu ojupe. Peheja ñaña opaichagua. Pende py’a porã uvei ojupe, ha pejoporiahuvereko.

Peheja rei ojupe mba’e vai pejapóva ojuehe, Ñandejára oheja rei haguéicha peẽme pene rembiapo vaikue Cristo rupi.

Peiko joayhupápe Cristo ñande rayhu haguéicha, ha ome’ẽ haguéicha hekove ñande rehehápe Ñandejárape, mba’e kuave’ẽ hyakuã asývaicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 6, 51
Aleluia.
Ñandejára he’i: Che hína pe pan oporomoingovéva, oguejýva yvágagui. Upéva pe pan ho’úva oikovéta opa ára guarã.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 6, 41-51
Opavave: Romomba’e guasu ndéve, Ñandejára.

Upérõ Jesús he’i haguére “Che niko hína pe pan yvágagui oúva” oĩ judíokuéra oñepyrũva oñe’ẽ vai hese. He’i hikuái: — Kóva piko ndaha’éi Jesús, ku José ra’y.

Jaikuaa niko mávapa isy ha itúva. Mba’éicha piko ko’ágã oúta he’i oguejy hague yvágagui.

Jesús he’i chupe kuéra: — Nápy pekirirĩ. Anive pengururu. Avave niko ndoúiri che rendápe ndoguerúi ramo chupe che Ru, pe che mbou va’ekue. Ha oĩ ramo oúva, che amopu’ã jeýne chupe ára pahápe. Proféta kuéra kuatiápe niko he’i: “Ñandejára oheko mbo’éta opavavépe.”

Aipóramo, oĩ ramo ohendúva che Rúpe ha ohejáva ha’e ohekombo’e chupe, umíva oúne che rendápe.

Kóva nde’iséi oĩha ohecháva che Rúpe. Nahániri. Chénte, upe Tupãgui voi ajúva, pe ahecha va’ekue chupe, ha ndaipóri avave. Añetéko ha’e hína peẽme. Pe ojeroviáva che rehe oikovéta opa ára guarã.

Che niko hína pe pan oporomoingovéva. Pende ru kuéra ypykue niko ho’u va’ekue mana pe
desiértope, ha omano jeýnte vaekue hikuái.

Che niko añe’ẽ hína peẽme ku pan rehe oguejýva yvágagui. Maymáva ho’úva upéva nomanói chéne. Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtava peẽme niko che rete voi hína. Ha che ame’ẽta opavave rehehápe, oikove haguã.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.