SÁBADO TRIGÉSIMO TERCERO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Macabeos arandukápe oĩ háicha 6, 1-13

Mburuvicha guasu Antíoco oiko umi tetã yvatevogua rupi. Upépe oikuaa, Pérsiape oimeha peteĩ táva guasu hérava Elimaida, herakuã mbukúva pláta ha óro oguerekóvare.

Oime peteĩ tupao heta etei mba’e oguerekóva, tete mo’ãha óro, ñemo’ãha anambusu ha heta mba’e ojeporúva ñorairõháme, oheja va’ekue upépe Alejandro, Macedoniagua, Filipo ra’y, tetã Grecia mburuvicha guasu tenonde guare. Antíoco oho upe táva guasu upévape, ha omoĩse mo’ã ipópe ha omondapase mo’ã ha ndaikatúi, ipypeguakuéra apysápe oguahẽ mba’épa ojapose, ha osẽ ojepytaso henondépe, aipórõ, oguevi mante ha oho jevy Babilóniape.

Oĩ jave gueteri Pérsiape oguahẽ ichupe marandu he’íva, pe ñorairõ omondo va’ekue Judea ári osẽ vai hague, Lisias ra’e, jepevénte oho peteĩ ñorairõhára aty ne mbaretéva reheve, osẽ vai ha oguevi Israelgua renondépe, oñemombarete porã va’ekue mba’eta ojapyhýva reheve, hesekuéra ija’e’ỹva ohundipa va’ekuégui; umi Israelgua oity hague avei pe altar vai omopu’ã va’ekue ambue altar oñemymbahapyha ári Jerusalénpe; omopu’ã hague pe tupao jerére korapy yvate, ymave guareichagua, ha omombarete jevy hague táva guasu Bet-Sur.

Oikuaávo ko’ã mba’e, mburuvicha guasu oñembyasyeterei, ha upevakuégui hasy, mba’eve nosẽ porãi haguére ha’e oipota haguéicha. Ha upépe oĩ heta ára, oñembyasýrõ oñembyasyve, ipahápe oimo’ãma omanóta.

Upémarõ ohenoiuka umi hayhupárape ijykére ha he’i ichupekuéra: “Ndaikatuvéi ake ha che py’a itarova. Mba’ére piko aguahẽ ko ñembyasy guasu etépe, che, che mbaretete va’ekue ha avy’a ha ajehayhu? Ha ágã ae che mandu’a hína, heta ite mba’e vai ajapo hague Jerusalénpe, amondapa opa mba’e óro ha pláta guigua ha amondo ñorairõhára ojukapa va’erã Judea guápe, reiete. Ahecha kuaa upe haguére ouha chéve ko’ã mba’e vai eta. Péina amano aína peteĩ tetã che mba’e’ỹvape.”

Tupã Ñandejára Ñe’ẽ.

SALMO ÑEMBOHOVÁI 9, 2-4. 6. 16. 19

Opavave: Tupã Ñandejára, che py’aite guive romomba’e guasuse.

Tupã Ñandejára, che py’aite guive romomba’e guasuse,
ne rembiapokuéra ita rehe che mandu’ase.
Nde, amo yvatete reiméva, vy’águi roguerosapukái
ha aropurahéi nde réra! O.

Che rehe ija’e’ỹva oguevi ne renondépe,
oñepysãnga, ho’a ha omano.
Heko vaívape remongavaju,
iñañávape rehundi, ha oiko ichuguikuéra tesarái. O.

Heko vaíva ho’a yvykuápe ha’e voi ojo’o va’ekuépe,
ipy pa’ã upe ñuhãme ha’e omoĩ va’ekuépe.
Imboriahúvagui Tupã Ñandejára ndahesarái,
ha umi ha’ekuéra oha’arõva ndopa reíri chéne. O.

LECTURA MOKOÎHA:

Ñahendúta Tupã Ñandejára Ñe’ẽ Apocalipsis arandukape oĩ háicha 11, 4-12

Che, Juan, ahendu peteĩ ñe’ẽ he’iva chéve: Ko’ã mokõi mba’e rechaha hína, umi mokõi olívo ha umi mokõi tataindy renda oĩva pe yvy tuichakue Jára renondépe.

Oimérõ ojaposéva hesekuéra ivaíva, oity tata ijuru rupi, ohapypa itéva umi hese kuéra ija’e’ỹvape; upéicha omanóta oimeraẽ ojaposéva hesekuéra ivaíva.

Oguereko hikuái pu’aka omboty haguã pe yvága, oky’ỹ haguã omomarandu aja pukukue, ha oguereko avei pu’aka ojapo haguã ýgui tuguy, ha oporombohasa asy haguã yvy tuichakue opaichagua sarambi guasúpe, ha’ekuéra oipotaha peve. Ha ágã omoarandupa vove hikuái, pe tymba vai guasu osẽva yvykua pypukúgui ohóta orãirõ ichupekuéra, ha ipu’akáta ha ojukáta ichupekuéra.

