Ñahendu Jesús. 5 enero: Feria de Navidad

Escucha el evangelio y la reflexión en: https://youtu.be/ZmF_6wJ6aH0

5 de enero. San Juan 1, 43 – 51.

Upe ára ko’ẽme, Jesús osẽ oho Galiléa gotyo. Upépe ojuhu Felípepe ha he’i chupe: — Eju che moirũ. Felipe niko Betsaidagua, Andrés ha Pedro válle.

Felipe upéi oho Natanael rekávo, ha he’i chupe: — Oime rojuhu ku Moisés ha umi profétakuéra imandu’aha ikuatiakuérape. Jesús niko héra, ku José Nazaretgua ra’y.

Natanael katu osẽ he’i chupe: — Nazarétgui piko araka’e osẽva iporãva.

Ha Felipe he’i chupe: — Eju ndete ehecha.

Ha Jesús ohechávo Natanaélpe oguãhẽva ohóvo hendápe, he’i: — Amo oúva hína Israelgua añetete. Hendive ndaipóri japu.

Natanael he’i chupe: — Mba’eichakue piko nde che kuaa.

Jesús he’i chupe: — Rohecháma voi kuri aje’i, ku reguapy ramo hína pe ígo mataguýpe, Felipe ne renói mboyve.

Natanael he’i chupe: — Mbo’ehára, nde niko Ñandejára ra’y. Nde hína Israel rréi.

Jesús he’i chupe: — Péicha piko ere ha’e haguére ndéve rohecha hague reguapýrõ hína ígo mataguýpe. Tuichaiteve mba’e katu niko rehecháne ágã.

Upéi Jesús he’i chupekuéra: — Añetéko ha’e peẽme. Pehecháne ágã yvága ojepe’a ramo ha Ñandejára ángel kuéra ojupi ha oguejy ramo che rendápe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oĩ niko sapy’ánte ñane konvidáva jaha haguã tupaópe, oikótaramo aty, ñembo’e, mísa. Oĩ avei oipotáva jaha retírope, jaike grúpope, movimiéntope Ikatu voi oime ojeruréva ñandéve jaiko haguã catequista, ñembo’e’ýva, ñamoirũ haguã ñande rapicha ipyahuvéva Ñandejára rapére. Ha péicha avei jahecha oñepyrũ Jesús ombyaty iñirũnguérarã.

Ha’e ohenói Felípepe ha upéi katu Felipe ohóma ohenói ivallegua Natanaélpe. Omombe’u oikuaa hague Hesúpe, ha oguerúma voi ichupe Jesús rendápe oñe’ẽ haguã hendive. Ohendu rire Jesús ñe’ẽ Natanael opyta avei hendive.

Mba’e konvítepa ereko che irũ ha nde che reindy. Térãpa máva ikatu ekonvida nde peñomoirũ haguã pehóvo pende guatápe, pende jeroviápe, ñañomokyre’ỹ haguã jahávo. Oñondive jaguatáramo jaipykúivo Jesús rape heta mba’e porã jahecháta hína ñande avei.

Pa’i Jasy.