VIERNES TRIGÉSIMO TERCERO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Macabeos arandukápe oĩ háicha 4, 36-37. 52-59

Judas Macabeo ha ipehẽnguekuéra he’i hikuái: “Ko’ágä oñehundímava umi ñande rehe ija’e’ỹva, jaha ñamopotĩ ha ñamomarangatu jevy tupao.” Ñorairõhára aty hetakue oñemboaty ha ojupi yvyty Siónpe.

Ára 25hápe, mes 9 jave hérava Kislev, áño 148 ramo, opu’ã hikuái voi porã, ha omymbajuka, tembiapoukapy he’i háicha, pe altar pyahu ojejapo va’ekue ári.

Altar oñemongy’a hague ombotývo peteĩ áño, upe árape, omomarangatu jevy hikuái, purahéi ha mbarakapúpe. Opa tetãgua oñesũ ha ojayvy opoko peve yvy omomba’e guasúvo Tupã Ñandejárape ha omboajévo Ichupe oguenohẽ porã haguére ichupekuéra. Ha 8 ára pukukue oguerohory hikuái upe altar ñemomarangatu ha oikuave’ẽ vy’ápe mymbahapy ha mymbajuka, jeiko porã jevy ha Tupã Ñandejára ñemboaje rehegua.

Ombojegua hikuái pe tupao ape, akãregua órope ha mba’e apu’a verápe. Omoatyrõ avei hikuái umi koty ha umi ojeikeha omohokẽ. Tuicha vy’a oiko, ojecháre hikuái ñemoakãsã’ỹre ha ñemotĩ’ỹre umi mombyrygua poguýpe.

Judas, ipehẽngue kuéra ha opa tetã Israelgua ndive, oñemoĩ hikuái peteĩ ñe’ẽme, áño oñembotývo jepi ojererohory va’erãha pe altar pyahu oñemomarangatu hague, vy’ápe, 8 ára pukukue, oñepyrũvo ára 25, mes Kislev jave.

Tupã Ñandejára Ñe’ẽ.

SALMO ÑEMBOHOVÁI ICrón 29, 10b-12

Opavave: Romomba’e guasu nde réra Tupã Ñandejára.

Upérõ David omomba’e guasu Tupã Ñandejárape
opavave rovake he’ívo:
“Roguerohory opa árape guarã,
nde Tupã ore ru Israel Jára! O.

Nde niko Tupã Ñandejára, nde tuichapa
ha nde pokatu, nde pópe oĩ opa mba’e
ha nde reko mimbipa ndaijojahái!
Opa mba’e oĩva yvy ári ha yvágape ne mba’énte voi. O.

Nde hína ore Jára pe mburuvicha guasu pavẽ
ha nde mba’e guasuve opavavégui!
Nde niko Tupã Ñandejára, nde tuichapa ha nde pokatu,
nde pópe oĩ opa mba’e ha nde reko mimbipa ndaijojahái! O.

Opa mba’e oĩva yvy ári ha yvágape ne mba’énte voi.
Nde hína ore Jára mburuvicha pavẽ opavavégui!
Nde hegui ou mba’e rereko heta ha terakuã.
Nde reisãmbyhy opa mba’e. O.

LECTURA MOKOÎHA:

Marandu porã Tupã Ñandejára Ñe’ẽ Apocalipsis arandukápe oĩ háicha 10, 8-11

Che Juan, pe ñe’ẽ ahendu va’ekue, ha yvágagui osẽva, oñehenduka jevy chéve, ha he’i chéve: “Tereho ha ejapyhy pe kuatiañe’ẽ’imi oguerekóva ipópe pe Tupã Ñandejára remimbou omoĩva ipy yvy ha yguasu ári.” Aha hendápe ha ajerure ichupe upe kuatiañe’ẽ’imi, ha he’i chéve: “Kóina ha he’u, nde jurúpe eíraicha he’ẽta, nde py’ápe katu iróta.”

Aipyhy che pópe upe Tupã Ñandejára remimbou kuatiañe’ẽ’imi ha ha’u; ha che jurúpe añandu eíraicha he’ẽ, ha amokõ vove katu añandu iro che py’ápe. Ha upépe he’i chéve hikuái: Tekotevẽ remomarandu jevy, heta táva, tetã, ñe’ẽ ha mburuvicha guasu rehegua.”

Tupã Ñandejára Ñe’ẽ.

SALMO ÑEMBOHOVÁI 118, 14. 24. 72. 103. 111. 131

Opavave: Tupã Ñandejára upe ne ñe’ẽ, eiretégui he’ẽve.

Ne rembipota ajapo ramo avy’ave
opa mba’e areko ramo guágui.
Ne rembiapoukapy upe che mbovy’áva,
ha ohechauka chéve mba’éichapa aiko va’erã. O.

Che ahecha ramo ne rembiapoukapy
óro ha plátagui ahecha ramove.
He’ẽte niko che jurúpe
upe ne ñe’ẽ, eiretégui he’ẽve. O.

Ne rembiapoukapy opytáta che mba’erã opa árape guarã,
umíva ombohorýgui upe che py’a.
Aipe’a che juru, ha puku che pytu araha,
upéicha umi ne rembiapoukapy che ra’ã. O.

ALELUIA Jn 10, 27

Aleluia.
Ñandejára Jesucristo he’i: “Che ovechakuéra ohendu che ñe’ẽ.
Che aikuaa ichupe kuéra ha ha’ekuéra oho che rapykuéri.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha19, 45-48

Upe ramo Jesús oike Tupaópe ha oñepyrũ omosẽ upégui umi oñemúvape. Ha he’i ichupekuéra: Tupä Ñandejára ñe’ẽme niko he’i: ‘Che róga, óga oñeñembo’eha va’erã’. Peẽ katu pejapo ichugui mondaha kuára.’

Opa ára Jesús ombo’éva Tupaópe, ha umi pa’i ruvicha, umi Moisés rembiapoukapy mbo’eha ha umi moakãhára ave, oheka hikuái mba’éichapa ojukáta ichupe. Ha ndojuhúi hikuái mba’éichapa ojapóta upéva, opavave niko ijurujái umi mba’e Jesús he’ívare.

Ñandejára Jesucristo Ñe’ẽ.