VIERNES XV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 11, 10; 12, 14

Moisés ha Aarón ojapo Faraón renondépe umi mba’e rechapyrã. Tupã Ñandejára katu oheja Faraón oñembopy’a hatã, ha ndopoíri Israelguágui.

Tupã Ñandejára he’i Moisés ha Aarónpe Egíptope: Ko mes ha’éta hína peẽme guarã, áño pegua mes tenondegua. Peje opa Israelguápe: “Ko mes pegua ára 10hápe, opa óga jára toñongatu peteĩ ovecha ra’y térã kavara ra’y hóga guápe guarã. Peteĩ óga pegua imbovy ramo ho’upa haguã, tome’ẽ hembyre hóga ykére oĩvape.

Ojeporavo haguã upe mymba, to ñema’ẽ mbovýpa umi ogagua ha mbovýpa ho’u jepi peteĩ teĩ. Ta upéva ovecha ra’y térã kavara ra’y mácho imarã’ỹva ha hi’áño peteĩva. Peñongatu ára 14 peve ha opa Israelgua tojuka oguahẽvo ka’aru pytũ. Pemona huguy kuépe mokõive óga rokẽ ykére pe’uhápe upe mymba, avei hembe’y yvategua.

Upe pyharépe voi toje’u ho’o jehesy pyre, mbuja ha pohã ñana iróva reheve. Upe mbuja to jejapo trígo ku’i oñembovu’ỹvagui. Upe mymbágui ani pe’u mba’eve ipýra térã ñembojy pyre’ÿre.

Jehesy pyre pe’u va’erã, iñakã ngue, ipokue ha hyekue reheve. Ani peheja mba’eve upe ára ambuépe guarã ha hembyre pehapy ko’ẽmba vove.

Upéicha pe’u: jeku’a jopýpe, pende py rehegua pende py rehe ha yvyra jekoha pende pópe. Ha pe’u pya’e, Tupã Ñandejára Páskua, niko hína. Che ahasáta upe pyharépe Egipto rupi ha ajukapáta Egiptogua ra’y ypykue, taha’e kuimba’e térã mymba.

Upéicha ainupãta tupã gua’ukuéra Egipto guápe. Che hína pende Jára! Upe tuguy oĩva pende róga rokẽre, ha’éta mba’e rechaukaha ha ahasakuévo ahasáta henonde rupi ha ndoike mo’ãi pende jukávo porojukahára, ainupã ramo Egíptope.

Ko ára hína mandu’arã peẽme ha pembo aretéta chéve peẽ ha pene ñemoñare. Pembo arete ko ára tembiapoukapy ramo opa árape guarã peẽme ha pene ñemoñarépe.”

Tupã Ñandejára Ñe’ẽ.

SALMO ÑEMBOHOVÁI 115, 12-13. 15-18

Opavave: Nde rérape, che Jára, añembo’éta.

Mba’éicha piko ikatúta amyengovia Tupã Ñandejárape
ha’e ipy’a porãite haguére che ndive?
Upe kópa ñane renohẽva vy’a’ỹgui
amopu’ãne ha hérape añembo’éne. O.

Ñandejára ombyasy ohechávo omano umi hese ojeroviáva.
Tupä Ñandejára, che niko ne rembiguái!
Ne rembiguái membyre hína che!
Nde upe che jora va’ekue iñapytĩmby aikohágui. O.

Ahepyme’ẽta ndéve che mba’e kuave’ỹ reheve.
Nde rérape, che Jára, añembo’éta.
Ajapóne umi mba’e ha’e va’ekue Tupã Ñandejárape
opa hetãgua renondépe. O.

ALELUIA Jn 10, 27

Aleluia.
Ñandejára Jesucristo he’i: “Che ovechakuéra ohendu che ñe’ẽ. Che aikuaa ichupekuéra ha ha’e kuéra oho che rapykuéri”.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 12, 1-8

Upe ramo Jesús ohasa ohóvo kokue rupi peteĩ pytu’uha árape. Ha hemimbo’ekuéra iñembyahýigui, oñepyrũ oipo’o trígo ha ho’u.

Umi fariséo ohecha upéva he’i Jesúspe: Ema’ẽmi, ne remimbo’ekuéra niko ojapo, ojejapo’ỹ arã pytu’uha árape.

Jesús katu he’i ichupekuéra: Nda peikuaái nga’u piko mba’épa Tupã Ñandejára Ñe’ẽme he’i David ha iñirũnguéra ojapo hague iñembyahýi ramo guare?

Oike hikuái Tupaópe ha ho’u umi mbujape Tupãme oñemboyke va’ekue. Ha’e térã iñirũ nguéra ndaikatúi va’ekue ho’u umíva, pa’ikuérape guarã añónte va’ekue umi mbuja.

Nda peikuaái nga’u piko Moisés rembiapoukapýpe he’iha, pa’i kuéra ndo pytu’úi ramo jepe pytu’uha árape Tupaópe, upéva ndo jererekoiha ichupe kuéra tembiapo vai ramo?

Che katu ha’e peẽme, ko’ápe oĩha hína peteĩ mba’e guasuvéva Tupaógui. Peẽ nda peikuaái mba’épa he’ise Tupã Ñandejára Ñe’ẽme he’ihápe: “Che aipota peiporiahuvereko pende rapichápe, pemymbajuka rangue chéve.”

Upéva peikuaa rire nda pejéi va’erã mo’ã ojapo vai’ỹvare ojavyha. Che, yvypóraicha aju va’ekue, areko che pópe ha’évo mba’e-mba’épa ikatu ojejapo pytu’uha árape.

Ñandejára Jesucristo Ñe’ẽ.