MIÉRCOLES SEMANA XXVI TO

Ko’ágä   ñahendúta Tupã Ñandejára ñe’ẽJob arandukápe oĩ háicha                        9, 1-12. 14-16

Job he’i iñanguirũkuérape:

Mba’éicha piko yvypóra ikatúta iñaranduve Tupã Ñandejáragui. Che aikuaa porã upéichaha, ha Tupã Ñandejára rovake yvypóra ndaikatuiha he’i heko potĩha.

Ha oimérõ ojohova apiséva Tupä Ñandejára ndive, opa mba’e ha’e oporandúvagui ndaikatúi chéne peteĩnte jepe ombohovái, Tupã Ñandejára ndahasaháiva pu’aka ha arandúpe, ava nipo ombohováine ichupe ha osẽ porãne?

Oityvyro yvyty oñeha’arõ’ỹ hágui, ha ipochy rendýpe oitypa.

Ha’e omboryrýi ko yvy ha omongu’e ipyenda.

Ha’e he’i kuarahýpe osẽ’ỹ haguã ha mbyjakuérape ani haguã omimbi.

Ha’e ño ite oipyso pe arapy ha ipu’aka tymba ñarõ yguasúpe guáre.

Umi hendy joáva arapýre pyhare ha’e oisãmbyhy, Osa Mayor, Orión ha Eichu, ha yvývo gotyo iñasãiva mbyja ita.

Heta ite mba’e hechapyrãva ha’e ojapo, avave ikatu’ỹva oikuaa.

Tupã Ñandejára ohasa che ypy rupi ha che ndahechái, ojekyty che rehe ha nañandúi.

Oimérõ ha’e oñemomba’eha, mávapa ojeruréne ichupe.

Ava piko oporandúta ichupe ojapo va’ekuére.

Mba’éicha piko aipórõ ikatúta ambohovái Tupã Ñandejárape?

Che reko potĩve ramo jepe ndaikatúi chéne ambohovái; ha’e upe che mbojovakéva, poriahuvereko mante ikatu ajerure ichupe.

Ahenói ramo jepe ichupe ha ojapysaka che rehe, che ndaroviái ohendutaha che Ñe’ẽ.

Tupã Ñandejára Ñe’ẽ.

SALMO ÑEMBOHOVÁI     87, 10b-15

R. Tupä Ñandejára ehendu che ñembo’e.

Rasa che rasẽgui ndahecha porã véima.

Ára ko’ẽre niko ndéve asapukái Tupã, ha yvágare che pojái.

Nde pokatu nga’u piko rehechauka omano va’ekuépe?

Te’õngue piko opu’ãva ne momba’e guasu? R.

Ne mborayhu ha nde reko jeroviaha nga’u piko ojekuaa omanóva oĩháme?

Umi iñypytũháme opa mba’e opahápe tesaráipe:

piko ojekuaa umi mba’e hechapyrãva nde rejapóva? R.

Che katu che Jára, ndéve ajerure asy, ko’ẽ vove ndéve añembo’e.

Che Jára, mba’ére piko che mboyke?

Mba’ére piko rekañy che hegui? R.

ALELUIA Flp 3, 8-9

Aleluia.

Opa mba’épe che ahecha yty ramo,

amomba’éma guive Cristope ha aime hendive.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       9, 57-62

Upe ramo oho aja hikuái, tapére peteĩ kuimba’e he’i Jesúspe: Che Jára, che romoirũta mamo rehohápe.

Jesús he’i ichupe: Aguara’i niko oguereko ikeha, ha guyra kuéra hupa. Che, yvypóraicha aju va’ekue  katu, ndarekói mamo ambojeko haguã che akã.

Jesús he’i ambuépe: Eju che ndive.

Ha’e katu he’i: Che Jára, che rejána taha raẽ ta ñotỹmi che ru.

Jesús katu he’i upévape: Eheja umi omanómava to ñotỹ umi omanóvape. Nde katu tereho ha emoherakuã Tupã Ñandejára sãmbyhy.

Ambue katu he’i avei ichupe: Che Jára, ahase ne ndive, che rejami raẽna taha ta momarandu che róga guápe. 

Jesús ombohovái ichupe: Pe arádo omoĩva ipópe ha oma’ẽva hapykuévo, naiporãi Tupã Ñandjára sãmbyhýpe guarã.

Ñandejára Jesucristo Ñe’ẽ