VIERNES SEMANA XXVI TO

Ko’ágä   ñahendúta Tupã Ñandejára ñe’ẽ Job arandukápe oĩ háicha            38, 1. 12-21; 40, 3-5

Tupä Ñandejára oñe’ẽ Jóbpe yvytu ratã pa’ũme.

Erépa raka’e peteĩ jevy nde rekovépe, osoro haguã ko’ẽ

ha oguahẽ pyhareve?

Ha ára sakã iñasãi haguã yvy tuichakue?

Ha umi mba’e vai apohápe ojetyvyro haguã okañy hágui?

Ha upévo, ojekuaa pe yvy ape kuña aóicha omimbi.

Umi heko añávagui ára sakã ojepe’a, hembiapo vaiseha opáma ichugui  kuéra. Rehómavapa rehecha, yguasu oñepyrũha? Ha reguatámavapa yguasu ruguáre?

Ndépa rehechámava pe omanóva retã pytũ etéva rokẽ?

Reikuaa piko mba’éicha ite pevépa ojepyso ko yvy?

Ere chéve, reikuaapa ramo añete.

Nde piko reikuaa Job, mamóguipa osẽ pe ára sakã ha pe pytũ? Umívapa nde remoguahẽ kuaa opa ite henda rupi, ha rembojevy hendápe? Oiméne reikuaa, nde tujáma niko, ha oiko ypy ramo guare, niko nde reikovéma.

Mba’épa che ikatu ha’e, ko che michĩ eteíva?

Akirirĩseve uvei. Hetáma añe’ẽ, ha ndareko véima ha’e va’erã.

Tupã Ñandejára Ñe’ẽ.

SALMO ÑEMBOHOVÁI      138, 1-3. 7-10. 13-14b

R. Tupä Ñandejára che reraha kena umi nde rapérehe.

Ore Jára, nde reipyguara che reko ha nde che kuaa.

Nde reikuaa aguapy ha apu’ã ramo, mombyry guive

reikuaa upe che akãme arekóva.

Reikuaa aguata térã aguapy ramo, opa ajapóva reikuaa. R.

Ko’ẽtĩ gotyo aveve ramo aha, térã kuarahy reike gotyo

yguasu rembe’y rupi aha ramo aiko,

upépe jepe, nde che sãmbyhýne, che rehe reñangarekóne. R.

Opa che retepy ne rembiapokue,

ha che sy rye pýpe che apo ñepyrũ va’ekue .

Che mopirĩmba ha che mbojurujái upe che rehe rejapóva.

Upévare romomba’e guasu. Tuicha ite ne rembiapokue. R.

Nde niko rejapo che korasö

ha che moï che sy ryepýpe:

ame’ë ndéve aguyje che japo porä ite haguére.

¡Iporä itépa ne rembiapokue!. R.

ALELUIA Cf. Sal 94, 8a.7d

Aleluia.

Ani pemohatä pene korasö,

pehendu uvei Tupä Ñandejára ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       10, 13-16

Upe ramo Jesús he’i:

Ejererekóke nde, táva Corozaín! Ejererekóke nde, táva Betsaida. Táva Tiro ha Sidónpe ojejapo rire umi mba’e hechapyrãva ojejapo va’ekue  pende pype, ymáma ojevy va’erã mo’ã hikuái Tupã Ñandejára gotyo, ha oñemonde ao vosa kuépe ha oguapy tanimbu ári, ohechauka haguã ombyasyha iñangaipa. Tupã Ñandejára oporombojovakeha árape, peẽ peñe nupã pohyivéta umi táva Tiro ha Sidón peguágui.

Ha nde, táva Cafarnaúm, reimo’ã piko reguahẽtaha yvágape? Tupã Ñandejára uvei nde reitýta omanóva retãme! Umi pene rendúva, chéve che rendu ha pe ojahéiva pende rehe, ojahéi che rehe. Ha pe ojahéiva che rehe, ojahéi pe che mbouharére.

Ñandejára Jesucristo Ñe’ẽ