JUEVES XV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 3, 13-20

Moisés ohendu rire Tupã Ñandejára Ñe’ẽ, he’i ichupe: Ha che piko máva aha haguã Faraón rendápe anohẽ Egíptogui Israel guápe? Ha Tupã Ñandejára he’i ichupe: Che aĩta ne ndive. Renohẽ rire Egíptogui che retã guápe, opaite peẽ che momba’e guasúta kóva ko yvytýpe. Ha ojekuaáta che romondo hague.

Moisés he’i Tupã Ñandejárape: Ágã ahávo añe’ẽ Israelgua ndive, ha ha’e ichupekuéra: “Tupã pende ru ypykue Jára che mbou pene rendápe”, ha ha’ekuéra oporandu ramo chéve:“Mba’éicha héra?”, piko mba’e ha’éta?

Tupã Ñandejára he’i Moiséspe: Che hína che voi. Ha eréta Israel guápe: “Che voi” che mbou pene rendápe.

Tupã Ñandejára he’ive Moiséspe: Ere avei Israel guápe: “Pende Jára, upe Tupã omomba’e guasu va’ekue pende ru ypykue: Abraham Tupã, Isaac Tupã ha Jacob Tupã, che mbou pene rendápe”. Kóva hína héra, ha upéicha pehenóita ichupe opa ára. Tereho emboaty moakãhára kuéra Israel guápe ha ere ichupekuéra: “Ñandejára, upe Tupã omomba’e guasu va’ekue pende ru ypykue, ojechauka chéve.

Ñandejára, upe Tupã omomba’e guasu va’ekue Abraham, Isaac ha Jacob he’iuka peẽme: Pohecha porã ha ahecha mba’éichapa pende rereko asy Egiptogua. Poguenohẽta upégui pogueraha haguã peteĩ yvýpe ýicha osyryhápe kamby ha eíra.

Upe yvy Ko’ágã cananéo, hitíta, amorréo, perizitas, jivitas ha jebuséo kuéra retã hína. Moakãhára kuéra ohendúta ne ñe’ẽ ha hendive kuéra rehóta Egipto ruvicha guasu rendápe ha eréta ichupe: ‘Tupã, ore hebréova Jára, ojechauka oréve, ha Ko’ágã he’iuka ndéve oipotaha roho yvy ojeiko’ỹháme, mbohapy ára rape pukukue, romymbajuka haguã ichupe upépe.’

Aikuaáma ndoheja mo’ãiha peho, ndaha’éi ramo mbaretépe. Upérõ ainupã pochýta Egipto retãme ha ajapóta mba’e hechapyrã ijapytépe kuéra. Upéi ohejáta pesẽ upégui.

Tupã Ñandejára Ñe’ẽ.

SALMO ÑEMBOHOVÁI 104, 1. 5. 8-9. 24-27

Opavave: Tupã Ñandejára nda hesaráiri iñe’ẽ me’ẽgui

O bien:

Aleluia.

Pemomba’e guasu Tupã Ñandejárape, héra pemomba’e.
Opa tetã rupi pemoherakuã hechapyrãva ojapo va’ekue.
Pene mandu’áke umi mba’e hechapyrãva
Ojapo va’ekuére, hembiapoukapy ijurúgui osẽ va’ekuére. O.

Ha’e imandu’a mante iñe’ẽ ome’ẽ va’ekuére.
Iñe’ẽ ome’ẽ va’ekuére opa árape guarã.
Ha’ete voi ome’ẽ va’ekue iñe’ẽ Abrahámpe,
héra tee rehe ome’ẽ va’ekue iñe’ẽ Isaácpe. O.

Tupã Ñandejára heta omoñemoñáre hetã guápe,
ha omombareteve umi ichupe kuéra ojopývagui.
Tupã opoko umi Egiptogua py’áre ija’eve’ỹ haguã hetã guáre ha omoñuhã haguã Tupã Ñandejára rembiguái kuérape. O.

Upéi omondo hembiguái Moiséspe, ha hembiporavo Aarónpe.
Mba’e hechapyrãva ha’e kuéra ojapo,
imombe’upyrãva ojapo Cam yvýpe. O.

ALELUIA Mt 11, 28

Aleluia.
Ñandejára Jesucristo he’i: Peju che rendápe opavave ojepy’apy ha ikane’öva
Che pomombytu’úta.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

11, 28-30

Péicha he´i upe ramo Ñandejára: Peju che rendápe opa peẽ pene kane’õ ha pemba’apo pohýiva, ha che pomombytu’úta.

Peheja tamoĩ pende apére che mba’e pohýi, ha pejapo che ha’éva peẽme. Ha peikuaáta che py’a porãha ha nda jejapoiha, ha che ndive pejuhúta pytu’u. Pe mba’e pohýi amoĩtava pende apére niko ivevýita peẽme, ha ndaipohýi mo’ãi upe aipotáva peraha.

Ñandejára Jesucristo Ñe’ẽ