LECTURAS JUEVES TRIGÉSIMA SEMANA

LECTURAS JUEVES TRIGÉSIMA SEMANA

Ñahendúta Tupã Ñandejára Ñe’ẽ San Pablo ohai va’ekue Éfeso guápe 6, 10-20

Che pehẽnguekuéra: Ko’ágä che ryvy kuéra, ta pene mbaretéke pejoajúvo Tupã Ñandejára ndive ha ipokatu ta pene mombarete. Pemoĩ pende jehe opa mba’e Tupã Ñandejára ome’ẽva peẽme peñorairõ haguã mba’e pochy ndive, péicharõ hatã peiméta ani haguã pene mbotavy Aña. Nañañorairõi niko hína yvypóra kuéra ndive. Ñañorairõ uvei umi yvategua mba’e pochy kuéra ndive, imbarete ha oguerekóva ipoguýpe ko’ã ára jaikoha, pyharéicha iñypytũva.

Upévare, pemoĩ pende jehe umi mba’e Tupã Ñandejára ome’ẽva peẽme peñe mo’ã haguã. Péicharõ, peropu’akáta mba’e vai ojeityha ára pende ári, ha pehasa rire opa mba’e ivaíva, pejuhu nda pe guevíri hague. Upévare peñe mbosako’i hatãke. Pereko pende jehe añetegua ku pende ku’a jokuaha ramo, ha teko joja ku pende pyti’a mo’ãha ramo.

Opa árape peime pesẽ haguãicha pemoherakuã ñe’ẽ py’aguapy oguerúva. Opa ko’ã mba’e ári, pende jerovia pereko pende rete mo’ãha ramo, ani haguã Aña hu’y rendy ojekutu pende rehe. Pene akãre pemoĩ pysyrõ Tupã Ñandejára ome’ẽva peẽme, ha Tupã Ñandejára ñe’ẽ pereko pende pópe ku kyse pukúicha, Espíritu Santo ome’ẽva peẽme.

Peñembo’éke ha opa pejerure Tupã Ñandejárape pene pytyvõ haguã, Espíritu Santo oñanduka háicha peẽme. Aníke peñe me’ẽtei ha pende py’a vino.

Peñembo’e umi Tupã Ñandejára mba’évare. Peñe mbo’e avei che rehe, Tupã Ñandejára ome’ẽ haguã chéve umi mba’e ha’e va’erã, añe’ẽ haguã akyhyje’ỹre ha péicha aikuaauka haguã pe mba’e ojekuaa’ỹva marandu porã rehegua. Marandu porã rehehápe niko Tupã Ñandejára che mbou hembijokuái ramo ha hesehápe añe’ẽ haguã. Ha upévare Ko’ágã aime iñapytĩmby. Peñe mbo’e che rehe amoherakuã haguã akyhyje’ỹre.

Tupã Ñandejára Ñe’ẽ.

SALMO ÑEMBOHOVÁI 143, 1-2. 9-10ab

Opavave: To ñemomba’e guasu Tupã Ñandejára, ha’e upe oñangarekóva che rehe.

To ñemomba’e guasu Tupã Ñandejára!
Ha’e upe oñangarekóva che rehe,
ha upe che mbo’e ikatu haguã mbarete
che mbokatupyrýva ñorairõrã. O.

Ha’e ipy’a porã che ndive ha che mo’ã,
ajekóva hese ha che pysyröhára
oñangareko che rehe ha che nohẽ jejopy vaígui.
Ha’e ha upe omoĩva tetãnguéra che po guýpe. O.

Tupã Ñandejára, purahéi pyahu ndéve apurahéita.
Árpa púpe rogueropurahéita.
Nde rupi mburuvicha guasukuéra ipu’aka umi ija’e’ỹvare.
Nde upe renohẽva ne rembiguái Davídpe jejopy vaígui. O.

ALELUIA Cf. Lc 19, 38; 2. 14

Aleluia.
¡Jehovasapyre Mburuvicha guasu oúva Tupã Ñandejára rérape! ¡Py’aguapy yvágape ha terakuã porã amo yvate!.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 13. 31-35

Upe ramo oguahẽ umi fariséo ha he’i Jesúspe: Tereho ko’águi, Herodes nde jukaukase. Ha’e he’i ichupe kuéra: Ta peho ha peje pe aguarápe: ‘Ma’ẽ, ko ára ha ko’ẽrõ amosẽ aikóvo mba’epochy kuérape ha amonguera hasývape, ha ko’ẽ ambuérõ ae ajapopáta. Aha mante va’erã che rapére ko ára, ko’ẽrõ ha upe rire. Maranduhára niko ndaikatúi omanóvo mombyry Jerusaléngui.

“Jerusalén, Jerusalén, rejukáva maranduhárakuéra ha rejapíva itápe umi ñe’ẽ reruha Tupã Ñandejára omboúva ndéve! Heta itéma niko amboatyse va’ekue ne membykuéra, ryguasu omboaty háicha ita’ýra ipepoguýpe, ha nde reipotái!

Upévare, nde róga opytáta nandi ha itaperéta. Ha ha’e ndéve nda che rechamo’ãveimaha, oguahẽ peve ára erévo: ‘To jehovasa pe oúva Ñandejára rérape!’”

Ñandejára Jesucristo Ñe’ẽ.