He’õnguekuéra ojepysóta pe oka ojeguataháre táva guasu tuichakue ojehupi haguépe kurusúre Ijárape, espíritu rehegua ñe’ẽme hérava Sodoma ha avei Egipto. Ha mbohapy ára ha peteĩve mbyte rupi, yvypóra opaichagua táva pegua, oñe’ẽ va opaichagua ñe’ẽme, opa tetã peguáva ohecháta he’õngue ha ndoheja mo’ãi oñeñotỹ.

Umi oikovéva yvy ári ovy’áta imanóre. Ovy’aitereígui ome’ẽta ojupe jopói, umi mokõi maranduhára niko ombohasa asy eterei va’ekue ichupekuéra. Mbohapy ára ha peteĩve mbyte rupi rire katu, Tupã Ñandejára omoingove jevy ichupe kuéra ha opu’ã jevy hikuái, ha umi ohecha va’ekue ko’ã mba’e okyhyjepa. Ha upe jave, umi mokõi mba’e rechaha ohendu hikuái ñe’ë hatã oúva yvágagui, he’íva: “Pejupi ko’ápe!” Ha ojupi hikuái yvágape peteĩ arai ári, ha umi ija’e’ỹva hese kuéra ohecha.

Tupã Ñandejára Ñe’ẽ.

SALMO ÑEMBOHOVÁI 143, 1-2. 9-10

Opavave: To ñemomba’e guasu Tupã Ñandejára!

To ñemomba’e guasu Tupã Ñandejára!
Ha’e upe oñangarekóva che rehe,
che jyva ha che po omombarete
ha upe che mbokatupyrýva ñorairõrã. O.

Ha’e ipy’a porã che ndive ha che mo’ã,
che pyendaha ha che pysyröhára,
oñangareko che rehe ha che nohẽ jejopy vaígui.
Ha’e ha upe omoĩva tetãnguéra che po guýpe. O.

Tupã Ñandejára, purahéi pyahu ndéve apurahéita.
Árpa púpe rogueropurahéita.
Nde rupi mburuvicha guasu kuéra ipu’aka ija’e’ỹvare.
Nde upe renohéva ne rembiguái Davídpe jejopy vaígui. O.

ALELUIA Cf. 2Tim 1, 10b
Aleluia.
Ñane Pysyröhára Ñandejára Jesucristo ipu’aka manóre
ha ombojajái tekove Marandu porä rehe ae.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 20, 27-40

Upe ramo umi Saduséo oho Jesús rendápe. Umi Saduséo niko ndogueroviái omanóva oikove jevyha, upévare he’i Jesúspe: Mbo’ehára, Moisés niko oheja va’ekue kuatiáre, peteĩ kuimba’e omano ramo imemby’ỹre ichugui hembireko, tyvýra omenda va’erã hembirekorére omoñemoñare haguã tyke’ýra omano va’ekuépe. Ha upéicha, oiko va’ekue peteĩ jevy 7 ojoryvýva. Ha pe tenondegua omenda, ha omano ta’ýra’ỹre.

Pe mokõiha, ha mbohapyha omenda hembirekorére, ha upéicha avei ojapo umi ambue, ha omanomba umi 7 ita’ýra’ỹre. Ipahávo omano avei pe kuña. Ha néi, ágä ojeikove jevy vove, máva rembirekótapa hína pe kuña, umi 7 niko omenda va’ekue hese?

Jesús he’i ichupekuéra: Yvy ári ojeikove aja, kuña ha kuimba’e omenda. Ha umi Tupã Ñandejára ohecháva, ikatuha oikove jevy pe jeikove tenondevévo guápe, taha’e kuimba’e térã kuña, umíva nomenda mo’ã véima, ndaikatu véiguima omano.

Ha’ekuéra Tupã remimboúichata, ha Tupã Ñandejára ra’ýta oikove jevy rupi. Moisés jepe voi niko, ku javorái hendýva okai’ỹ ramo guare, oikuaauka ñandéve omanóva oikove jevyha. Upépe he’i, Tupã Abraham, Jacob ha Isaac Jaraha. Ha’e niko ndaha’éi omanóva Tupã. Oikovéva Tupã Ñandejára katu. Ichupe guarã niko maymáva oikove.

Umi Moisés rembiapoukapy mbo’eha oĩva upépe he’i ichupe upérõ: Ere porã, mbo’ehára. Ha ndaipy’a véima hikuái oporanduve haguã.

Ñandejára Jesucristo Ñe’ẽ.