LECTURAS VIERNES VIGÉSIMO NOVENO DURANTE EL AÑO

LECTURAS VIERNES VIGÉSIMO NOVENO DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Roma guápe      7, 18-25a

Che pehẽnguekuéra:

Che aikuaa, che pype, che reko kangýpe ndaiporiha pe iporãva. Ajapose ramo jepe iporãva, naiméi ajapo haguãicha. Ndajapói pe mba’e porã ajaposéva, pe angaipa ajapose’ỹvante. Ha upéicha, ajapo ramo pe ajapose’ỹva, nda che vémai pe ojapóva, pe angaipa che pype oĩvante.

Ahecha kuaa niko, ajapose ramo jepe iporãva, ivaíva mante ajuhu che rapépe. Che pype niko iporã chéve pe Tupã Ñandejára rembiapoukapy, ha añandu che pype peteĩ mba’e che jokóva ajepy’a mongeta porã haguã. Upéva pe angaipa rembiapoukapy, oĩva che pype ha che jopýva.

Aichejáranga che! Mávapa che pe’áne pe mano pu’aka, che retépe oĩvagui?

Tupã Ñandejára mante, ame’ẽha che aguyje  Ñandejára Jesucristo rupi. Ipahápe: che aikuaa ajapo va’erãha Tupã Ñandejára rembiapoukapy, ha che kangýgui, aime angaipa rembiapoukapy poguýpe.

Tupã Ñandejára Ñe’ẽ.

SALMO ÑEMBOHOVÁI         118, 66. 68. 76-77. 93-94

Opavave: Tupã Ñandejára che mbo’e ne rembiapoukapy rehe.

Che mbo’e che akã guapy ha che arandu haguã,

ne rembiapoukapy rehe ajerovia.

Nde niko nde py’a porã ha iporãvante rejapo,

eikuaauka chéve upe ne rembipota. O.

Ne mborayhu ta che moangapyhy ere

haguéicha rejapotaha che ndive.

Che poriahuvereko kena taikove,

ne rembiapoukapy upe che mbovy’áva. O.

Nda che resarái mo’ãi ne rembipotágui,

umíva rupi niko nde che moingove.

Che niko ne mba’e ha ne rembipotánte ajapose,

che renohẽkena jejopy vaígui. O.

ALELUIA Cf. Mt 11, 25

Aleluia.

Ore Ru nde niko jehovasapyre, Tupã Ñandejára yvy ha yvága jára, rehechauka haguére ko’ã mba’e guasuete Sambyhy rehegua umi  ojejapo’ÿvape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha.   12, 54-59

Upe ramo Jesús he’i avei opavavépe:

“Pehechávo arai opu’ãha kuarahy reiképe, peẽ peje okytaha, ha upéicha ojehu. Ha yvytu oipeju hatã ramo yvatévoguio, peje hakutaha. Peẽ tekove rova mokõi! Peẽ niko peikuaa mba’épa ojehúta árare pemañárõ. Mba’éicha rupi piko ndapeikuaái mba’épa he’ise ko’ã ára peikoveha?”

“Mba’ére piko nde voi nderehecha kuaái pe heko jojáva?

Oimérõ reja’yvyreha tereho hendive mburuvicha rendápe. Eñeha’ã eñemoĩ porã hendive ikatu jave gueteri, nde reraha’ỹ mboyve mbojovakehára renondépe. Upéicha’ỹrõ, pe mbojovakehára ne me’ẽta mburuvichápe, ha mburuvicha ne moingéta yvyrakuápe. Cháke ha’e ndéve, upégui neresẽ mo’ãi neremyengoviapái peve viru pehẽngue minte jepe ndéve hembýva.”

Ñandejára Jesucristo Ñe’ẽ