Ñahendu Jesús. Domingo 2º Durante el Año

Escucha el evangelio y la reflexión en: https://youtu.be/vP2g5CViueM

Domingo 2º Durante el Año. Ciclo B

Juan 1, 35 – 42

Upe árape Juan oĩ hína Betániape mokõi idisípulo ndive. Ha ohechávo Jesúspe ohasáva
ohóvo hína, he’i: “Amóva hína Ñandejára ovecha Ra’y”. Juan disípulokuéra ohendúvo upéva, osẽ oho Jesús rapykuéri. Upéi katu Jesús ojere omaña, ha ohecha chupekuéra oúva hína hapykuéri. Osẽ oporandu chupe kuéra: — Mba’éiko peheka.

He’i chupe hikuái: — Mbo’ehára, moõiko reiko.

Jesús he’i chupe kuéra: — Peju pehecha.

Ka’arúma upérõ. Ha oho hikuái Jesús ndive ohecha haguã moõpa oiko. Ha opyta hendive hógape pytũ meve. Peteĩva umi ohendu vaekue Juánpe ha oho vaekue Jesús rapykuéri niko héra va’ekue Andrés. Simón Pedro ryke’y va’ekue ha’e.

Ha Andrés pya’e porã osẽ Simón rekávo. Ha ojuhúvo chupe he’i: — Oime rojuhu pe Mesías.

Upéi, Andrés ogueraha Simónpe, Jesús rendápe. Ha Jesús ohechávo chupe, he’i:— Nde niko Simón, Juan ra’y. Ko’ágã guive nde rérata Cefas, he’iséva Pedro.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Lígape jakare jepe ojahoga”. He’i ningo ñe’ẽ. Juan Bautista ohecha ohasaha Hesu ha omboliga Andrés ha Juan pe oho haguã Hesu rapykuéri. Ha oho hikuái ha opyta hendive upe ára pukukue.

Upéi katu Andrés ma oikuaa rire Hesúpe pya’e oho oheka ityvýra ha omboliga mitã Pédrope oho haguã Hesu rendápe. Ha upéicha lígape ou oñemboheta hikuái.

Jerovia rapére ñaikotevẽ ñanemokyre’ỹva, ñanekonvidáva, ñanerenóiva ha oguatáva ñande ykére. Ñande roguagua, ñane pariénte, ñande vesíno. Ikatu avei pa’i, hermána, catequista, animador. Ohechaukáva ñandéve tape, ohendukáva ñandéve Hesu ñe’ẽ.

Upéi ñande ñande jeheguíma jaguata haguã, jaheka ha jagueru haguã ñande avei ñane irũrã. Hesu niko añete upe ñanembyatýva ijehe. Ha’e hína upe omosãva hetápe ha ñanemboguatáva júntape ijykére.

Ha’e ñande kuaa ha ñane renói ñande réra rupi, ñanemohenda ijykére ha ñanemosã ijehe. Hendive jajuhu vy’a ha py’aguapy.

Ne mandu’ápa che irũ ha che reindy, máva umi nembo’e vaekue Ñandejára rape. Mávapa umi nemboliga vaekue nde aty haguã nde rapicha kuéra ndive, oiko va’ekue nde reheve, oñeha’ã vaekue nde rehe oiko haguã nde hegui peteĩ kristiáno, kristiána porã.

ÑAÑEMBO’E OÑONDIVE

Ñandejára Hesukrísto, nde reju va’ekue ore apytépe embyaty opaicha guáva roiko haguã oño irũicha, nde ykére. Orembo’e mína ore avei rombyatykuaa haguã ore rapichápe, opaichaguáva ou haguã ne rendápe, nde kuaa ha nde rayhu haguã ha ohekave haguã avei ndéve ne irũrã. Amén.

Pa’i Alberto Luna.