Ñandejára Hesukrísto ñemongarai

Escucha el evangelio y la reflexión en: https://youtu.be/v_CSeIcgChs

Ñandejára Hesukrísto ñemongarai. Ciclo B

Marcos 1, 7 – 11

Upéro Juan Bautista oñemoñe’ẽvo he’i: “Che rire oúta peteĩ imbaretevéva che hegui, chéve ndaijáiva ajayvývo henondépe ajorávo chupe isapatu sãnte jepe. Che pomongarai va’ekue ýpe. Ha’e katu pene mongaraíta Espíritu Sántope.”

Umíva umi árape Jesús osẽ táva Nazaret, Galileágui. Ha Juan omongarai chupe rrío Jordánpe. Osẽvo pe ýgui, Jesús ohecha yvága ojepe’a ha Espíritu Santo oguejýva hi’ári pykasúicha. Ha oñehendu peteĩ oñe’ẽva yvágagui, ha he’íva: “Nde hína che ra’y ahayhúva, che aiporavo va’ekue.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñañeha’ãva niko jajehekýi mboriahu apĩ ha ñeikotevẽgui, ñasẽse jeiko asýgui, ñañakãrapu’ãse niko. Hi’ãnte ñandéve umi mba’e ojajaipáva umi iporãvéva jahupyty ñande rekovépe, ñande rógape, ñande táva ha ñane retãme. Ha ndaivaíri niko jaheka upe jeiko py’aguapy ha tekojojápe, javy’a ha jahasa porã oñondive. Juan Bautista ha umi tetã Israel-gua niko oha’arõ pe Mesía.

Tupã remimbou outáva, omosẽ rrománokuéra oreko asýva ichupekuéra. Ha mbaretépe omopu’ã ha omomba’e guasutaha tetã Israel.

Hesu katu noguahẽi karai guasúicha, ndoúi tyapu guasúpe opavave ojepopete haguãicha ichupe oguahẽvo mburuvichakuéra ojapo háicha. Ha’e ou ojehe’a hapichakuéra ndive.

Umi mba’e vai apoha pa’ũme ojasuru Juan Bautista omongarai haguã ichupe. Ha’e ou py’aguapýpe, ojejapo’ỹre. Ha upévare heta oime ohecha’íva ichupe ha’éne haguã upe
Mesia. Oime voi he’íva: “Pévante piko la pene Mesía, pévante piko la pende Tupã remimbou.” Ha ndojeroviái hete voi hese hikuái. Mba’épiko ko Hesu niko Ña María membýnte, karai José ra’ýnte. Peteĩ opaichaguávante niko ha’e.

Tupã Ñandejára, upe Túva yvága pegua katu ohayhu ha oguerohory Hesu péicha ojapo hague rehe. Upéva iporã ichupe. Mba’etekópa che reindy ha nde che irũ, eguerohorýnepa nde ra’y ha nde rajy ndojejapóiva ha ohayhu kuaáva hapichápe, ojehe’áva opavave ndive. Erénepa ichupe: “Nde hína che ra’y ahayhúva, nde hína che rajy ahayhúva”.

ÑAÑEMBO’E OÑONDIVE

Ñandejára Hesukrísto, nde reguejýva yvágagui ha rejehe’a va’ekue opavave ndive eñanduka haguã mba’éichapa Ñandejára ore rayhu ha ojapo ore hegui ita’ýra ha itajýra.

Ore pytyvõmíkena roñandu pypuku haguã ne mborayhu ha rojehe’ávo ore rapichakuéra ndive, torohechauka opavavépe mba’éichapa Ñandejára ñande rayhu.

Pa’i Jasy.