LECTURAS DEL 17 DE DICIEMBRE: FERIA DE ADVIENTO

LECTURAS DEL 17 DE DICIEMBRE: FERIA DE ADVIENTO

Ko’ágã ñahendúta Tupã Ñandejára ñe’ẽ Génesis arandukápe oĩ háicha   49, 1-2. 8-10

Jacob ohenói ta’ýrakuérape ha he’i kóicha: Pejupa che ypýpe ko’ápe, ha ta’e ojehútava peẽme:

peko’íke Jacob ra’y kuéra, pende ru Israélpe pehendu!

Judá, nde ryvy kuéra ne momba’éta, nde rehe ija’e’ỹva ajúra nde pópe rejopýta, ha umi nde ryvy kuéra ndéve oñakãitýta.

León ra’y rusu hína Judá, tymba ka’aguy ojuka rire, ojeity yvýpe ha opytu’u.

Upépe ha’e oĩ aja, mávapa ijypýpe oñembojáne!

Ani chéne oĩ oipe’áva Judá pokatu ipógui.

Avave nomongúi chéne ichupe iguapyhágui.

Upéinte oúne ijára, ha ojayvýne henondépe tetã nguéra yvy arigua.

Tupã Ñandejára Ñe’ẽ.

SALMO ÑEMBOHOVÁI  71, 1-4ab. 7-8. 17

Opavave: Tupã Ñandejára, eme’ẽ mburuvicha guasúpe teko joja

Tupã Ñanadejára, eme’ẽ mburuvicha guasúpe teko joja

ha mburuvicha guasu ra’ýpe teko potĩ,

ikatu haguãicha ne retã oisãmbyhy hekopete,

ha imboriahúvape ohechakuaa. O.

Py’aguapy ha teko joja yvytýgui

to guejy ne retãgua ári.

Mburuvicha guasu to ñangareko imboriahúvare,

to hecha kuaa imboriahúva mitã nguéra. O.

Hetãme to jeiko hendapete ha hetã

to sãmbyhy jasy oñehundi peve.

Peteĩ yguasúgui ambue peve upe yvy toĩ ipo guýpe,

Éufrates ysyry guive yvy opaha peve. O.

Mburuvicha guasu réra to pa’ỹ araka’eve,

ta herakuã kuarahy oñehundi peve.

Tetãnguéra to jehovasa ipo rupi,

ha umíva to mbovy’a ichupe. O.

ALELUIA

Aleluia.

Arandu yvága pegua,

emohenda poräva opa mba’e eju ha ore mbo’e mba’e porã rekóre.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha  1, 1-17

Ko’ãva hína umi Jesucristo ypykue. Ha’e David ha Abraham ñemoñare va’ekue.

Abraham, Isaac ru va’ekue; Isaac, Jacob ru ha Jacob katu Judá ha tyvýrakuéra ru. Judá, Fares ha Zérah ru, ha isy kuéra Tamar. Fares, Esrom ru; Esrom, Aram ru; Aram, Aminadab ru; Aminadab, Nahasón ru; Nahasón, Salmón ru; Salmón, Booz ru, ha Booz sy Rahab. Booz, Obed ru ha isy katu Rut. Obed, Jesé ru, ha Jesé, mburuvicha guasu David ru.

David, Salomón ru ha isy katu Urías rembirekore. Salomón, Roboam ru va’ekue; Roboam, Abías ru; Abías, Asá ru; Asá, Josafat ru; Josafat, Joram ru; Joram, Ozías ru; Ozías, Jotam ru; Jotam, Ahaz ru ha Ahaz, Ezequías ru. Ezequías, Manasés ru; Manasés, Amón ru; Amón, Josías ru. Josías, Jeconías ha tyvýra kuéra ru. Upérõ Israelgua kuéra ojereraha va’ekue tembiguái ramo Babilóniape.

Upe rire, ou va’ekue Salatiel, Jeconías ra’y. Ha’e Zorobabel ru va’ekue. Zorobabel katu Abihud ru; Abihud, Eliaquim ru; Eliaquim, Azar ru. Azar, Sadoc ru; Sadoc, Aquim ru; Aquim, Eliud ru; Eliud, Eleazar ru; Eleazar, Matán ru; Matán, Jacob ru. Jacob, José ru; ha José María ména. María hína, Jesús hérava Cristo sy. Upéicha jajuhu oĩha 14 ñemoñare Abraham guive David peve; ha 14, David guive Israelgua Babilóniape ojereraha ramo guare peve; ha 14 avei upe guive, ou peve Cristo.

Ñandejára Jesucristo Ñe’ẽ.