JUEVES SEMANA XXVI TO

Ko’ágä   ñahendúta Tupã Ñandejára ñe’ẽ Job arandukápe oĩ háicha                              19, 21-27

Péicha oñe’ẽ Job:

Pe che poriahuverekóna, peẽ che rayhúva, Tupä Ñandejára niko oity che ári ipo.

Mba’érepa peẽ Tupãicha peiko che rapykuéri?

Nda che su’u hetáima piko?

Oime ta mora’e ohaíva che ñe’ẽ, ha oheja fiérrore!

Oime ta mora’e kysépe ojo’óva ha ita rehe oheja che ñe’ẽ, opa ára guarãma!

Che aikuaa, oimeha oikove pe che rehe oñe’ẽtávaha, ha ha’e che pytyvõtaha ko yvy ári.

Ha okukuipa ramo jepe che pire, chete  Tupã Ñandejárape ahecháne.

Che resa ite rupi ahecháne.

Chete  na ambuéi chéne.

Tupã Ñandejára Ñe’ẽ.

SALMO ÑEMBOHOVÁI       26, 7-9c. 13-14

R. Tupä Ñandejára ani rekañy che hegui.

Ndéve niko añembo’e Tupä Ñandejára,

añembo’e ajerure hatä ndéve,

che poriahuvereko kena ha che rendu.

Che py’a pýpe aikuaa ereha: “Peju che rendápe.” R.

Ne rendápe niko aguahẽ Tuypä Ñandejára.

Ani rekañy che hegui.

Ani nde pochy che ndive.

Nde añónte niko upe che pytyvõva. R.

Ani che reja reítei, nde niko

che Jára ha jejopy vaígui che pe’áva.

Aikuaa Tupä Ñandejára imba’e porãtaha

che ndive aikove aja pukukue. R.

Pejerovia Tupä Ñandejára rehe.

Pende py’a guasúke ha ani pene ate’ỹ.

Añetehápe ha’e peëme, pejerovia Tupä Ñandejára rehe. R.

ALELUIA      Mc 1, 15

Aleluia.

Tupä Ñandejára sambyhy hi’aguïma.

Pejevy pende rembiapo vaikuégui ha peguerovia

Marandu porä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                        10, 1-12

Upe ramo Jesús oiporavo 72pe ha omondo henonderã, mokõi mokõi umi táva rupi ha mamo ha’e oho va’erãháme.

He’i ichupe kuéra: “Ajépa tuicha pe kokue ha heta hi’a, omono’õ va’erãnte mbovy. Upévare, pejerure pe kóga járape to mbou umi ou va’erãme omono’õ. Ta peho peẽ. Peikuaáke pomondoha hína ovecha ra’ýicha aguara guasu apytépe.

Ani peraha viru ha tembi’u ha pende py rehegua ave. Ha ani pepyta pe poromomaiteívo tapére. Peikévo peteĩ ógape, pemomaitei raẽ pejévo: ‘Py’aguapy ko ógape guarã.’ Ha upépe oĩ ramo yvypóra oipotáva py’a guapy, hembipota oikóne. Upéicha’ỹrõ katu, peẽme jeýnte opytáta. Pepyta upe óga upévape, ha pe’u ha pey’u umi ha’e kuéra oguerekóvagui. Opa omba’apóvape niko ojehepyme’ẽ va’erã voínte. Ani peva peva rei peteï ógagui ambuépe.

Peho ramo peteĩ táva peñe moguahẽháme, pe’u umi peẽme oñeme’ẽvagui. Pemonguera umi hasýva upépe oĩvape, ha peje ichupe kuéra: ‘Tupã Ñandejára sãmbyhy hi’aguĩma pende hegui.’ Ha pehórõ peteĩ táva peñe moguahẽ’ỹháme, pesẽ okápe ha peje: ‘Pende táva pegua yvytĩmbo oja va’ekue  ore pýre jepe, roityvyro ore pochýgui pende rehe. Ha peikuaáke kóva, Tupã Ñandejára sãmbyhy hi’aguĩma pende hegui.’

Ha’e peẽme, áçante ichupe kuéra oñenupã pohyivéta umi táva Sodómape oiko va’ekuégui.”

Ñandejára Jesucristo Ñe’ẽ.