Ñahendu Jesús. 6 enero: Feria de Navidad

Escucha el evangelio y la reflexión en: https://youtu.be/3NSU_q4VotA

6 de enero / Feria de Navidad. San Marcos 1, 6b-11

Upérõ Juan Bautista opredikávo he’i: “Che rire oúta peteĩ mba’e guasuvéva che hegui, chéve ndaijáiva ajayvývo henondépe ajorávo chupe isapatu sãnte jepe. Che pomongarai vaekue ýpe. Ha’e katu pene mongaraíta Espíritu Sántope.”

Umíva umi árape Jesús osẽ Nazaret, Galileágui. Ha Juan omongarai chupe rrío Jordánpe. Osẽvo pe ýgui, Jesús ohecha yvága ojepe’a ha Espíritu Santo oguejýva hi’ári pykasúicha. Ha oñehendu peteĩ oñe’ẽva yvágagui, ha he’íva: “Ndehína che ra’y ahayhúva, che aiporavova’ekue”.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ñañeha’ãvaniko jajehekýi mboriahu apĩ ha ñeikotevẽgui. Ñasẽse jeiko asýgui, ñañakãrapu’ãseniko. Ha upéva ndaivaíri. Sapy’ánte ku jeiko porãve rekávo jaikoséma voi tuicha mba’éramo. Ñañembotuichasémakatu, ñande pojaiséma yvágare ñande jehegui. Ha vaichánte ñandéve umi mba’e ojajaipavahína umi iporãvéva.

Ha upéva jahupyty haguã ñande rekovépe, ñande rógape, ñande ciudad ha ñane retãme ouva’erãha tapicha katupyry, iñarandúva, oñe’ kuaáva, tuicha mba’éva. Ñandénte ñande rekópe ha ñande rapicha ñandeichaguánteramo ha’etevoi ku japytáta ñaimehápente, apete jeýnte ñasẽtaha. Ha upéicha avei niko umi tetã Israel-guápe ojehuraka’e. Oha’arõ
hikuái pe Mesías. Tupã remimbou outáva omosẽ mbaretépe umi romanokuéra oreko asýva ichupekuéra.

Juan Bautista niko omopotĩ tape ou haguã upe Mesías. Oñemoñe’ẽ opavavépe omoĩ porã haguã hekove, omongarai ichupekuéra ojeheja rei haguã hembiapo vaikuégui. Ha Jesús oúvo hendápe ohechakuaa ha’e ha’eha upe Tupã remimbou añete.

Jesús katu ou ojehe’a hapicha mboriahu ha itavýva ndive, umi mba’e vai apoha pa’ũme ojasuru oúvo oñemongaraiuka Juan po rupi. Noguahẽi karai guasúicha, ndoúi tyapu guasúpe mburuvichakuéra oguahẽháicha. Ha Tupã Ñandejára, upe Túva yvaga pegua ohayhu ha oguerohory Jesús péicha oiko ha ojapohague rehe, upéva iporã ichupe, ha péicha oñanduka Jesús pe omboguejývo ipy’áre upe Espíritu Santo ha he’ívo ichupe: “Ndehína che ra’y ahayhúva, che aiporavova’ekue”.

Ndéko avei che reindy ha nde che irũ, Ñandejára rajy ha ta’ýra ha’e oiporavo ha ohayhúva, ha ome’ẽva ndéve avei ne misión ha ne rembiaporã ko yvy apére.

Pa’i Jasy.